Jeremiya 51:1-64
51 Jehovha i ngalo:
“Ndzi ta vhuxa a moya wu lovisakoHehla ka Bhabhuloni+ ni hehla ka vahanyi va le Leb-Kamayi.*
2 Ndzi ta rumela vaheheri Bhabhuloni;Va ta mu hehera, niku a tiko gakwe gi ta sala gi hi phanga.Va ta mu vhukela matlhelweni wontlhe sikwini ga khombo gakwe.+
3 A muphandi wa mipaxa ngha a nga kondli* a wura gakwe.
Ku nga suki a munhu a yima ni cikatawu cakwe ca simbi.
Mu nga ma zweli wusiwana a majaha yakwe.+
Lovisani a butho gakwe gontlhe.
4 Va ta mbambamela tikweni ga vaKaldheya,Na va tlhavilwe maruweni yabye.+
5 Hakuva Izrayeli na Judha a hi tinoni* ta Nungungulu wabye, Jehovha wa mabutho.+
Kanilezvi a tiko* gabye gi tele hi nandzu kuwoneni ka Loyi a Basileko wa Izrayeli.
6 Humani lomu Bhabhuloni mu tsutsuma,Mu ponisa wutomi* ga n’wina.+
Mu nga lovi hi kota ya cigoho cakwe.
Hakuva leci cikhati ca ku Jehovha a ti photela.
O mu tlhelisela lezvi a nga maha.+
7 Bhabhuloni i kopo ya ouro canjeni ga Jehovha;I popisile a misava yontlhe.
A matiko ma nwile a vhinyo yakwe;+Hikwalaho, a matiko ma pepukile.+
8 Bhabhuloni i wile hi citshuketi, a hahlulwa.+
Mu rileleni!+
Mu laveleni bhalsamu ya ku miyeta kubayisa kakwe, kuzvilava i ta hanya.”
9 “Hi zamile a ku hanyisa Bhabhuloni, kanilezvi a nga hanyi.
Mu tsikeni, a hi fambeni, a mun’we ni mun’wani aya tikweni gakwe.+
Hakuva a kulamulwa kakwe ku chikela ni le matilweni;Ku tlakukile kala marefini.+
10 Jehovha i hi nehele kululama.+
Tanani hi ta hlawutela a mitiro ya Jehovha, a Nungungulu wa hina, le Ziyoni.”+
11 “Lotani mipaxa;+ tekani a zvitlhangu* lezvi zva redhonda.
Jehovha i vhuxile a moya wa tihosi ta vaMedhi,+Hakuva i lava ku lovisa Bhabhuloni.
Hakuva loku kuphota ka Jehovha, a photelako a tempeli yakwe.
12 Yimisani a sinya ya cikombiso+ ya ku vhukela a mimuro ya Bhabhuloni.
Engetelani ku wonelela, mu yimisa a varindzeli.
Vekani vanhu va juma.
Hakuva Jehovha i lukile mano.I ta maha lezvi a tsumbisileko ku maha vahanyi va Bhabhuloni.”+
13 “Wena wasati u tshamako hehla ka mati yo tala,+U nga ni titshomba to tala,+A kugumesa ka wena ku chikele, a magumo* ya bhindzu ga wena.+
14 Jehovha wa mabutho i hlambanyile hi wutsumbu* gakwe, aku:‘Ndzi ta ku tata hi vanhu vo talisa ku khwatsi i humbi,Niku va ta kulungela hi kota ya kuhluliwa ka wena.’+
15 Hi yena a nga maha misava hi ntamu wakwe,Loyi a yimisileko a tiko hi wutlhari gakwe+Ni loyi a andlalileko matilo hi kupimisisa kakwe.+
16 Loku a zwata a gezu gakwe,A mati le matilweni mo vhindluka;I maha marefu* ma tlakukela hehla hi le magemeta-musi ya misava.
I hatimisa a tilo* kasi kuna vhula,A tlhela a neha moya hi lomu matshaleni yakwe.+
17 Vontlhe a va pimisi ne a va tivi.Vontlhe a vabethi va tisimbi va ta wisiwa tingana hi kota ya zvifananiso zvi kehlilweko;+
Hakuva a zvifananiso zvakwe zva simbi* mawunwa,Niku a zvi na moya* ndzeni ka zvona.+
18 Zvo kanganyisa ntsena,+ mitiro ya cihlekiso ntsena.
Laha gi to chikela a siku ga kulamulwa ka zvona, zvi ta lova.
