Jeremiya 33:1-26
33 A mhaka ya Jehovha yi nota ka Jeremiya hi khati ga wumbiri, na a ha vhalelwe laha Tsendzeleni* wa Vagadhi,+ yi taku:
2 “Jehovha, a Mumahi wa misava, Jehovha loyi a yi wumbileko, a yi yimisa a yi tiyisa, loyi a vito gakwe a nga Jehovha, i ngalo:
3 ‘Ndzi vitane, ndzi ta ku hlamula, ndzi tekela ku ku byela a zvilo zva hombe u nga zvi zwisisiko, lezvi u nga zvi tiviko.’”+
4 “Hakuva lezvi hi lezvi Jehovha, a Nungungulu wa Izrayeli, a wulako xungetano hi tiyindlu ta dhoropa legi ni tiyindlu ta tihosi ta Judha, leti ti khungumuliwako kasi ti vhikela dhoropa ka marampa ya ku dhumela hi wona ni ka cipadha,+
5 ni xungetano hi lava va tako va talwa ni vaKaldheya, va tata a matshamu lawa hi zvirumbi zva lava ndzi va dayako zangeni ya mina ni khulweni ga mina, lava a kubiha kabye ku ndzi mahileko ndzi gi fihlela a nghohe ya mina a dhoropa legi, aku:
6 ‘Ndzi ta mu vhuxa, ndzi mu nyika lihanyo li nene;+ ndzi ta va hanyisa ndzi va nyika kurula ka hombe ni lisine.+
7 Ndzi ta wuyisa a tikhumbi ta ka Judha ni tikhumbi ta ka Izrayeli.+ Ndzi ta va tiyisa a ku fana ni lezvi ndzi mahileko kusanguleni.+
8 Ndzi ta va basisa ka nandzu wontlhe wa zviwonho zvabye lezvi va ndzi maheleko;+ ndzi ta va tsetselela a nandzu wontlhe wa zviwonho zvabye ni zvihambunyeto lezvi va ndzi maheleko.+
9 A vito ga dhoropa legi gi tava litsako la mina, ni wudzundzo ga mina ni kusaseka ka mina mahlweni ka matiko wontlhe ya misava, lawa ma tozwa hi wunene gontlhe legi ndzi va mahelako.+ Ma ta chava, ma rurumela+ hi kota ya wunene gontlhe ni kurula loku ndzi to va nyika.’”+
10 “Jehovha i ngalo: ‘Ka wutshamu legi mu nge ciwula, ku nga hava munhu kutani cifuyo, lomu madhoropeni ya Judha ni lomu maruweni ya Jerusalema, lawa ma hahlulilweko, ku nga hava munhu kutani muhanyi hambu cifuyo, ku ta tlhela ku zwala
11 a guwa ga mikulungwani ni guwa ga kutsaka+ ni gezu ga noivho ni gezu ga noivha ni gezu ga lava va nge: “Bongani Jehovha wa mabutho, hakuva Jehovha mu nene;+ a lirandzo lakwe li nga mbheliko li simama kala kupindzuka!”’+
“‘Va tata ni minyikelo ya kubonga ndlwini ya Jehovha,+ hakuva ndzi ta wuyisa lava va khomilweko tikweni a ku khwatsi hi kusanguleni’, ku wula Jehovha.”
12 “Jehovha wa mabutho i ngalo: ‘Ka wutshamu legi gi mahileko ciwula, ku nga hava munhu kutani cifuyo, ni madhoropeni wontlhe ya gona ku ta tlhela kuva ni wuriselo kasi a varisi va risa kona a mitlhambi yabye.’+
13 “‘Lomu madhoropeni ya tiko ga zvitsunga, ni lomu madhoropeni ya le ndzhelelweni, ni lomu madhoropeni ya le dzongeni,* ni tikweni ga Bhenjamini, ni ka matshamu ma randzeleko Jerusalema,+ ni madhoropeni ya Judha,+ a mitlhambi yi ta tlhela yi hundza hi lomu mandleni ya lava va yi hlayako’, ku wula Jehovha.”
14 “‘A masiku mata’, ku wula Jehovha, ‘laha ndzi to tatisa a citsumbiso ci nene leci ndzi ci wulileko hi yindlu ya Izrayeli ni yindlu ya ka Judha.+
15 Ka masiku lawo ni ka cikhati leco, ndzi ta vhuxela Dhavhidha a hluke*+ go lulama niku gi ta yimela a nongameto ni kululama lomu tikweni.+
16 Masikwini lawo, Judha i ta ponisiwa,+ na Jerusalema i ta hanya kuruleni.+ I ta vitaniwa ku: ‘Jehovha Kululama ka Hina.’”+
17 “Hakuva Jehovha i ngalo: ‘Ku nga ta tshuka ku vhumaleka munhu wa lixaka la Dhavhidha wa ku tshama citshan’wini ca wuhosi ca yindlu ya Izrayeli,+
18 ne hambu ka vapristi va ka Levhi ku nga ta tshuka ku vhumaleka munhu wa ku yima mahlweni ka mina a maha minyikelo ya kuhiswa ya mirumba, ni ku hisa minyikelo ya tindzhoho, ni ku maha miphahlo.’”
19 A mhaka ya Jehovha yi no tlhela yita ka Jeremiya, yi taku:
20 “Jehovha i ngalo: ‘Loku mu wo zvi kota ku tshova civhumelwano ca mina ca hlikanhi ni civhumelwano ca mina ca wusiku, kasi a hlikanhi ni wusiku zvi ngati hi cikhati ca zvona ci yimisilweko,+
21 hi kona ku nga wa ta tshoveka a civhumelwano ca mina ni nandza ga mina Dhavhidha,+ kasi a ngavi ni n’wana a fumako citshan’wini cakwe ca wuhosi,+ zvin’we ni civhumelwano ca mina ni vapristi va ka Levhi, a malandza ya mina.+
22 A ku khwatsi hi lezvi zvi nga kotekiko ku hlaya a butho ga matilo ni ku pima a misava ya bimbi, ndzi ta wu andzisisa zvezvo a pswalo* wa nandza ga mina Dhavhidha, ni vaLevhi, lava va ndzi tirelako.’”
23 A mhaka ya Jehovha yi no engeta yita ka Jeremiya, yi taku:
24 “A wu zvi zwangi lezvi a vanhu lava va wulako, vaku: ‘Jehovha i ta tsika a mingango leyi ya yimbiri a yi hlawulileko’ ke? Va chepeta vanhu va mina, a va ha va woni kota tiko.
25 “Jehovha i ngalo: ‘A ku khwatsi hi lezvi ndzi yimisileko a civhumelwano ca mina ca hlikanhi ni wusiku,+ ni milayo ya tilo ni misava,+
26 ndzi nga ta tshuka ndzi tsika a pswalo* wa Jakobe ni wa nandza ga mina Dhavhidha, ndzi nga hlawuli cikari ka pswalo* wakwe a vafumeli va to fumela a pswalo* wa Abrahama, na Isaka, na Jakobe. Hakuva ndzi ta hlengeleta a tikhumbi tabye,+ ndzi ti zwela wusiwana.’”+
Mitlhamuselo ya lahasi
^ Kutani: “Pátio”.
^ Kutani: “sul”.
^ Kutani: “mugi wa tshomba”.
^ Hi kukongoma: “mbewu”.
^ Hi kukongoma: “mbewu”.
^ Hi kukongoma: “mbewu”.
^ Hi kukongoma: “mbewu”.