Jeremiya 4:1-31
4 “O Izrayeli, loku u wuya”, ku wula Jehovha,“Ina, loku u wuya ka mina,Ni loku u susa a zvifananiso zva wena zvo nyenyeza mahlweni ka mina,U nga ta maha mutsutsumi.+
2 Loku u hlambanya, uku:‘A ku khwatsi hi lezvi Jehovha a hanyako!’ Hi lisine, ni nongameto, ni kululama,A matiko ma ta ti kumela cikatekiso hi laha ka yena,Ma tlhela ma ti kulisa ha yena.”+
3 Hakuva Jehovha i byela a vanhu va ka Judha ni va Jerusalema, aku:
“Ti rimeleni masimu,Mu nga ha byali lomu ka mimizwa.+
4 Ti maheni wukwera* ka Jehovha,Mu susa a dewu ga timbilu ta n’wina,+N’wina vanhu va ka Judha ni vahanyi va Jerusalema,Kasi a zanga ya mina yi nga vhutsuki a ku khwatsi i ndzilo,Yi vhura yi nga timiwi hi munhuHi kota ya mitiro ya n’wina ya kubiha.”+
5 Kanelani le Judha, mu huwelela le Jerusalema.
Kanyulukani muba linanga* tikweni gontlhe.+
Bangulekani, muku: “Tsombanani;A hi tsutsumeni hiya madhoropeni ma vhikelweko khwatsi.+
6 Tlakusani a sinya ya cikombiso yi cuwuka Ziyoni.
Lavani ko tumbela, mu nga yimi.”
Hakuva ndza neha khombo hi le n’walungu,*+ a kuhahlula ka hombe.
7 I humele a ku khwatsi i nghala yi humako hi lomu citshitshini ca yona;+A mulovisi wa matiko i humele.+
I humele hi wutshan’wini gakwe kasi ku ta hundzula tiko giva nchumu wo tshisa.
A madhoropa ya wena ma ta hahlulwa ma sala ma hi marumbi, ku nga ha tshami munhu.+
8 Hikwalaho, bohani tisakwa;+Rilani* muba tinyandha,Hakuva a zanga yi vhurako ya Jehovha a yi sukangi ka hina.
9 “Ka siku lego”, ku wula Jehovha, “a mbilu ya hosi yi ta mbhela ntamu,+Ni timbilu ta tihosana tonawu;A vapristi va ta chava, ni vaphrofeti va ta jujeka kupima.”+
10 Makunu ndzi te: “O Jehovha, Hosi ya hombe, hakunene u kanganyisile a vanhu lava+ ni Jerusalema, uku: ‘Mu tava ni kurula’,+ kuveni a cipadha ci lomu mikolweni* ya hina.”
11 Cikhatini leco, ku ta wuliwa lezvi hi vanhu lava ni Jerusalema:
“A moya wa kuhisa wu tako hi ka zvitsungana zva ciwulaWu taba hehla ka nhanyana wa vanhu va mina;A wu teli ku ta hehera kutani ku basisa timbewu.
12 A moya wa hombe wata hi seyo hi kulaya ka mina.
Makunu ndzi ta va lamula.
13 A nala i tata a ku khwatsi marefu ya vhula,Niku a tikareta takwe ti fana ni cingulo.+
A mahaxi yakwe ma tsutsuma ku hundza ni magama.+
Khombo ga hina, hakuva hi lovile!
14 O Jerusalema, hlazva a mbilu ya wena u yi basisa kubiheni kasi u ponisiwa.+
U ta simama ni maalakanyo ya kubiha kala rini?
15 Hakuva ka zwala a gezu gi nehako a mahungu hi le Dhani,+Gi huwelela a khombo hi le zvitsungeni zva Efrayime.
16 Bikelani matiko;Huwelelani ka Jerusalema.”
“A varindzeli* vata hi tikweni ga le kule,Va ta tlakusa a magezu yabye hehla ka madhoropa ya Judha.
17 Va mu dhumela hi matlhelo wontlhe a ku khwatsi varindzeli va masimu,+Hakuva i tsikile ku ndzi ingisa”,+ ku wula Jehovha.
18 “A tindlela ta wena ni mitiro ya wena zvi tata hehla ka wena.+
A go ku bayisa a khombo ga wena,Hakuva gi chikele ni mbilwini ya wena!”
