Jeremiya 40:1-16
40 A mhaka ya Jehovha yi nota ka Jeremiya andzhako ka loku Nebhuzaradhani,+ a hosi ya vagadhi, a mu tlhatlhile le Rama.+ I wa mu tekile aya seyo na a bohilwe mawoko hi machini, na a hi cikari ka vontlhe a vanhu va Jerusalema ni Judha, lava va nga khomilwe, va nga kari va yisiwa Bhabhuloni.
2 A hosi ya vagadhi yi no teka Jeremiya, yiku kakwe: “Jehovha, a Nungungulu wa wena, i phrofetile a khombo legi a phrofetela a wutshamu legi,
3 niku Jehovha i gi nehile kota lezvi a wulileko hakuva n’wina mu wonhele Jehovha niku a mu ingisangi a gezu gakwe. Hikwalaho, mu welwe hi khombo legi.+
4 Nyamutlha ndza ku tlhatlha a machini lawa ma nga mawokweni ya wena. Loku u zvi lava ku famba na mina Bhabhuloni, a hi fambe, ndzi ta ku hlayisa. Kanilezvi, loku u nga zvi lavi ku famba na mina Bhabhuloni, sala. Wa zvi wona! A tiko gontlhe gi mahlweni ka wena. Yana ni kwihi u ku lavako.”+
5 Jeremiya na a nga se hundzuluka a suka, Nebhuzaradhani i te ngalo kakwe: “Tlhela ka Gedhaliya,+ a n’wana wa Ahikamu,+ a n’wana wa Xafani,+ loyi a hosi ya Bhabhuloni yi mu yimisileko ku fumela madhoropa ya Judha, u ya tshama naye zvin’we ni vanhu, kutani uya ni kwihi u ku lavako.”
A hosana ya vagadhi yi no mu nyika zvakuga ni cinyikiwo, yi mu tsika a famba.
6 Hikwalaho, Jeremiya i noya ka Gedhaliya, a n’wana wa Ahikamu, le Mizpa,+ a ya tshama naye, zvin’we ni vanhu lava va nga sele lomu tikweni.
7 Hi ndzhako ka cikhati, vontlhe a varangeli va butho, lava va nga hi le handle ka dhoropa ni vavanuna va vona, va nozwa lezvaku a hosi ya Bhabhuloni yi yimisile Gedhaliya, a n’wana wa Ahikamu, lezvaku a fumela tiko, yi tlhela yi mu yimisa hehla ka vavanuna ni vavasati ni vanana, va nga hi zvisiwana lomu tikweni, lava va nga kala ku yisiwa Bhabhuloni.+
8 Hikwalaho, va noya ka Gedhaliya le Mizpa.+ Ku wa hi na Ixmayeli,+ a n’wana wa Netaniya, na Johanani+ na Jonatani, a vana va Kareya, na Seraya, a n’wana wa Tanhumete, ni vana va Efayi, a muNetofate, na Jezaniya,+ a n’wana wa muMaakate, zvin’we ni vavanuna vabye.
9 Gedhaliya, a n’wana wa Ahikamu, a n’wana wa Xafani, i no hlambanya ka vona ni ka vavanuna vabye, aku: “Mu nga chavi a ku tirela a vaKaldheya. Hanyani lomu tikweni mu tirela a hosi ya Bhabhuloni, zvi ta mu fambela khwatsi.+
10 Mina ndzi ta tshama le Mizpa ndzi mu yimela ka vaKaldheya lava va tota ka hina. Kanilezvi n’wina hlengeletani vhinyo, ni mihandzu ya cimumu, ni mafura, mu zvi hlengeletela lomu ka zvibya zva n’wina, mu tlhela mu tshama lomu madhoropeni lawa mu ma tekileko.”+
11 Vontlhe a vaJudha lava va nga hi le Mowabhi ni le Amoni ni le Edhomi, zvin’we ni lava va nga hi matikweni wontlhe lawa man’wani, va nozwa lezvaku a hosi ya Bhabhuloni yi tsikile a misalela yi tshama le Judha, ni lezvaku yi va yimisele Gedhaliya, a n’wana wa Ahikamu, a n’wana wa Xafani, lezvaku a va fumela.
12 Hikwalaho, a vaJudha vontlhe va no sangula ku wuya hi ka matshamu wontlhe lawa va nga hangalakile vaya ka wona. Va no nghena lomu tikweni ga Judha, vaya ka Gedhaliya, le Mizpa. Va no hlengeleta a ntsengo wa hombe wa vhinyo ni mihandzu ya cimumu.
13 Johanani, a n’wana wa Kareya, ni vontlhe a varangeli va butho lava va nga hi masin’wini, va nota ka Gedhaliya, le Mizpa.
14 Va no mu byela ku: “A wu zvi tivi lezvaku Bhaalisi, a hosi ya vaAmoni,+ i rumile Ixmayeli, a n’wana wa Netaniya, lezvaku a ta ku daya ke?”+ Kanilezvi Gedhaliya, a n’wana wa Ahikamu, a nga kholwangi lezvi va nga wula.
15 Makunu Johanani, a n’wana wa Kareya, i no byela Gedhaliya cihundleni le Mizpa, aku: Ndzi lava ku ya daya Ixmayeli, a n’wana wa Netaniya; i hava a to zvi tiva. I wa ta ku dayela yini, ku hangalaka a vanhu vontlhe va Judha lava va hlengeletanako ka wena ku tlhela ku lova ni misalela ya Judha ke?”
16 Kanilezvi Gedhaliya,+ a n’wana wa Ahikamu, i no byela Johanani, a n’wana wa Kareya, aku: “U nga mahi lezvo, hakuva lezvi u zvi wulako hi Ixmayeli mawunwa.”
