Jeremiya 32:1-44
32 Leyi i mhaka ya Jehovha yi tileko ka Jeremiya hi lembe ga wu 10 ga Zedhekiya, a hosi ya Judha, gi nga hi lembe ga wu 18 ga Nebhukadnezare.*+
2 Ka cikhati leco, a mabutho ya hosi ya Bhabhuloni ma wa randzele Jerusalema, niku muphrofeti Jeremiya i wa vhalelwe Tsendzeleni* wa Vagadhi,+ ndlwini* ya hosi ya ka Judha.
3 Hakuva Zedhekiya, a hosi ya ka Judha, i wa mu vhalele,+ aku: “U phrofetela yini, uku: ‘Jehovha i ngalo: “Ndzi ta nyikela dhoropa legi canjeni ga hosi ya Bhabhuloni kasi a gi hlula a gi teka,+
4 ni lezvaku Zedhekiya, a hosi ya Judha, a nga ta pona canjeni ga vaKaldheya, hakuva hakunene i ta nyikelwa canjeni ga hosi ya Bhabhuloni, niku i ta wulawula nayo nghohe ni nghohe, va wonana mahlo ni mahlo”’?+
5 ‘I ta teka Zedhekiya a mu yisa Bhabhuloni a ya tshama seyo kala ndzi mu alakanya’, ku wula Jehovha. ‘Hambu loku mu simama kulwa ni vaKaldheya mu nga ta hlula.’”+
6 Jeremiya i te: “A mhaka ya Jehovha yi nota ka mina, yi taku:
7 ‘Hanameli, a n’wana wa Xaluma, a tio* wa wena, i tata ka wena, a taku: “Xava a simu ga mina gi nga le Anatote,+ hakuva hi wena wo ranga u nga ni fanelo yo gi tlhatlhisa.”’”+
8 Hanameli, a n’wana wa tio wa mina, i nota ka mina laha Tsendzeleni wa Vagadhi, kota lezvi Jehovha a nga wulile, a ta ndzi byela, aku: “Xava a simu ga mina gi nga le Anatote, le tikweni ga Bhenjamini, hakuva hi wena u nga ni fanelo ya ku gi teka giva tshomba ya wena ni ku gi tlhatlhisa. Ti xavele gona.” Kwalaho, ndzi no zvi tiva lezvaku yi wa hi mhaka ya Jehovha.
9 Hikwalaho, ndzi no xava simu le Anatote, canjeni ga Hanameli, a n’wana wa tio wa mina. Ndzi no mu pezela mali yakwe:+ 7 wa maxekeli* ni 10 wa zvingerengere zva prata.
10 Ndzi no tsala dheklarasawu,+ ndzi vekela cifungo, ndzi vitanisa vakustumunyu+ ndzi tlhela ndzi peza mali cikalweni.
11 Ndzi no teka a dheklarasawu ga kuxaviwa ka simu, legi gi nga hi ni cifungo, hi ku landza a cileletelo ni lezvi zvi laviwako hi nayo, ni legi go kala cifungo.
12 Ndzi no nyikela a dheklarasawu ga kuxaviwa ka simu ka Bharuke,+ a n’wana wa Neriya,+ a n’wana wa Maseya, mahlweni ka Hanameli, a n’wana wa tio wa mina, ni mahlweni ka vakustumunyu lava va nga sinara a dheklarasawu ga kuxaviwa ka simu, ni mahlweni ka vaJudha vontlhe lava va nga tshamile Tsendzeleni wa Vagadhi.+
13 Ndzi no ruma Bharuke mahlweni kabye, ndziku:
14 “Jehovha wa mabutho, a Nungungulu wa Izrayeli, i ngalo: ‘Teka a madheklarasawu lawa ya kuxaviwa ka simu, legi ga cifungo ni legi gin’wani go kala cifungo, u ma chela lomu ka cibya ca wumba kasi ma tshama cikhati co leha.’
