Jeremiya 43:1-13
43 A cikhati leci Jeremiya a nga mbheta ku byela vanhu vontlhe tontlhe a timhaka leti ta Jehovha, a Nungungulu wabye, a magezu wontlhe lawa Jehovha, a Nungungulu wabye, a nga mu rumile ku va byela,
2 Azariya, a n’wana wa Hoxaya, na Johanani,+ a n’wana wa Kareya, ni vanhu vontlhe va matshandza, va no byela Jeremiya, vaku: “Lezvi u wulako mawunwa! Jehovha, a Nungungulu wa hina, a nga ku rumangi ku ta hi byela ku: ‘Mu ngayi Gibhite mu ya tshama kona.’
3 Kanilezvi Bharuke,+ a n’wana wa Neriya, hi yena a ku kucetelako ku hi vhukela kasi hi nyikelwa canjeni ga vaKaldheya hi dawa kutani hi yisiwa wukhumbini Bhabhuloni.”+
4 Hikwalaho, Johanani, a n’wana wa Kareya, ni vontlhe a varangeli va butho, ni vontlhe vanhu va no tsika ku ingisa gezu ga Jehovha ga lezvaku va tshama tikweni ga Judha.
5 Kanilezvi Johanani, a n’wana wa Kareya, ni vontlhe a varangeli va butho va no teka yontlhe misalela ya Judha, leyi yi nga wuyile hi ka matiko wontlhe lawa yi nga hangalasilwe yiya ka wona kasi yi ta hanya tikweni ga Judha.+
6 Va no teka vavanuna, ni vavasati, ni vanana, ni vanhanyana va hosi, ni vontlhe lava* Nebhuzaradhani,+ a hosana ya vagadhi, a nga va siyile na Gedhaliya,+ a n’wana wa Ahikamu,+ a n’wana wa Xafani,+ zvin’we na muphrofeti Jeremiya na Bharuke, a n’wana wa Neriya.
7 Va noya tikweni ga Gibhite hakuva a va ingisangi a gezu ga Jehovha; va no famba kala va ya chikela Tahpanesi.+
8 A mhaka ya Jehovha yi nota ka Jeremiya le Tahpanesi, yi taku:
9 “Teka maribye ya hombe u ma fihla lomu ka argamasa laha tsendzeleni* wa zvitini, nyangweni ya yindlu ya Faro, le Tahpanesi, mahlweni ka vanhu va ka Judha.
10 Va byele, uku: ‘Jehovha wa mabutho, a Nungungulu wa Izrayeli, i ngalo: “Ndzi ta rumela a nandza ga mina Nebhukadnezare,* a hosi ya Bhabhuloni;+ ndzi ta veka a citshamu cakwe ca wuhosi le hehla ka maribye lawa ndzi ma fihlileko niku i ta gwimba a tenda gakwe ga wuhosi hehla ka wona.+
11 I tata a ta hlasela tiko ga Gibhite.+ Loyi zvi lavako ku a dawa hi ntungu wu dayako, i ta dawa hi ntungu wu dayako. Loyi zvi lavako ku aya wukhumbini, i taya wukhumbini. Loyi zvi lavako ku a dawa hi cipadha, i ta dawa hi cipadha.+
12 Ndzi ta lumekela ndzilo lomu tindlwini* ta vanungungulu va Gibhite,+ niku yena i ta ti hisa a tlhela a va khoma vaya wukhumbini. I ta ti fenengeta hi tiko ga Gibhite, a ku khwatsi hi lezvi a murisi a ti fenengetako hi nguwo yakwe niku i ta huma lomo hi kurula.*
13 I ta khungumulela a mapilari ya Bhet-Xemexe* tikweni ga Gibhite a tlhela a hisa a tiyindlu* ta vanungungulu va Gibhite hi ndzilo.”’”
Mitlhamuselo ya lahasi
^ Kutani: “ni mihefemulo yontlhe leyi”.
^ Kutani: “pátio”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “titempeleni”.
^ Kutani: “na a nga bayisiwangi”.
^ Kutani: “Yindlu (Tempeli) ya Gambo”, ku nga Heliyopolisi.
^ Kutani: “titempeli”.
