Jeremiya 42:1-22
42 Vontlhe a varangeli va butho, na Johanani,+ a n’wana wa Kareya, na Jezaniya, a n’wana wa Hoxaya, ni vanhu vontlhe, kusukela ka loyi wa mutsongwani kala ka loyi wahombe, va no tshinela
2 ka muphrofeti Jeremiya, vaku: “Zwana cikombelo ca hina ca ku lava ku mahelwa wuxinji, u hi khongelela ka Jehovha, a Nungungulu wa wena, u khongelela misalela yontlhe, hakuva va tsongwani va seleko cikari ka votala+ kota lezvi u zvi wonako.
3 Jehovha, a Nungungulu wa wena, i wa hi byele a ndlela leyi hi faneleko ku famba hi yona ni lezvi hi faneleko ku maha.”
4 Muphrofeti Jeremiya i no va hlamula, aku: “Ndzi zvi zwile, ndzi ta mu khongelela ka Jehovha, a Nungungulu wa n’wina, kota lezvi mu nga kombela. Ni gihi gezu legi Jehovha a to mu hlamula, ndzi ta mu byela. Ndzi nga ta mu fihlela ne ni gezu gin’we.”
5 Va no hlamula Jeremiya, vaku: “Jehovha i wave kustumunyu wa lisine ni wo tsumbeka ka hina, loku hi nga mahi zvontlhe lezvi Jehovha, a Nungungulu wa wena, a to hi leletela hi ku tirisa wena.
6 Kani zvazvinene kani zvakubiha, hi ta ingisa a gezu ga Jehovha, a Nungungulu wa hina, loyi hi ku rumelako kakwe, kasi hi fela ku kateka hi ku ingisa a gezu ga Jehovha, a Nungungulu wa hina.”
7 Andzhako ka 10 wa masiku, a mhaka ya Jehovha yi nota ka Jeremiya.
8 Hikwalaho, i no vitana Johanani, a n’wana wa Kareya, ni vontlhe a varangeli va butho lava va nga hi zvin’we naye, ni vanhu vontlhe, kusukela ka loyi wa mutsongwani kala ka loyi wahombe,+
9 a taku kabye: “Jehovha, a Nungungulu wa Izrayeli, loyi mu ndzi rumileko ka yena kasi ku ya wula cikombelo ca n’wina ca ku lava ku mahelwa wuxinji mahlweni kakwe, i ngalo:
10 ‘Loku mu tshama tikweni legi, ndzi ta mu aka ndzi nga mu hohloli, ndzi ta mu byala ndzi nga mu tsuwuli, hakuva ndzi ta mu zwela wusiwana hi kota ya khombo legi ndzi mu vangeleko.+
11 Mu nga chavi hi kota ya hosi ya Bhabhuloni, leyi mu yi chavako.’+
“‘Mu nga yi chavi’, ku wula Jehovha, ‘hakuva ndzi na n’wina kasi ku mu tlhatlhisa ni ku mu ponisa canjeni ga yona.
12 Ndzi ta mu mahela wuxinji,+ niku yonawu yi ta mu mahela wuxinji, yi mu tlhelisa tikweni ga n’wina.
13 “‘Kanilezvi loku n’wina muku: “Hina hi nga ta tshama tikweni legi!”, mu nga ingisi a gezu ga Jehovha, a Nungungulu wa n’wina,
14 muku: “E! Hina hi taya tikweni ga Gibhite,+ lomu hi to kala hi nga woni a yimpi ne kuzwa kuvhuma ka linanga* kutani ku xaniseka hi ndlala; hi seyo hi to ya hanya kona”,
15 makunu zwanani a mhaka ya Jehovha, n’wina misalela ya Judha. Jehovha wa mabutho, a Nungungulu wa Izrayeli, i ngalo: “Loku mu maha cikanikani ca kuya Gibhite mu ya hanya kona,*
16 a cipadha caleci mu ci chavako ci ta mu kuma kwale tikweni ga Gibhite, ni ndlala yaleyi mu yi chavako yi ta mu landza kala Gibhite, niku mu ta fela kwaseyo.+
17 Vontlhe a vanhu lava va to maha cikanikani vaya Gibhite va ya hanya seyo, va ta dawa hi cipadha, ni ndlala, ni ntungu.* I hava cikari kabye a to pona kutani ku huluka ka khombo legi ndzi to va nehela.”’
18 “Hakuva Jehovha wa mabutho, a Nungungulu wa Izrayeli, i ngalo: ‘A ku khwatsi hi lezvi a zanga ya mina ni khulo ga mina zvi nga chululiwa hehla ka vahanyi va Jerusalema,+ hizvalezvo, a khulo ga mina gi ta chululiwa hehla ka n’winawu loku muya Gibhite; mu tava ciruko, ni nchumu wo tshisa, mu chepetiwa, mu rukatelwa,+ niku mu nga ta ha tshuka mu gi wona kambe a wutshamu legi.’
19 “Jehovha i mu byelile n’wina misalela ya Judha. Mu ngayi Gibhite. Zvi tiveni khwatsi lezvaku ndzi mu tlharihisile nyamutlha
20 lezvaku a cigoho ca n’wina ci ta mu dayisa.* Hakuva mu ndzi rumile ka Jehovha, a Nungungulu wa n’wina, muku: ‘Hi khongelele ka Jehovha, a Nungungulu wa hina, u hi byela zvontlhe lezvi Jehovha, a Nungungulu wa hina, a to wula, hina hi ta zvi maha.+
21 Ndzi mu byelile nyamutlha, kanilezvi mu nga ta ingisa a gezu ga Jehovha, a Nungungulu wa n’wina, kutani ku maha lezvi a nga ndzi ruma ku mu byela.+
22 Hikwalaho, zvi tiveni khwatsi lezvaku mu ta dawa hi cipadha, ni ndlala, ni ntungu ka wutshamu legi mu xuvako ku ya hanya kona.”+
Mitlhamuselo ya lahasi
^ Kutani: “khombela”.
^ Kutani: “mu ya hanya seyo zva cikhatana”.
^ Kutani: “mababyi”.
^ Kutani: “ci ta dayisa a mihefemulo ya n’wina”.