15 Hakuva Jehovha wa mabutho, a Nungungulu wa Izrayeli, i ngalo: ‘A tiyindlu, ni masimu, ni zvivhina* zvi ta tlhela zvi xaviwa tikweni legi.’”+
16 Andzhako ka loku ndzi nyikele a dheklarasawu ga kuxaviwa ka simu ka Bharuke, a n’wana wa Neriya, ndzi no khongela ka Jehovha, ndziku:
17 “O Jehovha, Hosi ya Hombe! Wena u mahile matilo ni misava hi ntamu wa wena wa hombe+ ni woko ga wena gi nawulutilweko. Ci hava ci ku tsandzako,
18 wena loyi u kombisako a lirandzo li nga mbheliko ka makume ya mazana, kanilezvi u tlhelisela a cigoho ca vapapayi ka* vana vabye andzhako kabye,+ wena Nungungulu wa lisine, wa hombe ni wa ntamu, wena loyi a vito ga wena u nga Jehovha wa mabutho.
19 A makungo ya wena ya hombe,* ni mitiro ya wena ya hombe.+ A matihlo ya wena ma cuwuka a tindlela tontlhe ta vanhu+ kasi u tlhelisela a mun’we ni mun’wani hi kuya hi tindlela takwe ni lezvi a mahako.+
20 U mahile zvikombiso ni zvihlamaliso tikweni ga Gibhite, lezvi zvi tiviwako kala nyamutlha, u ti mahela vito hehla ka Izrayeli ni cikari ka vanhu,+ kota lezvi zvi wonekako nyamutlha.
21 U humesile a vanhu va wena, a va ka Izrayeli, tikweni ga Gibhite hi zviwoniso, ni zvihlamaliso, ni canja ga ntamu, ni woko gi nawulutilweko, ni mitiro yi chavisako.+
22 “Andzhako ka cikhati, u no va nyika a tiko legi u hlambanyileko ku nyika vakokwani vabye,+ a tiko gi khulungako a masi ni wulombe.+
23 Va no nghena va gi teka giva tshomba yabye, kanilezvi a va ingisangi a gezu ga wena kutani ku famba nayweni wa wena. A va mahangi ne cin’we ca lezvi u nga va leletele ku maha, hikwalaho, u no neha hehla kabye a khombo legi gontlhe.+
24 A vanhu va tile ni marampa kasi va ta dhumela a dhoropa va gi teka,+ niku hi kota ya cipadha,+ ni ndlala, ni ntungu,*+ hakunene a dhoropa gi ta wela mandleni ya vaKaldheya lava va lwako nago. Zvontlhe lezvi u zvi wulileko zvi mahekile, kota lezvi u zvi wonako.
25 Kanilezvi wena Jehovha, Hosi ya Hombe, u ndzi byelile ku: ‘Xava simu hi mali, u vitanisa a vakustumunyu’, kuveni a dhoropa gi ta nyikelwa canjeni ga vaKaldheya.”
26 Zvalezvo a mhaka ya Jehovha yi nota ka Jeremiya, yi taku:
27 “Hi mina Jehovha, a Nungungulu wa vanhu vontlhe.* Ci kona ci nga ndzi tsandzako ke?
28 Hikwalaho, Jehovha i ngalo: ‘Ndzi ta nyikela a dhoropa legi ka vaKaldheya ni canjeni ga Nebhukadnezare,* a hosi ya Bhabhuloni; i ta gi teka.+
29 A vaKaldheya lava va lwako ni dhoropa legi va ta nghena va gi lumekela. Va ta gi hisa+ zvin’we ni tiyindlu leti a vanhu va mahileko miphahlo ka Bhaali hehla ka malangwa* ya tona, va chulula minyikelo ya zvakunwa ka van’wani vanungungulu kasi va ndzi zangarisa.’+
30 “‘Hakuva a vanhu va ka Izrayeli ni va ka Judha va maha basi lezvi zvi bihileko mahlweni ka mina kusukela wusweni gabye.+ A vanhu va ka Izrayeli va tshama hi ku ndzi zangarisa hi ntiro wa mandla yabye’, ku wula Jehovha.
31 ‘Hakuva kusukela a siku legi a dhoropa legi gi nga akiwa kala nyamutlha go ndzi vhuxela a zanga ni khulo basi,+ hikwalaho, gi fanele ku susiwa mahlweni ka mina+
32 hi kota ya kubiha kontlhe loku a vanhu va ka Izrayeli ni va ka Judha va ku mahileko kasi ku ndzi zangarisa, vona, ni tihosi tabye,+ ni tihosana tabye,+ ni vapristi vabye, ni vaphrofeti vabye,+ ni vanhu va ka Judha, ni vahanyi va Jerusalema.