19 Yowe,* yowe!
Ndzizwa a kubayisa ka hombe mbilwini ya mina.
A mbilu ya mina ya pandza ndzeni ka mina.
A ndzi zvi koti ku miyela,Hakuva ndzi* zwile kuvhuma ka linanga,*A guwa ga citlharihiso ca yimpi.*+
20 Ku huwelelwa khombo hehla ka khombo,Hakuva a tiko gontlhe gi lovisilwe.
A matenda ya mina ma lovisilwe hi citshuketi,Ni tinguwo ta wona hi kucopeta ka tihlo.+
21 Ndzi ta wona a sinya ya cikombiso kala rini?Kona ndzi tazwa a kuvhuma ka linanga* kala rini ke?+
22 “Hakuva a vanhu va mina zvipumbu;+A va cheli kota hi mina.
A vana lava zvipumbu, a va pimisi.
Va tlharihile nguvhu ka ku maha zvakubiha,Kanilezvi a va zvi tivi ku maha zvazvinene.”
23 Ndzi no cuwuka tiko, ndzi wona lezvaku a gi na nchumu niku ciwula.+
Ndzi no cuwuka matilo, ndzi wona lezvaku a ma ha hi na kuwonekela.+
24 Ndzi no cuwuka zvitsunga, ndzi wona ku zvo rurumela,Ni zvitsungana, ndzi wona ku zvo tsekatseka.+
25 Ndzi no cuwuka ndzi wona lezvaku ku wa nga hi na munhu,Ni zvinyanyani zvontlhe zva matilo zvi wa tsutsumile.+
26 Ndzi no cuwuka ndzi wona ku a simu ga tisinya ta mihandzu gi mahile ciwula,Niku a madhoropa ya gona ma wa hahlulilwe.+
Zvi mahilwe hi Jehovha,Ina, hi kota ya zanga yakwe yi vhurako.
27 Hakuva Jehovha i ngalo: “A tiko gontlhe gi ta maha ciwula,+Kanilezvi ndzi nga ta gi lovisa gontlhe.
28 Hikwalaho, a tiko gi ta rila,+Ni matilo le hehla ma ta phuma.+
Hakuva ndzi wulile, niku ndzi bohile lezvo;Ndzi nga ta cica a maalakanyo ya mina,* ne ndzi nga ta tlhelela ndzhako.+
29 Laha gi zwako a guwa ga vakhileli va mahaxi ni vaphandi va mipaxa,A dhoropa gontlhe go tsutsuma.+
Va nghena khwatini,Va kandziha maribyeni.+
A madhoropa wontlhe ma sala woce,A ka ha tshami munhu ka wona.”
30 Lezvi makunu u hahlulilweko, u ta kuyini?
U wa randza ku ti sasekisa hi tinguwo to pswhuka,U ti sasekisa hi ouro,U penda matihlo ya wena hi muvala wa ntima.
Kanilezvi u ti sasekisile mahala,+Hakuva a zvigango zva wena zvi ku tsikile,Makunu zvi lava ku ku daya.*+
31 Hakuva ndzi zwile guwa go khwatsi ga wasati a babyako,A kukarateka ko fana ni ka wasati a tewulako.I gezu ga nhanyana wa Ziyoni a hefemulako hi kukarateka.
I nawuluta a mandla yakwe na aku:+
“Yowe, ndzi* karele hi vadayi!”
Mitlhamuselo ya lahasi
^ Kutani: “Ti tluliseni ngoma”.
^ Kutani: “khombela”.
^ Kutani: “norte”.
^ Kutani: “Ti beni zvifuva”.
^ Kutani: “ci tlhavile mihefemulo”.
^ Hi kukongoma: “vacuwukeli”, ku nga lava va cuwukelako a dhoropa kasi ku tiva a cikhati ca ku gi dhumela hi cona.
^ Hi kukongoma: “Marumbu ya mina”.
^ Kutani: “a muhefemulo wa mina wu”.
^ Kutani: “khombela”.
^ Zvi nga maha na zvi wula ku: “tihuwa ta yimpi”.
^ Kutani: “khombela”.
^ Kutani: “Ndzi nga ta ti laya”.
^ Kutani: “hlota muhefemulo wa wena”.
^ Kutani: “a muhefemulo wa mina wu”.
