Jeremiya 27:1-22
27 Kusanguleni ka kufuma ka Jehoyakimu, a n’wana wa Josiya, a hosi ya Judha, ku nota a mhaka leyi ya Jehovha ka Jeremiya, yi taku:
2 “Jehovha i no ndzi byela, aku: ‘Ti mahele a mabhandi ni mikanga u zvi vekela nhan’wini ya wena.
3 Andzhako ka lezvo, zvi rumele ka hosi ya Edhomi,+ ni hosi ya Mowabhi,+ ni hosi ya vaAmoni,+ ni hosi ya Tire,+ ni hosi ya Sidhoni+ hi canja ga zvirun’wa lezvi zvi tileko Jerusalema ka Zedhekiya, a hosi ya Judha.
4 Va leletele lezvi kasi va ya byela a tihosi tabye:
“‘“Jehovha wa mabutho, a Nungungulu wa Izrayeli, i ngalo: Mu ta ya byela a tihosi ta n’wina, muku:
5 ‘Hi mina ndzi nga maha misava, ni vanhu, ni zvihari lezvi zvi nga laha misaveni hi ntamu wa mina wa hombe ni woko ga mina gi nawulutilweko. Ndzi zvi nyika ni wihi ndzi mu lavako.*+
6 Makunu ndzi nyikele wontlhe a matiko lawa canjeni ga nandza ga mina Nebhukadnezare,+ a hosi ya Bhabhuloni; hambu a zvihari zva khwati ndzi zvi nyikele kakwe kasi zvi mu tirela.
7 A matiko wontlhe ma ta tirela yena, ni vana vakwe ni vazukulu vakwe kala ku chikela a khati ga yenawu,+ laha a matiko yo tala ni tihosi ta hombe ti to mu maha a khumbi yabye.’+
8 “‘“‘Ni gihi tiko kutani mufumo wu to ala ku tirela Nebhukadnezare, a hosi ya Bhabhuloni, ni ku ala a ku vekela a nhamu ya gona lahasi ka kanga wa hosi ya Bhabhuloni, ndzi ta gi tsayisa hi cipadha,+ ni ndlala, ni ntungu’,* ku wula Jehovha, ‘kala ndzi va lovisa hi canja gakwe.’
9 “‘“‘Hikwalaho, mu nga ingiseli a vaphrofeti va n’wina, ni vavhumbi va n’wina, ni valori va n’wina, ni vasalamusi va n’wina, ni valoyi va n’wina, lava va mu byelako ku: “Mu nga ta tirela a hosi ya Bhabhuloni.”
10 Hakuva va mu phrofetela mawunwa kasi mu tekiwa mu yisiwa kule ni tiko ga n’wina; ndzi ta mu hangalasa mu tlhela mu lova.
11 “‘“‘Kanilezvi a tiko legi gi to vhumela ku rwala a kanga wa hosi ya Bhabhuloni gi yi tirela, ndzi ta gi tsika gi simama* tikweni ga gona’, ku wula Jehovha, ‘gi gi rima gi tlhela gi tshama lomo.’”’”
12 Zedhekiya,+ a hosi ya Judha, yenawu ndzi mu byelile zvalezvo, ndziku: “Nghenisani a tinhamu ta n’wina lomu ka kanga wa hosi ya Bhabhuloni mu yi tirela, ni vanhu va yona, mu ta hanya.+
13 Hikuyini wena, ni vanhu va wena mu to dawa hi cipadha,+ ni ndlala,+ ni ntungu,+ khwatsi hi lezvi Jehovha a wulileko lezvaku zvi ta maheka ka tiko legi gi to kala gi nga tireli a hosi ya Bhabhuloni?
14 Mu nga ingiseli a magezu ya vaphrofeti lava va mu byelako ku: ‘Mu nga ta tirela a hosi ya Bhabhuloni’,+ hakuva va mu phrofetela mawunwa.+
15 “‘Hakuva a ndzi va rumangi’, ku wula Jehovha, ‘kanilezvi va phrofeta mawunwa hi vito ga mina, kasi ndzi mu hangalasa mu lova, n’wina ni vaphrofeti lava va mu phrofetelako.’”+
16 Ndzi byelile a vapristi ni vanhu lava vontlhe, ndziku: “Jehovha i ngalo: ‘Mu nga ingiseli a timhaka ta vaphrofeti va n’wina lava va mu phrofetelako, vaku: “A zvibya zva yindlu ya Jehovha zvi ta wuyisiwa lokuloku hi Bhabhuloni!”+ Hakuva lezvi va mu phrofetelako mawunwa.+
17 Mu nga va ingiseli. Tirelani a hosi ya Bhabhuloni, mu ta hanya.+ Hikuyini a dhoropa legi gi to sala gi hi rumbi?
18 Kanilezvi loku vona va hi vaphrofeti ni loku a mhaka ya Jehovha yi hi kabye, va wa khongotele Jehovha wa mabutho kasi a zvibya lezvi zva ha seleko lomu ndlwini ya Jehovha, ni lomu ndlwini* ya hosi ya Judha, ni lomu Jerusalema zvi nga tekiwi zviya Bhabhuloni.’
19 “Hakuva Jehovha wa mabutho i wula lezvi xungetano hi mapilari,+ ni Bimbi,*+ ni tikareta,+ ni zvibya zvin’wani zvi seleko dhoropeni legi,
20 lezvi Nebhukadnezare, a hosi ya Bhabhuloni, a nga kala ku zvi teka a cikhati leci a nga khoma Jekoniya, a n’wana wa Jehoyakimu, a hosi ya Judha, le Jerusalema a mu yisa wukhumbini le Bhabhuloni, zvin’we ni varangeli vontlhe va Judha ni Jerusalema,+
21 ina, Jehovha wa mabutho, a Nungungulu wa Izrayeli, i wula lezvi xungetano hi zvibya lezvi zvi seleko lomu ndlwini ya Jehovha, ni lomu ndlwini* ya hosi ya Judha, ni le Jerusalema, aku:
22 ‘“Zvi ta yisiwa Bhabhuloni+ zvi ya tshama seyo, kala siku legi ndzi to zvi alakanya hi gona”, ku wula Jehovha. “Makunu ndzi ta zvi wuyisa ndzi zvi tlhelisa wutshan’wini legi.”’”+
Mitlhamuselo ya lahasi
^ Hi kukongoma: “loyi a lulamileko matihlweni ya mina”.
^ Kutani: “mababyi”.
^ Hi kukongoma: “gi humula”.
^ Kutani: “palácio”.
^ Ku nga Bimbi ga kobre ga tempeli.
^ Kutani: “palácio”.