19 Loyi a nga Ciavelo ca Jakobe i hambene ni zvilo lezvi,Hakuva hi yena a vangileko a zvilo zvontlhe,Ina, i nhonga ya tshomba yakwe.+
A vito gakwe hi Jehovha wa mabutho.+
20 “U nduko ya mina ya yimpi, a tlhari ga mina ga kulwa,Hakuva ha wena, ndzi ta chindza matiko.
Ha wena, ndzi ta lovisa mifumo.
21 Ha wena, ndzi ta chindza a haxi ni mukhileli wa gona.
Ha wena, ndzi ta chindza a kareta ya yimpi ni mukhileli wa yona.
22 Ha wena, ndzi ta chindza a wanuna ni wasati.
Ha wena, ndzi ta chindza a cikhosana ni n’wanana.
Ha wena, ndzi ta chindza a mufana ni nhanyana.
23 Ha wena, ndzi ta chindza a murisi ni ntlhambi wakwe.
Ha wena, ndzi ta chindza a murimi ni zvifuyo zvakwe.
Ha wena, ndzi ta chindza a vagovhernadhori ni tihosana.
24 Ndzi ta tlhelisela Bhabhuloni ni vahanyi vontlhe va KaldheyaA kubiha kontlhe loku va ku mahileko le Ziyoni mahlweni ka n’wina”,+ ku wula Jehovha.
25 “Ndza ku vhukela,+ wena citsunga ci lovisako”, ku wula Jehovha,“Wena mulovisi wa misava yontlhe.+
Ndzi ta nawuluta a canja ga mina ndzi ku wumbuluta lomu maribyeni uwa lahasi,Ndzi tlhela ndzi ku maha citsunga ci swileko.”
26 “A vanhu va nga ta teka ka wena a ribye ga lisima ga laha khoneni kutani a ribye ga ciseketelo,Hakuva u ta hahlulwa kala kupindzuka”,+ ku wula Jehovha.
27 “Tlakusani a sinya ya cikombiso lomu tikweni.+
Banani a linanga* cikari ka matiko.
Yimisani* a matiko ya ku mu vhukela.
Mu vitaniseleni a mifumo ya Ararate,+ na Mini, na Axkenaze.+
Yimisani musochwa kasi ku khomela vanhu va kulwa naye.
Tisani mahaxi ma ku khwatsi i humbi ya ntamu.
28 Yimisani* a matiko ya ku mu vhukela,A tihosi ta vaMedhi,+ ni vagovhernadhori va kona, ni tontlhe a tihosana ta kona,Ni matiko wontlhe lawa va ma fumelako.
29 A misava yi ta tsekatseka yi rurumela,Hakuva a maalakanyo ya Jehovha xungetano hi Bhabhuloni ma ta tatiseka;I ta hundzula tiko ga Bhabhuloni giva nchumu wo tshisa, ku nga ha tshami munhu.+
30 A masochwa ya Bhabhuloni ma tsikile kulwa.
Ma tshamile lomu makhokholeni yabye.
A ntamu wabye wu mbhelile.+
Me khwatsi vavasati.+
A tiyindlu takwe ti hisilwe hi ndzilo.
A zvikwinyaro zvakwe zvi tshoveletelwe.+
31 A mubiki wa mahungu i tsutsuma a ya tlhangana ni mun’wani,Ni cirun’wa cin’we ci tsutsuma ci ya tlhangana ni cin’wani,Kasi va ya byela a hosi ya Bhabhuloni lezvaku a dhoropa gakwe gi tekilwe hi matlhelo wontlhe,+
32 Lomu va tlhatukako hi kona ku tekilwe,+A zvitatara* zvi hisilwe hi ndzilo,Niku a masochwa ma rurumela hi kuchava.”
33 Hakuva Jehovha wa mabutho, a Nungungulu wa Izrayeli, i ngalo:
“A nhanyana wa Bhabhuloni i fana ni wutshamu ga ku hulela kona timbewu.
Ci chikele a cikhati ca ku mu kandzihetela hi ntamu.
Zvezvanyana a cikhati ca kutshovela ci ta chikela kakwe.”
34 “Nebhukadnezare,* a hosi ya Bhabhuloni, i ndzi khadamulile;+I ndzi hoxele lomu ka pfilupfilu.
I ndzi hoxile lahasi a ku khwatsi ndzi cibya ca phanga.
I ndzi mitile a ku khwatsi i nyoka ya hombe;+I tatile a khwiri gakwe hi zvilo zva mina zva zvinene.
