Jeremiya 38:1-28
38 Makunu Xefatiya, a n’wana wa Matani, na Gedhaliya, a n’wana wa Paxuri, na Jukali,+ a n’wana wa Xelemiya, na Paxuri,+ a n’wana wa Malkija, va nozwa a timhaka leti Jeremiya a nga kari a byela a vanhu vontlhe, aku:
2 “Jehovha i ngalo: ‘Loyi a to tshama lomu dhoropeni legi i ta dawa hi cipadha, ni ndlala, ni ntungu.*+ Kanilezvi loyi a to ti nyikela* ka vaKaldheya i ta simama a hanya niku i ta ponisa wutomi* gakwe kota muphango,* a hanya.+
3 Jehovha i ngalo: ‘A dhoropa legi gi ta nyikelwa ka butho ga hosi ya Bhabhuloni, yi gi teka.’”+
4 A tihosana ti te ngalo ka hosi: “A wanuna loyi i wa dawe,+ hakuva wa ma mbheta ntamu a* masochwa lawa ma seleko lomu dhoropeni legi ni vanhu vontlhe hi ku va byela a magezu lawa. A wanuna loyi a nga va xuveli kurula a vanhu lava kanilezvi i va xuvela khombo.”
5 Hosi Zedhekiya i no va hlamula, aku: “I mandleni ya n’wina, hakuva a hosi a yi nge mu beteli nchumu.”
6 Hikwalaho, va no khoma Jeremiya va mu hoxela lomu thangini ga Malkija, a n’wana wa hosi, legi gi nga hi Tsendzeleni* wa Vagadhi.+ Va no mu releta hi tingoti. Lomu thangini ku wa nga hi na mati, ku wova ni madhaka basi, niku Jeremiya i no sangula ku nyupela lomu madhakeni.
7 Ebhed-Meleki,+ a muEtiopia, a thenwa* lomu ndlwini* ya hosi, i nozwa lezvaku va petile Jeremiya lomu thangini. A hosi yi wa tshamile laha Nyangweni ya Bhenjamini.+
8 Hikwalaho, Ebhed-Meleki i no huma ndlwini* ya hosi, a ya wulawula ni hosi, aku:
9 “O hosi ya mina, lezvi a vavanuna lava va nga maha muphrofeti Jeremiya zvi bihile. Va mu hoxele lomu thangini niku i tafa lomo hi ndlala, hakuva a ka ha hi na zvakuga* lomu dhoropeni.”+
10 A hosi yi no ruma Ebhed-Meleki, a muEtiopia, yiku: “Teka a 30 wa vavanuna laha mu ya humesa muphrofeti Jeremiya lomu thangini na a nga sefa.”
11 Hikwalaho, Ebhed-Meleki i no teka vavanuna vaya ndlwini* ya hosi ka wutshamu gi nga lahasi ka sala ya titshomba+ va ya teka a zvitarapo ni tinguwo to hlakala va zvi releta ka Jeremiya hi tingoti lomu thangini.
12 Ebhed-Meleki, a muEtiopia, i te ngalo ka Jeremiya: “Vekela a zvitarapo ni tinguwo makhahaleni ya wena u gumesa u hakhara tingoti.” Jeremiya i no maha lezvo,
13 niku va no kokela Jeremiya hi tingoti va mu humesa lomu thangini. Jeremiya i no tshama Tsendzeleni wa Vagadhi.+
14 Hosi Zedhekiya i no vitanisa muphrofeti Jeremiya ata kakwe nyangweni ya wunharu yi nga ndlwini ya Jehovha, ni hosi yi no byela Jeremiya, yiku: “Ndzi na ni mhaka ndzi lavako ku ku wutisa. U nga ndzi fihleli nchumu.”
15 Jeremiya i no byela Zedhekiya, aku: “Loku ndzi ku byela, u ta ndzi daya. Loku ndzi ku nyika wusungukati, u nga ta ndzi ingisa.”
16 Hikwalaho, hosi Zedhekiya i no hlambanya ka Jeremiya cihundleni, aku: “A ku khwatsi hi lezvi Jehovha a hanyako, loyi a hi nyikileko wutomi,* ndzi nga ta ku daya ne ndzi nga ta ku nyikela ka vavanuna lava va hlotako a wutomi* ga wena.”
