Jeremiya 39:1-18
39 Hi lembe ga wu 9 ga Zedhekiya, a hosi ya Judha, hi hweti ya wu 10, Nebhukadnezare,* a hosi ya Bhabhuloni, ni gontlhe a butho gakwe va nota Jerusalema va ta gi randzela.+
2 Hi lembe ga wu 11 ga Zedhekiya, hi hweti ya wumune, hi siku ga wu 9 ga hweti, va no bhoxa a muro wa dhoropa.+
3 A tihosana tontlhe ta hosi ya Bhabhuloni, ku nga Nergal-Xarezeri, a Samgar, na Nebho-Sarsekimu, a Rab-Sarisi,* na Nergal-Xarezeri, a Rab-Mage,* ni tontlhe a tihosana leti tin’wani ta hosi ya Bhabhuloni ti no nghena ti tshama laha Nyangweni ya laha Cikari.+
4 A cikhati leci Zedhekiya, a hosi ya Judha, ni masochwa wontlhe va nga va wona, va no tsutsuma+ va huma lomu dhoropeni ni wusiku hi ndlela ya jardhim ya hosi, hi nyangwa yi nga cikari ka makhurisi mambiri, va simama hi ndlela ya Arabha.+
5 Kanilezvi a butho ga vaKaldheya gi no va hlongolisela gi ya kuma Zedhekiya livaleni la Jeriko.+ Va no mu khoma va mu yisa ka Nebhukadnezare,* a hosi ya Bhabhuloni, le Ribla,+ tikweni ga Hamate,+ a ya mu nyika tsayiselelo wakwe seyo.
6 A hosi ya Bhabhuloni yi no laya lezvaku a vana va Zedhekiya va dawa na a zvi wona, le Ribla. A hosi yi no tlhela yi laya lezvaku ku dawa a vahombe vontlhe va ka Judha.+
7 Andzhako ka lezvo, i no bhoxa a matihlo ya Zedhekiya, a mu boha hi machini ya kobre kasi a mu yisa Bhabhuloni.+
8 A vaKaldheya va no hisa a yindlu* ya hosi ni tiyindlu ta vanhu,+ va tlhela va khungumulela a mimuro ya Jerusalema.+
9 Nebhuzaradhani,+ a hosana ya vagadhi, i no khoma a vanhu lava va nga sele lomu dhoropeni, zvin’we ni lava va nga ti nyikele kakwe, ni vontlhe va nga sele a va yisa wukhumbini Bhabhuloni.
10 Kanilezvi Nebhuzaradhani, a hosana ya vagadhi, i no siya vokari lomu tikweni ga Judha lava va nga hi zvisiwana nguvhu, lava va nga hi hava nchumu. Ka siku galego, i no va nyika a zvivhina* ni masimu kasi va rima.*+
11 Nebhukadnezare,* a hosi ya Bhabhuloni, i no leletela Nebhuzaradhani, a hosana ya vagadhi, xungetano hi Jeremiya, aku:
12 “Mu teke u mu hlayisa, u nga mu mahi zvakubiha, niku mu nyike ni cihi a to ku kombela.”+
13 Hikwalaho, Nebhuzaradhani, a hosana ya vagadhi, na Nebhuxazbhani, a Rab-Sarisi,* na Nergal-Xarezeri, a Rab-Mage,* ni vontlhe a vahombe va hosana ya Bhabhuloni va no rumisa
14 lezvaku Jeremiya a humesiwa Tsendzeleni* wa Vagadhi+ a nyikelwa ka Gedhaliya,+ a n’wana wa Ahikamu,+ a n’wana wa Xafani,+ kasi a mu yisa mutini wakwe. Hikwalaho, Jeremiya i no hanya cikari ka vanhu.
15 Laha Jeremiya a nga ha vhalelwe Tsendzeleni wa Vagadhi,+ a mhaka ya Jehovha yi nota kakwe, yi taku:
16 “Famba u ya byela Ebhed-Meleki,+ a muEtiopia, uku: ‘Jehovha wa mabutho, a Nungungulu wa Izrayeli, i ngalo: “Ndza tatisa a timhaka ta mina xungetano hi dhoropa legi kasi ku gi nehela khombo na ku nga hi zvazvinene; ka siku lego u ta zvi wona na zvi maheka.”’
17 “‘Kanilezvi ka siku lego ndzi ta ku tlhatlhisa’, ku wula Jehovha, ‘niku u nga ta nyikelwa mandleni ya vanhu lava u va chavako.’
18 “‘Hakuva ndzi ta ku vhululela a ndlela ya ku u pona, niku u nga ta dawa hi cipadha. U ta ponisa a wutomi* ga wena kota muphango,*+ hakuva u ndzi tsumbile’,+ ku wula Jehovha.”
Mitlhamuselo ya lahasi
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “Nergal-Xarezeri, Samgar-Nebho, Sarsekimu, Rabsarisi”, hi kuya hi matsalela yo hambana ya ciHebheru.
^ Kutani: “hosana ya valoyi (muhlahluvi a tirisako tinyeleti)”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “palácio”.
^ A zvivhina masimu ya tisinya leti ti pswalako mauvha.
^ Zvi nga maha na zvi wula ku: “va maha mitiro ya cikurumeta”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “hosana ya hombe ya laha wuhosini”.
^ Kutani: “hosana ya valoyi (muhlahluvi a tirisako tinyeleti)”.
^ Kutani: “Pátio”.
^ Kutani: “muhefemulo”.
^ Kutani: “u ta huluka ni wutomi ga wena”.
