Jeremiya 30:1-24
-
Zvitsumbiso zva kutlheliselwa ni kuhanyiswa (1-24)
30 A mhaka ya Jehovha yi nota ka Jeremiya, yi taku:
2 “Jehovha, a Nungungulu wa Izrayeli, i ngalo: ‘Tsala a timhaka tontlhe leti ndzi ku byelako lomu bhukwini.
3 Hakuva “a masiku mata”, ku wula Jehovha, “laha ndzi to hlengeleta a vanhu va mina va khomilweko, Izrayeli na Judha”,+ ku wula Jehovha, “ndzi va wuyisa tikweni legi ndzi nyikileko a vakokwani vabye, niku gi ta tlhela giva gabye kambe.”’”+
4 Leti timhaka leti Jehovha a byelileko Izrayeli na Judha.
5 Jehovha i ngalo:
“Hi zwile magezu ya kururumela;Ku na ni kuchava, a ku na kurula.
6 Wutisani ku a wanuna a nga phuluka ke.
Makunu hikuyini ndzi wonako a vavanuna vontlhe va tinhenha na va ti khometele makhwiri*A ku khwatsi wasati a pswalako ke?+
Hikuyini a tinghohe tontlhe ti kwaleleko ke?
7 Yowe! A siku lego ga tshisa!*+
A ku na gin’wani go fana nago;Cikhati ca kukarateka ka Jakobe.
Kanilezvi i ta ponisiwa ka gona.”
8 “Ka siku lego”, ku wula Jehovha wa mabutho, “ndzi ta tshova a kanga lowu wu nga nhan’wini ya wena ndzi tlhela ndzi phewula a mabhandi ya wena hi laha cikari; a vamatiko va nga ta ha mu* maha khumbi yabye.
9 Va ta tirela Jehovha, a Nungungulu wabye, na Dhavhidha, a hosi yabye, loyi ndzi to va yimisela yena.”+
10 “Wena, nandza ga mina Jakobe, u nga chavi”, ku wula Jehovha,“Ne u nga dzukiswi, wena Izrayeli.+
Hakuva ndzi ta ku ponisa tikweni ga le kule,Ni pswalo wa wena ndzi ta wu ponisa tikweni ga wukhumbi.+
Jakobe i ta wuya a ta hanya kuruleni na a nga karateki hi nchumu;I hava a to va dzukisa.”+
11 “Hakuva ndzi na wena”, ku wula Jehovha, “kasi ku ku ponisa.
Kanilezvi ndzi ta lovisa a matiko wontlhe lawa ndzi ku hangalasileko ka wona.+Hambulezvo wena ndzi nga ta ku lovisa.+
Ndzi ta ku laya* hi lipimo li ringanako.Ndzi nga ta ku tsika na ndzi nga ku tsayisangi.”+
12 Hakuva Jehovha i ngalo:
“Laha u tshovekileko a ku chumeki.+
A cilondza ca wena a ci na muri.
13 I hava wa ku yimela a mhaka ya wena;A cilondza ca wena a ci na muri.
A ku na muri wa ku tira wena.
14 Zvontlhe a zvigango zva wena zvi ku rivele.+
A zva ha fambi zvi ku lavetela.
Hakuva ndzi ku bisile ku khwatsi hi lezvi a bisiwako zvona a nala,+Hi tsayiselelo wa munhu wa xapi,Hi kota ya nandzu wa wena wa hombe ni zviwonho zva wena zvo tala.+
15 Hikuyini u rilako hi lezvi u nga tshoveka?
A kubayisa ka wena a ku na muri!
Ndzi ku mahile lezviHi kota ya nandzu wa wena wa hombe ni zviwonho zva wena zvo tala.+
16 Hikwalaho, vontlhe lava va ku khadamulako va ta khadamulwa,+Ni vontlhe a valala va wena vonawu va taya wukhumbini.+
Lava va ku yivelako vonawu va ta yivelwa,Niku ndzi ta nyikela vontlhe lava va ku phangako kasi va phangiwa.”+
17 “Kanilezvi ndzi ta ku hanyisa ndzi holisa a zvilondza zva wena”,+ ku wula Jehovha,“Hambu lezvi va ku wulako munhu a alilweko, vaku:
‘Hi yena Ziyoni, loyi a nga laviwiko hi munhu.’”+
18 Jehovha i ngalo:
“Ndzi ta hlengeleta a tikhumbi ta matenda ya Jakobe,+Niku ndzi ta ma zwela wusiwana a matabhernakeli yakwe.
A dhoropa gi ta vhuxiwa citsungeni ca gona,+Ni likhokhola* li tiyisilweko khwatsi li ta yima wutshan’wini ga lona.
19 Hi ka vona ku ta huma a kubonga ni guwa ga kutsaka.+
Ndzi ta va andzisa niku va nga tava va tsongwani;+Ndzi ta va maha va tala,*Niku va nga tava ntsengo wu nga vhuniko nchumu.+
20 A vana vakwe va ta fana ni kale,A hlengeletano yakwe yi ta yima yi tiya mahlweni ka mina.+
Ndzi ta tsayisa vontlhe lava va mu xanisako.+
21 A wahombe wakwe i tava mun’we wabye,Ni hosana yakwe yi ta huma hi cikari kakwe.
Ndzi ta mu neha kusuhani, a tshinela ka mina.”
“Hakuva loku ndzi nga mahi lezvo, himani waku a nga xinyata a ndzi tshinelela?”, ku wula Jeho-vha.
22 “Mu tava vanhu va mina,+ mina ndziva Nungungulu wa n’wina.”+
23 A cingulo ca Jehovha ci ta pupuxa hi zanga;+A ku khwatsi i bhubhutsa, ci taba hehla ka tihloko ta vakubiha.
24 A zanga yi vhurako ya Jehovha yi nga ta tlhelela ndzhakoKala a tatisa ni ku maha mixuvo ya mbilu yakwe.+
Masikwini yo gumesa mu ta yi zwisisa a mhaka leyi.+
Mitlhamuselo ya lahasi
^ Kutani: “zviwunu”.
^ Hi kukongoma: “ga hombe”.
^ Kutani: “va”.
^ Kutani: “kawuka”.
^ Kutani: “torre”.
^ Zvi nga maha na zvi wula ku: “dzundziwa”.
