Jeremiya 37:1-21
37 Hosi Zedhekiya,+ a n’wana wa Josiya, i no sangula ku fuma wutshan’wini ga Koniya,*+ a n’wana wa Jehoyakimu, hakuva Nebhukadnezare,* a hosi ya Bhabhuloni, i wa mu mahile hosi tikweni ga Judha.+
2 Kanilezvi yena ni malandza yakwe ni vanhu va tiko a va ingisangi a timhaka ta Jehovha leti a nga ti wula hi nomu wa muphrofeti Jeremiya.
3 Hosi Zedhekiya i no rumela Jehukali,+ a n’wana wa Xelemiya, na Zefaniya,+ a n’wana wa mupristi Maaseya, ka muphrofeti Jeremiya, va yaku: “Hi kombela ku u hi khongelela ka Jehovha, a Nungungulu wa hina.”
4 Jeremiya i wa famba na a tlhatlhekile cikari ka vanhu hakuva va wa nga se mu vhalela lomu paxweni.+
5 Makunu a butho ga Faro gi no huma Gibhite,+ niku a vaKaldheya lava va nga randzela a Jerusalema va no zvizwa. Hikwalaho, va no hlehla va suka Jerusalema.+
6 A mhaka ya Jehovha yi nota ka muphrofeti Jeremiya, yi taku:
7 “Jehovha, a Nungungulu wa Izrayeli, i ngalo: ‘Byelani a hosi ya Judha, leyi yi mu rumileko a ku ta ndzi wutisa, muku: “A butho ga Faro legi gi tako ku ta mu vhuna gi ta tlhela Gibhite, tikweni ga gona.+
8 A vaKaldheya va ta wuya va talwa ni dhoropa legi, va gi teka, va gi hisa hi ndzilo.”+
9 Jehovha i ngalo: “Mu nga ti kalaveli,* muku: ‘A vaKaldheya va ta suka ka hina’, hakuva va nga ta suka.
10 Hambu loku mu wo hihirita a butho gontlhe ga vaKaldheya lava va lwako na n’wina ku sala lava vo bayisiwa basi, valavo va wa ta huma lomu matendeni yabye va hisa a dhoropa legi hi ndzilo.”’”+
11 A cikhati leci a butho ga vaKaldheya gi nga tsika kulwa ni Jerusalema hi kota ya butho ga Faro,+
12 Jeremiya i no huma lomu Jerusalema aya tikweni ga Bhenjamini+ kasi a ya amukela a ciavelo cakwe cikari ka vanhu vakwe.
13 Kanilezvi a cikhati leci a nga chikela laha Nyangweni ya Bhenjamini, a hosana ya vagadhi, leyi a vito ga yona ku nga hi Irija, a n’wana wa Xelemiya, a n’wana wa Hananiya, yi no khoma muphrofeti Jeremiya, yiku: “Wena uya u ya ti nyikela ka vaKaldheya!”
14 Kanilezvi Jeremiya i te: “Lezvo mawunwa! A ndziyi ndzi ya ti nyikela ka vaKaldheya.” Kanilezvi a yi mu ingisangi. Hikwalaho, Irija i no khoma Jeremiya a mu yisa ka tihosana.
15 A tihosana ti no zangarela Jeremiya,+ ti muba ti mu vhalela*+ lomu ndlwini ya Jehonatani, a matsalani, hakuva va wa yi mahile paxo.
16 Jeremiya i no hoxiwa lomu paxweni,* ka nkele wa lomu hasi, a tshama lomo a masiku yo tala.
17 Hosi Zedhekiya i no mu vitanisa. A hosi yi no mu wutisa cihundleni lomu ndlwini* ya yona,+ yiku: “U na ni mhaka yi tako hi ka Jehovha ke?” Jeremiya aku: “Ndzi nayo!” A engeta aku: “Wena u ta nyikelwa canjeni ga hosi ya Bhabhuloni!”+
18 Jeremiya i no tlhela a byela hosi Zedhekiya, aku: “Cini ndzi nga ku wonhela, wena ni malandza ya wena, ni vanhu lava a kuza mu ndzi vhalela paxweni ke?
19 Makunu va kwihi a vaphrofeti va n’wina, lava va nga mu phrofetela, vaku: ‘A hosi ya Bhabhuloni yi nga tata yi ta mu dhumela ne ku dhumela tiko legi’ ke?+
20 Makunu hosi yanga, zwana a kukombela ka mina, u ndzi mahela wuxinji. U nga ndzi tlhelisi ndlwini ya Jehonatani,+ a matsalani, ndzi nga fela seyo.”+
21 Hikwalaho, hosi Zedhekiya i no laya lezvaku Jeremiya a vhalelwa Tsendzeleni* wa Vagadhi.+ Siku ni siku i wa nyikiwa a pawa ya redhonda ya le ruweni ga vamahi va tipawa+ kala a tipawa tontlhe lomu dhoropeni ti mbhela.+ Jeremiya i no simama Tsendzeleni wa Vagadhi.
Mitlhamuselo ya lahasi
^ Loyi a vitaniwako kambe ku hi Jehoyakina ni ku Jekoniya.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “Mu nga kalaveli mihefemulo ya n’wina”.
^ Hi kukongoma: “ti mu vhalela ndlwini ya machini”.
^ Hi kukongoma: “ndlwini ya thangi”.
^ Kutani: “palácio”.
^ Kutani: “Pátio”.
