Jeremiya 29:1-32
29 Leti timhaka ta papilo legi muphrofeti Jeremiya a nga rumela hi le Jerusalema giya ka madhota lawa ma nga sele cikari ka vanhu lava va nga yisilwe wukhumbini, ni ka vapristi, ni ka vaphrofeti, ni ka vanhu vontlhe lava Nebhukadnezare a nga va khomile Jerusalema a va yisa Bhabhuloni,
2 andzhako ka loku hosi Jekoniya,+ na mamani muzindza,*+ ni vafumeli, ni tihosana ta Judha, ni vameseri, ni vabethi va tisimbi* va humele Jerusalema.+
3 I no rumela papilo hi canja ga Elasa, a n’wana wa Xafani,+ na Gemariya, a n’wana wa Hilkiya, lava Zedhekiya,+ a hosi ya Judha, a nga va rumela ka Nebhukadnezare, a hosi ya Bhabhuloni. Gona gi waku:
4 “Jehovha wa mabutho, a Nungungulu wa Izrayeli, i byela vontlhe va nga wukhumbini, lava ndzi va mahileko va khomiwa Jerusalema vaya Bhabhuloni, aku:
5 ‘Akani tiyindlu mu tshama ka tona. Byalani masimu muga mihandzu ya kona.
6 Tekani vasati mu pswala vafana ni vanhanyana; va tekeleni vasati a vafana va n’wina, mu nyikela a vanhanyana va n’wina va chadha, kasi vonawu va pswala vafana ni vanhanyana. Andzani seyo, mu nga hunguleki.
7 Gi xuveleni kurula a dhoropa legi ndzi mu yisileko ka gona mu ya maha tikhumbi ta gona; gi khongeleleni ka Jehovha, hakuva loku giva ni kurula n’winawu mu tava ni kurula.+
8 Hakuva Jehovha wa mabutho, a Nungungulu wa Izrayeli, i ngalo: “Mu nga tsiki a vaphrofeti va n’wina, ni vavhumbi va n’wina, lava va nga cikari ka n’wina va mu kanganyisa,+ ne mu nga ingiseli a miloro leyi va lorako.
9 Hakuva ‘va mu phrofetela mawunwa hi vito ga mina. A ndzi va rumangi’,+ ku wula Jehovha.”’”
10 “Hakuva Jehovha i ngalo: ‘Loku ku hundzile 70 wa malembe le Bhabhuloni, ndzi ta mu alakanya,+ ndzi tatisa a citsumbiso ca mina, ndzi mu wuyisa wutshan’wini legi.’+
11 “‘Hakuva ndza zvi tiva khwatsi lezvi ndzi zvi alakanyako hi n’wina’, ku wula Jehovha: ‘Maalakanyo ya kurula na ku nga hi ya khombo,+ kasi mu rindzela zvazvinene, muva ni kutsumba.+
12 Mu ta ndzi vitana, muta ka mina mu ta khongela, na mina ndzi ta mu ingisela.’+
13 “‘Mu ta ndzi lava mu ndzi kuma,+ hakuva mu ta ndzi hlota hi mbilu ya n’wina yontlhe.+
14 Ndzi ta mu tsika mu ndzi kuma’,+ ku wula Jehovha. ‘Ndzi ta tlhanganisa a vanhu va wena va nga hi tikhumbi, ndzi va hlengeleta hi ka matiko wontlhe ni matshamu lawa ndzi va hangalasileko ka wona’,+ ku wula Jehovha. ‘Ndzi ta mu wuyisa ka wutshamu legi ndzi mu humesileko ka gona muya wukhumbini.’+
15 “Kanilezvi mu ngalo: ‘Jehovha i hi vhuxele vaphrofeti Bhabhuloni.’
16 “Hakuva Jehovha i byela a hosi leyi yi tshamileko citshan’wini ca wuhosi ca Dhavhidha+ ni vanhu vontlhe lava va tshamako dhoropeni legi, a vamakabye va n’wina lava va nga kala ku famba na n’wina wukhumbini, aku:
17 ‘Jehovha wa mabutho i ngalo: “Ndzi ta va rumelela cipadha, ni ndlala, ni ntungu,*+ niku ndzi ta va maha va fana ni makuwu yo bola,* yo nyenyeza nguvhu ya ku ne a ma ringani ku giwa.”’+
18 “‘Ndzi ta va hlongolisela hi cipadha,+ ni ndlala, ni ntungu, ndzi va maha vava nchumu wo tshisa ka yontlhe mifumo ya misava,+ ni ciruko, ni nchumu wo hlamalisa, ni nchumu wo belwa noti,+ ni wa ku rukiwa cikari ka matiko wontlhe lawa ndzi to va hangalasa ka wona,+
19 hakuva a va ingisangi a timhaka ta mina leti ndzi va rumeleko hi malandza ya mina, a vaphrofeti’, ku wula Jehovha, ‘lawa ndzi ma rumeleko hi kuphindaphinda.’*+
“‘Kanilezvi a mu ingisangi’,+ ku wula Jehovha.