I ndzi hoxile.*
35 A tihanyi leti ti mahilweko ka mina ni mirini wa mina ti wave hehla ka Bhabhuloni!’, ku wula muhanyi wa Ziyoni.+
‘Ni nkhata wa mina wu wave hehla ka vahanyi va Kaldheya!’, ku wula Jerusalema.”
36 Hikwalaho, Jehovha i ngalo:
“Ndzi ta yimela a mhaka ya wena;+Ndzi ta ku photela.+
Ndzi ta pswhisa a bimbi gakwe ni tihlowo takwe.+
37 Bhabhuloni i tava nhulu ya maribye,+Ava wutshamu ga makhanga,+Ava nchumu wo tshisa ni wa kubelwa noti;Ku nga ta ha tshama munhu.+
38 Vontlhe va ta bhonga a ku khwatsi zvinghalana.*
Va ta ngura a ku khwatsi marole ya nghala.”
39 “A cikhati leci a kunavela kabye ku tova ka hombe, ndzi ta va mahela a mubuzo ndzi va popisa,Kasi va tsaka;+Va ta etlela a wurongo ga kala kupindzuka,Legi va to kala va nga ha vhuki kambe ka gona”,+ ku wula Jehovha.
40 “Ndzi ta va daya a ku khwatsi tiyivhu ti yako kudaweni,A ku khwatsi tiyivhu ta vamatsune ni timbuti.”
41 “Zvi mahisile kuyini ku Xexake* a khomiwa!+Zvi mahisile kuyini ku loyi a nga hi wudzundzo ga misava yontlhe a hluliwa!+
Zvi mahisile kuyini ku Bhabhuloni ava nchumu wo tshisa cikari ka matiko!
42 Bhabhuloni i talelwe hi bimbi.
I fenengetilwe hi mavingo* ya gona yo tala.
43 A madhoropa yakwe ma tava nchumu wo tshisa, a tiko ga tora ni ga ciwula,
A tiko legi gi to kala ku tshama munhu ne hambu wa ku hundza hi kona.+
44 Ndzi ta tsayisa Bheli+ le Bhabhuloni,Ndzi mu kavhulisa lezvi a nga mita.+
A matiko ma nga ta ha khitikana maya kakwe,Ni muro wa Bhabhuloni wu tawa.+
45 Humani cikari kakwe, n’wina vanhu va mina!+
Ponisani a wutomi* ga n’wina+ ka zanga yi vhurako ya Jehovha!+
46 Mu nga tsemeki hlanha hambu ku chavisiwa hi mahungu ma to zwala lomu tikweni.
Ka lembe gin’we ku ta chikela a mahungu,Ni ka legi gi to landzela ku ta chikela man’wani mahunguYa tihanyi lomu tikweni ni ya hosi yi vhukelako yin’wani hosi.
47 Hikwalaho, a masiku mata,Laha ndzi to tsayisa a zvifananiso zvi kehlilweko zva Bhabhuloni.
Gontlhe a tiko gakwe gi ta wisiwa tingana,Ni zvirumbi zvakwe zvontlhe zvi ta mbambamela cikari kakwe.+
48 A matilo, ni misava, ni zvontlhe zvi nga ka zvonaZvi ta kulungela hi kutsaka hi kota ya Bhabhuloni,+Hakuva a valovisi va ta mu tela hi n’walungu”,*+ ku wula Jehovha.
49 “Bhabhuloni a nga wisangi a zvirumbi zva Izrayeli basi,+Kanilezvi ni le Bhabhuloni ku wile a zvirumbi zva misava yontlhe.
50 N’wina mu to pona cipadha, tsutsumani, mu nga nyimi!+
Hi le kule, alakanyani Jehovha,Na Jerusalema i wa tshame timbilwini ta n’wina.”+
51 “Hi wisilwe tingana, hakuva hi zwile zviruko.
A tinghohe ta hina ti fenengetilwe hi tingana,Hakuva a vamatiko va dhumele a matshamu yo basa ya yindlu ya Jehovha.”+
52 “Hikwalaho, a masiku mata”, ku wula Jehovha,“Laha ndzi to tsayisa a zvifananiso zvakwe zvi kehlilweko,Niku a tikweni gakwe gontlhe lava va bayisilweko va ta keta.”+
53 “Hambu loku Bhabhuloni o kandziha kala matilweni,+Ni loku o tiyisa a makhokhola yakwe ya hombe,A valovisi lava ndzi to mu rumelela va ta chikela kakwe”, ku wula Jehovha.+
54 “Hi nga zwani! Ku zwala tihuwa ti tako hi Bhabhuloni,+A guwa ga khombo ga hombe gi tako hi tikweni ga vaKaldheya,+
55 Hakuva Jehovha wa lovisa Bhabhuloni,I ta miyeta gezu gakwe ga hombe,Ni mavingo* yabye ma ta dzindza a ku khwatsi i mati yo tala.
