Jeremiya 34:1-22
34 A mhaka ya Jehovha yi nota ka Jeremiya a cikhati leci Nebhukadnezare,* a hosi ya Bhabhuloni, ni gontlhe a butho gakwe, ni yontlhe a mifumo ya misava yi nga fumiwa hi yena, ni wontlhe matiko va ngalwa ni Jerusalema ni wontlhe madhoropa yakwe, yi taku:+
2 “Jehovha, a Nungungulu wa Izrayeli, i ngalo: ‘Famba u ya byela Zedhekiya,+ a hosi ya Judha, uku: “Jehovha i ngalo: ‘Ndzi ta nyikela a dhoropa legi canjeni ga hosi ya Bhabhuloni niku i ta gi hisa hi ndzilo.+
3 Wena u nga ta pona canjeni gakwe, hakuva u ta khomiwa u nyikelwa kakwe.+ U ta wonana ni hosi ya Bhabhuloni tihlo ni tihlo; i ta wulawula na wena nghohe ni nghohe niku wena u taya Bhabhuloni.’+
4 Hambulezvo, zwana a mhaka ya Jehovha, wena Zedhekiya, a hosi ya Judha: ‘Jehovha i wula lezvi hi wena: “U nga ta dawa hi cipadha.
5 U tafa kuruleni,+ va ku hisela libani a ku khwatsi hi lezvi va mahileko ka vapapayi va wena, a tihosi ta kale, leti ti vileko kona mahlweni ka wena. Va ta ku rila, vaku: ‘Yowe, hosi!’ Hakuva ‘hi mina ndzi wulileko a mhaka leyo’, ku wula Jehovha.”’”’”
6 Muphrofeti Jeremiya i no byela Zedhekiya, a hosi ya Judha, tontlhe a timhaka leti le Jerusalema,
7 a cikhati leci a mabutho ya hosi ya Bhabhuloni ma ngalwa ni Jerusalema ni wontlhe a madhoropa ya Judha lawa ma nga sele,+ ku nga Lakixe+ na Azeka,+ hakuva ku wa hi wona woce a madhoropa ma vhikelweko khwatsi ma nga ha sele cikari ka madhoropa ya ka Judha.
8 A mhaka ya Jehovha yi nota ka Jeremiya, andzhako ka loku hosi Zedhekiya a mahile civhumelwano ni vanhu vontlhe va nga hi Jerusalema ca ku huwelela kutlhatlheka,+
9 lezvaku vontlhe va fanele ku tlhatlha a tikhumbi tabye ta vaHebheru, a ta cinuna ni ta cisati, kasi ku ngavi ni munhu a mu mahako khumbi a muJudha-kuloni.
10 Hikwalaho, tontlhe a tihosana ni vanhu vontlhe va no ingisa. Va no nghena ka civhumelwano ca lezvaku a vanhu vontlhe va fanele ku tlhatlha a tikhumbi tabye ta cinuna ni ta cisati, va nga ha va mahi tikhumbi kambe. Va no ingisa, va va tsika va famba.
11 Kanilezvi hi ndzhako ka cikhati, va no wuyisa a vavanuna ni vavasati lava va nga va tlhatlhile va ta va kurumeta kambe lezvaku va maha tikhumbi.
12 Hikwalaho, a mhaka ya Jehovha yi nota ka Jeremiya hi ka Jehovha, yi taku:
13 “Jehovha, a Nungungulu wa Izrayeli, i ngalo: ‘Ndzi mahile civhumelwano ni vakokwani va n’wina+ a siku legi ndzi nga va humesa tikweni ga Gibhite, ndlwini ya wukhumbi,+ ndziku:
14 “Kumbheleni ka 7 wa malembe, a mun’we ni mun’wani wa n’wina i ta tlhatlha makabye wakwe wa muHebheru, loyi a xaviselweko a mu tirela 6 wa malembe. Mu tlhatlhe a famba.”+ Kanilezvi a vakokwani va n’wina a va ingisangi ne hambu ku demba tindleve tabye ka mina.
15 Nyamutlha mu hundzulukile mu maha lezvi zvi nga zvinene mahlweni ka mina hi ku huwelela a kutlhatlheka ka vamakabye va n’wina niku mu mahile civhumelwano mahlweni ka mina ndlwini leyi yi vitaniwako hi vito ga mina.
16 Kanilezvi, andzhako ka lezvo, mu no tlhelela ndzhako mu nyenyezisa a vito ga mina+ hi ku wuyisa a vavanuna ni vavasati lava mu nga va tlhatlhile hi kuya hi kuxuva kabye,* mu va kurumeta lezvaku va tlhela va maha tikhumbi.’
17 “Hikwalaho, Jehovha i ngalo: ‘A mu ndzi ingisangi laha mu nga huwelela kutlhatlheka, a mun’we ni mun’wani ka makabye wakwe ni ka munhu-kuloni.+ Hikwalaho, ndza huwelela a kutlhatlheka ka n’wina’, ku wula Jehovha, ‘ka ku mu dawa hi cipadha, ni ntungu,* ni ndlala+ niku ndzi ta mu maha muva nchumu wo tshisa ka yontlhe mifumo ya misava.+
18 Lezvi hi lezvi zvi to maheka ka lava va tshovileko a civhumelwano ca mina hi ku nga hlayisi a timhaka ta civhumelwano leci va ci mahileko mahlweni ka mina, a cikhati va nga pandza a role hi laha cikari, va hundza hi cikari ka zvipandze zva gona,+
19 ku nga tihosana ta Judha, ni tihosana ta Jerusalema, ni vafumeli, ni vapristi, ni vontlhe a vanhu va tiko lava va hundzileko cikari ka zvipandze zva role:
20 Ndzi ta va nyikela ka valala vabye ni ka lava va hlotako a wutomi* gabye. A zvirumbi zvabye zvi tava zvakuga zva zvinyanyani zva matilo ni zva zvihari zva misava.+
21 Ndzi ta nyikela Zedhekiya, a hosi ya Judha, ni tihosana takwe canjeni ga valala vabye, ni canjeni ga lava va hlotako a wutomi* gabye, ni canjeni ga mabutho ya hosi ya Bhabhuloni,+ lawa ma hlehlako ma suka ka n’wina.’+
22 “‘Ndzi ta va nyika cileletelo’, ku wula Jehovha, ‘niku ndzi ta va wuyisa dhoropeni legi va talwa nago, va gi hlula, va gi hisa hi ndzilo;+ a madhoropa ya Judha ndzi ta ma maha ciwula, ku nga ha tshami munhu.’”+
Mitlhamuselo ya lahasi
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “hi kuya hi muhefemulo wabye”.
^ Kutani: “mababyi”.
^ Kutani: “mihefemulo”.
^ Kutani: “mihefemulo”.