20 “Hikwalaho, zwanani a mhaka ya Jehovha, n’wina n’wentlhe mu nga wukhumbini, n’wina lava ndzi mu hlongolileko le Jerusalema muya Bhabhuloni.
21 Jehovha wa mabutho, a Nungungulu wa Izrayeli, i wula lezvi xungetano hi Ahabhi, a n’wana wa Kolaya, na Zedhekiya, a n’wana wa Maaseya, lava va mu phrofetelako mawunwa hi vito ga mina,+ aku: ‘Ndzi ta va nyikela canjeni ga Nebhukadnezare,* a hosi ya Bhabhuloni. Yena i ta va daya mahlweni ka n’wina.
22 Lezvi zvi to va humelela ku tava gezu ga ciruko gi to wuliwa hi vaJudha vontlhe lava va nga wukhumbini le Bhabhuloni, vaku: “Jehovha i wa ku mahe zvo fana ni lezvi zvi nga mahekela Zedhekiya na Ahabhi, lava a hosi ya Bhabhuloni yi nga va woca lomu ndzilweni!”
23 Hakuva va mahile zvilo zva tingana lomu Izrayeli,+ va mahile wubhayi ni vasati va vaakelani vabye, va wulawula timhaka ta mawunwa hi vito ga mina taku a ndzi va rumangi.+
“‘“Mina ndza zvi tiva, ndzi kustumunyu”,+ ku wula Jehovha.’”
24 “Byela Xemaya,+ wa le Nehelame, uku:
25 ‘Jehovha wa mabutho, a Nungungulu wa Izrayeli, i ngalo: “Kota lezvi u nga rumela mapapilo hi vito ga wena ka vanhu vontlhe va le Jerusalema, ni ka mupristi Zefaniya,+ a n’wana wa Maaseya, ni ka vapristi vontlhe, uku:
26 ‘Jehovha i ku mahile mupristi wutshan’wini ga mupristi Jehoyadha kasi uva muwoneleli wa yindlu ya Jehovha, u wonelela ni yihi hlanyi yi to mahisa ku khwatsi muphrofeti, u yi fasa hi makhotso ni cigodho;*+
27 makunu hikuyini u nga kala ku kawuka Jeremiya, wa le Anatote,+ loyi a phrofetako cikari ka n’wina?+
28 Hakuva i zile a hi rumelela mahungu leno Bhabhuloni, aku: “Mu ta tshama cikhati co leha seyo! Akani tiyindlu mu tshama ka tona. Byalani masimu muga mihandzu ya kona,+ . . .”’”’”
29 Laha mupristi Zefaniya+ a nga lera a papilo legi na zvi zwiwa hi muphrofeti Jeremiya,
30 a mhaka ya Jehovha yi nota ka Jeremiya, yi taku:
31 “Rumela mahungu ka tikhumbi tontlhe, uku: ‘Xungetano hi Xemaya, wa le Nehelame, Jehovha i ngalo: “Kota lezvi Xemaya a mu phrofeteleko kuveni a ndzi mu rumangi, a zama ku mu maha mu tsumba mawunwa,+
32 hikwalaho, Jehovha i ngalo: ‘Ndzi ta tsayisa Xemaya, wa le Nehelame, ni pswalo wakwe. I hava ni mun’we wa lixaka lakwe a to pona cikari ka vanhu lava, a nga ta wona zvilo zva zvinene lezvi ndzi to mahela vanhu va mina’, ku wula Jehovha, ‘hakuva i kucetele vanhu lezvaku va vhukela Jehovha.’”’”
Mitlhamuselo ya lahasi
^ Zvi nga maha na zvi wula ku: “vaaki va makhokhola”.
^ Zvi nga maha na zvi wula ku: “ma phuxukileko”.
^ Kutani: “mababyi”.
^ Hi kukongoma: “ndzi vindzukileko ni mixo ndzi ma rumela”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “kanga wa simbi”.