17 Jeremiya i no byela Zedhekiya, aku: “Jehovha, a Nungungulu wa mabutho, a Nungungulu wa Izrayeli, i ngalo: ‘Loku u ti nyikela* ka tihosana ta hosi ya Bhabhuloni u ta hanya,* ni dhoropa legi gi nga ta hisiwa hi ndzilo; wena ni yindlu ya wena mu ta hanya.+
18 Kanilezvi loku u nga ti nyikeli* ka tihosana ta hosi ya Bhabhuloni, a dhoropa legi gi ta nyikelwa canjeni ga vaKaldheya va gi hisa hi ndzilo;+ u nga ta pona canjeni gabye.’”+
19 Hosi Zedhekiya i no byela Jeremiya, aku: “Ndza chava a vaJudha lava va ti nyikeleko ka vaKaldheya, hakuva loku ndzo nyikelwa kabye va ta ndzi xanisa hi tihanyi.”
20 Kanilezvi Jeremiya i te ngalo: “U nga ta nyikelwa canjeni gabye. Ingisa a gezu ga Jehovha u maha lezvi ndzi ku byelako, zvi ta ku fambela khwatsi niku u ta simama u hanya.*
21 Kanilezvi loku u ala ku ti nyikela,* Jehovha i ndzi kombile lezvi:
22 Ndzi wona vavasati vontlhe lava va seleko lomu ndlwini* ya Judha na va nehiwa ka tihosana ta hosi ya Bhabhuloni,+ niku ve ngalo:‘A vavanuna lava u nga va tsumba* va ku kanganyisile va ku hlula.+
Va mbombomelisile a mikondzo ya wena lomu madhakeni.
Lezvi va hlehlile va tsutsuma.’
23 Vontlhe a vasati va wena ni vana va wena va ta nehiwa ka vaKaldheya, niku u nga ta pona canjeni gabye, kanilezvi u ta khomiwa hi hosi ya Bhabhuloni+ niku hi kota ya wena a dhoropa legi gi ta hisiwa hi ndzilo.”+
24 Zedhekiya i no byela Jeremiya, aku: “U nga byeli munhu a timhaka leti, u ngafa.
25 Loku a tihosana tizwa lezvaku ndzi wulawulile na wena, tita ka wena ti taku: ‘Hi byele lezvi u nga byela hosi. U nga hi fihleli nchumu, hi nga ta ku daya.+ Zvini lezvi a hosi yi nga ku byela?’
26 Va hlamule ku: ‘A ndzo kombela hosi lezvaku yi nga ndzi tlhelisi ndlwini ya Jehonatani ndzi ya fela seyo.’”+
27 Andzhako ka cikhati, tontlhe a tihosana ti nota ka Jeremiya ti ta mu wutisa. Jeremiya i no va byela zvontlhe lezvi a hosi yi nga mu leletele ku wula. Hikwalaho, a va ha mu byelangi nchumu, hakuva i hava a nga ma zwile a mabhulo yabye.
28 Jeremiya i no simama laha Tsendzeleni wa Vagadhi kala siku legi Jerusalema a nga tekiwa;+ i wa ha hi laho a cikhati leci Jerusalema a nga tekiwa.+
Mitlhamuselo ya lahasi
^ Kutani: “mababyi”.
^ Hi kukongoma: “a to huma aya”.
^ Kutani: “muhefemulo”.
^ Kutani: i ta huluka ni wutomi gakwe”.
^ Hi kukongoma: “wa rera mandla ya”.
^ Kutani: “Pátio”.
^ Kutani: “hosana”.
^ Kutani: “palácio”.
^ Kutani: “palácio”.
^ Hi kukongoma: “pawa”.
^ Kutani: “palácio”.
^ Kutani: “a hi maheleko a muhefemulo lowu”.
^ Kutani: “muhefemulo”.
^ Hi kukongoma: “u huma uya”.
^ Kutani: “a muhefemulo wa wena wu ta simama wu hanya”.
^ Hi kukongoma: “u nga humi uya”.
^ Kutani: “niku a muhefemulo wa wena wu ta simama wu hanya”.
^ Hi kukongoma: “ku huma”.
^ Kutani: “palácio”.
^ Hi kukongoma: “ A vavanuna lava va nga hanya hi kurula na wena”.