33 Va tshama hi ku ndzi fularela va nga ndzi kombi a tinghohe tabye.+ Hambu lezvi ndzi nga zama ku va gondzisa hi kuphindaphinda,* a nga kona a nga ingisa a vhumela ku layiwa.+
34 Va vekile zvifananiso zvabye zvo nyenyeza lomu ndlwini leyi yi nga ni vito ga mina kasi va yi nyenyezisa.+
35 Ahandle ka lezvo, va akile a matshamu ma tlakukileko ya Bhaali, Nkoveni wa N’wana wa Hinome,*+ kasi va hundzisa a vafana vabye ni vanhanyana vabye hi lomu ndzilweni ka Moloki,+ a zvilo zva ku a ndzi va layangi+ ku maha ne a zvi tshukangi zvi ndzi tela mbilwini ya mina* a ku va byela ku va maha nchumu wo nyenyeza wo kota lowo, va wonhisa Judha.’
36 “Hikwalaho, xungetano hi dhoropa legi mu nge gi ta nyikelwa canjeni ga hosi ya Bhabhuloni hi cipadha, ni ndlala, ni ntungu, Jehovha, a Nungungulu wa Izrayeli, i ngalo:
37 ‘Ndzi ta va hlengeleta hi ka matiko wontlhe lawa ndzi va hangalasileko vaya ka wona hi kota ya zanga ya mina ni khulo ga mina ni civiti ca hombe.+ Ndzi ta va wuyisa wutshan’wini legi niku va ta hanya kuruleni.+
38 Va tava vanhu va mina, mina ndziva Nungungulu wabye.+
39 Ndzi ta va nyika a mbilu yin’we+ ni ndlela yin’we kasi contlhe cikhati va ndzi chava, zvi fela ku va fambela khwatsi, vona ni vana vabye andzhako kabye.+
40 Ndzi ta maha navo a civhumelwano ca pindzukelwa+ ca lezvaku ndzi nga ta tsika ku va mahela zvazvinene,+ niku ndzi ta chela timbilwini tabye a ku ndzi chava kasi va nga ndzi fulareli.+
41 Ndzi ta tsaka hi ku va mahela zvazvinene,+ ndzi va byala va tiya tikweni legi+ hi mbilu ya mina yontlhe ni muhefemulo* wa mina wontlhe.’”
42 “Hakuva Jehovha i ngalo: ‘A ku khwatsi hi lezvi ndzi nehileko hehla ka vanhu lava a khombo gontlhe legi ga hombe, ndzi ta neha kambe hehla kabye a wunene gontlhe* legi ndzi va tsumbisako.+
43 Ku ta tlhela ku xaviwa masimu tikweni legi+ hambu lezvi mu nge: “Ciwula, a ku tshami munhu ne hambu zvihari, niku gi nyikelwe canjeni ga vaKaldheya.”’
44 “‘Ku ta xaviwa masimu hi mali, ku tsaliwa madheklarasawu ma fungiwa. Ku ta vitaniwa vakustumunyu hi tikweni ga Bhenjamini,+ ni ka matshamu ma randzeleko Jerusalema, ni madhoropeni ya Judha,+ ni madhoropeni ya tiko ga zvitsunga, ni madhoropeni ya le ndzhelelweni,+ ni madhoropeni ya le dzongeni,* hakuva ndzi ta wuyisa a tikhumbi tabye’,+ ku wula Jehovha.”
Mitlhamuselo ya lahasi
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “Kutani: “palácio”.
^ Kutani: “Pátio”.
^ Ku nga makabye wa papayi.
^ A zvivhina masimu ya tisinya leti ti pswalako mauvha.
^ Hi kukongoma: “zvifuveni zva”.
^ Hi kukongoma: “U wa hombe hi wusungukati”.
^ Kutani: “mababyi”.
^ Hi kukongoma: “wa nyama yontlhe”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “madenga; terraços”.
^ Hi kukongoma: “ndzi nga vindzuka ndzi va gondzisa”.
^ Wona laha ka ku: “Gehena” ka Tlhamuselo wa magezu ya Bhibhiliya.
^ Kutani: “a zvi tshukangi zvi nghena maalakanyweni ya mina”.
^ Kutani: “zvontlhe zvilo zva zvinene”.
^ Kutani: “sul”.