A guwa ga gezu gabye gi ta zwiwa.
56 Hakuva a mulovisi i tata Bhabhuloni,+A masochwa yakwe ma ta khomiwa,+A mawura yabye ma ta tshoveletelwa,Hakuva Jehovha i Nungungulu wa kutlhelisela.+
Ina, i ta tlhelisela futsi.+
57 Ndzi ta popisa a tihosana takwe ni titlhari takwe,+Ni vagovhernadhori vakwe, ni vafumeli vakwe, ni masochwa yakwe,Niku va ta etlela a wurongo ga pindzukelwa,Legi va to kala va nga ha vhuki”,+ ku wula Hosi, leyi a vito ga yona ku nga Jehovha wa mabutho.
58 Jehovha wa mabutho i ngalo:
“Hambu lezvi a muro wa Bhabhuloni wu nga anama, wu ta khungumulwa wu ku bhi;+Hambu lezvi a tinyangwa ta kona ti nga tlakuka, ti ta hisiwa hi ndzilo.
A mifumo yi ta tira mahala;A matiko ma ta kulula ma n’watseka mahala, ma gumesa hi ku gisa ndzilo.”+
59 Leyi i mhaka leyi muphrofeti Jeremiya a nga leletela Seraya, a n’wana wa Neriya,+ a n’wana wa Maseya, a cikhati leci a nga famba na Zedhekiya, a hosi ya Judha, a Bhabhuloni, hi lembe ga wumune ga kufuma kakwe; Seraya i wa hi yin’we ya tihosana ta hosi.
60 Jeremiya i no tsala lomu bhukwini a khombo gontlhe legi gi nga lava ku wela Bhabhuloni, tontlhe a timhaka leti ti tsalilweko xungetano hi Bhabhuloni.
61 Jeremiya i no tlhela a byela Seraya, aku: “Laha u to ngha u chikela Bhabhuloni, u sangula ku ku wona, lera a timhaka tontlhe leti hi gezu go tlakuka.
62 Wula, uku: ‘O Jehovha, wena u wulile lezvaku a wutshamu legi gi ta lovisiwa, gi sala gi nga hi na muhanyi, ne munhu hambu cihari, ni lezvaku gi tava rumbi kala kupindzuka.’+
63 Loku u mbhetile ku lera a bhuku legi, gi bohelele a ribye u gi hoxela cikari ka congo wa Eufrate,
64 u gumesa, uku: ‘Hi zvalezvi Bhabhuloni a to rikhisa zvona a nga ha vhuki kambe,+ hi kota ya khombo legi ndzi lavako ku mu nehela; niku va ta rereka.’”+
A timhaka ta Jeremiya ti gumesa laha.
Mitlhamuselo ya lahasi
^ Ko khwatsi i tsalela go fihlala ga Kaldheya”.
^ Hi kukongoma: “a nga kandziheli”.
^ Hi kukongoma: “a va felwangi”.
^ Ku nga tiko ga vaKaldheya.
^ Kutani: “muhefemulo”.
^ Zvi nga maha na zvi wula ku: “tatani a zvikhwama zva mipaxa”.
^ Hi kukongoma: “a lipimo”.
^ Kutani: “muhefemulo”.
^ Kutani: “cikuhe”.
^ Zvi nga maha na zvi wula ku: “I vhulula tinyangwa”.
^ Kutani: “zvifananiso zvabye zvi nyekisilweko”.
^ Kutani: “A zvi hefemuli”.
^ Kutani: “khombela”.
^ Hi kukongoma: “Basisani”.
^ Hi kukongoma: “Basisani”.
^ Kutani: “tingalava ta tihlanga”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “I ndzi hlazvile hi mati”.
^ Kutani: “zvinghalana zva malevhu”.
^ Ko khwatsi i tsalela go fihlala ga Bhabheli (Bhabhuloni).
^ Kutani: “mabyandlati; mavimbi”.
^ Kutani: “mihefemulo”.
^ Kutani: “norte”.
^ Kutani: “mabyandlati; mavimbi”.