Jeremiya 52:1-34
52 Zedhekiya+ i wa hi ni 21 wa malembe a cikhati a nga maha hosi, niku i no fuma 11 wa malembe le Jerusalema. A vito ga mamani wakwe ku wa hi Hamutali,+ a n’wana wa Jeremiya, wa le Libna.
2 I no simama ku maha zvakubiha mahlweni ka Jehovha, a landzela zvontlhe lezvi Jehoyakimu a nga mahile.+
3 A zvilo lezvi zvi mahekile Jerusalema ni Judha hi kota ya zanga ya Jehovha, kala a va hlongola mahlweni kakwe.+ Zedhekiya i no tsika ku ingisa a hosi ya Bhabhuloni.+
4 Hi lembe ga wu 9 ga kufuma ka Zedhekiya, hi hweti ya wu 10, hi siku ga wu 10 ga hweti, Nebhukadnezare,* a hosi ya Bhabhuloni, i nota ni butho gakwe gontlhe a ta vhukela Jerusalema. Va no gi govela va gi dhumela, va aka muro wu gi randzela matlhelo wontlhe.+
5 A dhoropa gi no randzelwa kala ka lembe ga wu 11 ga hosi Zedhekiya.
6 Hi hweti ya wumune, hi siku ga wu 9 ga hweti,+ a ndlala yi wa tshingile nguvhu lomu dhoropeni niku a vanhu va tiko va wa nga hi na zvakuga.+
7 Hi kugumesa, a muro wa dhoropa wu no bhoxiwa, a masochwa wontlhe ma huma lomu dhoropeni ma tsutsuma ni wusiku hi nyangwa yi nga cikari ka makhurisi mambiri kusuhani ni Jardhim ya hosi, a vaKaldheya na va randzela dhoropa; va no simama hi ndlela ya Arabha.+
8 Kanilezvi a butho ga vaKaldheya gi no hlongolisela hosi Zedhekiya,+ va ya mu kuma tivaleni ta Jeriko, niku wontlhe a mabutho yakwe ma no mu tsika ma hangalaka.
9 Makunu va no khoma hosi va yi yisa ka hosi ya Bhabhuloni le Ribla, tikweni ga Hamate, niku i no yi nyika tsayiselelo wa yona.
10 A hosi ya Bhabhuloni yi no daya a vana va Zedhekiya na a zvi wona, yi tlhela yi daya a tihosana tontlhe ta Judha, le Ribla.
11 Andzhako ka lezvo, a hosi ya Bhabhuloni yi no bhoxa a matihlo ya Zedhekiya,+ yi mu boha hi machini ya kobre, yi mu yisa Bhabhuloni yi ya mu vhalela kala ka siku legi a ngafa hi gona.
12 Hi hweti ya wutlhanu, hi siku ga wu 10 ga hweti, gi nga hi lembe ga wu 19 ga hosi Nebhukadnezare,* a hosi ya Bhabhuloni, Nebhuzaradhani, a hosana ya vagadhi, loyi a nga hi nandza ga hosi ya Bhabhuloni, i no nghena Jerusalema.+
13 I no hisa a yindlu ya Jehovha,+ ni yindlu* ya hosi, ni tontlhe a tiyindlu ta Jerusalema, a tlhela a hisa tontlhe a tiyindlu ta hombe.
14 A mimuro leyi yi nga randzele Jerusalema yi no khungumulwa hi butho gontlhe ga vaKaldheya legi gi nga hi ni hosana ya vagadhi.+
15 Nebhuzaradhani, a hosana ya vagadhi, i no khoma a zvisiwana zvo kari ni vanhu lava va nga sele lomu dhoropeni a va yisa wukhumbini. I no khoma ni lava va nga ti nyikele ka hosi ya Bhabhuloni, zvin’we ni vameseri va hombe lava va nga sele.+
16 Kanilezvi Nebhuzaradhani, a hosana ya vagadhi, i no siya vokari va nga hi zvisiwana nguvhu lomu tikweni kasi va rima zvivhina* ni ku maha mitiro ya cikurumeta.+
17 A vaKaldheya va no fayetela a mapilari ya kobre+ ya yindlu ya Jehovha, ni zvikarinyana,+ ni Bimbi ga kobre,+ lezvi zvi nga hi lomu ndlwini ya Jehovha, va rwala a kobre yontlhe va famba nayo Bhabhuloni.+
18 Va no tlhela va teka a mabhaketi, ni mafoxola, ni zvigere zva ku tsema hi zvona a titirisido, ni mingelo,+ ni tikopo,+ ni zvontlhe a zvibya zva kobre zvi nga tirisiwa ntirweni wa tempeli.
19 A hosana ya vagadhi yi no teka a tibasiya,+ ni zvibya zva ku woka hi zvona ndzilo, ni mingelo, ni mabhaketi, ni minenge ya tikandiya,+ ni tikopo, ni mingelo. Zvontlhe zvi wa hi zva ouro ni prata ya yinene.+
20 Xungetano hi mapilari lawa ya mambiri, ni Bimbi, ni 12 wa madhuna ya tihomu ta kobre+ ti nga hi lahasi ka Bimbi, ni zvikarinyana lezvi hosi Solomoni a nga zvi mahele a yindlu ya Jehovha, zvi wa nga koteki ku peza a kobre ya zvibya zvontlhe lezvi hi kutala.
21 Xungetano hi mapilari, a pilari gin’we ni gin’wani gi wa hi ni 18 wa mikono* a kuleha, niku a lingoti la ku pima hi lona la 12 wa mikono li wa ringana ku gi tsondzela khati gin’we;+ a kudziva ka gona ku wa ringana a kuanama ka mune wa titiho,* niku ndzeni ka gona ku wa hi phombori.
22 A hloko ya pilari yi wa hi ya kobre niku a kutlakuka ka hloko ya pilari ku wa ringana ntlhanu wa mikono;+ a tiredhi ni maromã ma nga randzele a hloko ya pilari, zvontlhe zvi wa hi zva kobre. A pilari legi ga wumbiri gonawu gi wa tshamisile zvalezvo, ni maromã ya kona.
23 Ku wa hi ni 96 wa maromã lomu matlhelweni; wontlhe a maromã lawa ma nga randzele a tiredhi ma wa hi 100.+
24 A hosana ya vagadhi yi no khoma kambe na Seraya,+ a hosana ya vapristi, na Zefaniya,+ a mupristi wa wumbiri, ni vagadhi vanharu va tinyangwa.+
25 Lomu dhoropeni, yi no khoma a mun’we wa vatiri va laha wuhosini, loyi a nga hi komandante wa masochwa, ni 7 wa vanghana va hombe va hosi lava va nga kumiwa lomu dhoropeni, zvin’we ni matsalani wa murangeli wa butho, loyi a nga khomela vanhu lomu tikweni kasi vaya yimpini, ni 60 wa vanhu va lomu tikweni lava va nga ha hi kona lomu dhoropeni.
26 Nebhuzaradhani, a hosana ya vagadhi, i no va khoma a va yisa ka hosi ya Bhabhuloni, le Ribla.
27 A hosi ya Bhabhuloni yi no va daya le Ribla,+ tikweni ga Hamate. Hizvalezvo, Judha i no khomiwa tikweni gakwe a yisiwa wukhumbini.+
28 A vanhu lava Nebhukadnezare* a nga va khoma a va yisa wukhumbini hi lembe ga wu 7 va wa hi 3023 wa vaJudha.+
29 Hi lembe ga wu 18 ga Nebhukadnezare,*+ ku khomilwe 832 wa vanhu* le Jerusalema.
30 Hi lembe ga wu 23 ga Nebhukadnezare,* Nebhuzaradhani, a hosana ya vagadhi, i no khoma a 745 wa vaJudha a va yisa wukhumbini.+
A vanhu* vontlhe lava va nga yisiwa wukhumbini va wa hi 4600.
31 Hi lembe ga wu 37 ga wukhumbi ga Jehoyakina,+ a hosi ya Judha, hi hweti ya wu 12, hi siku ga wu 25 ga hweti, hi lembe legi Evhil-Merodhake a nga maha hosi ya Bhabhuloni, i no tlhatlha* Jehoyakina, a hosi ya Judha, a mu humesa lomu paxweni.+
32 I no mu mahela wunene, a tlakusa a citshamu cakwe ca wuhosi ci hundza a zvitshamu zva wuhosi zva tihosi leti tin’wani ti nga hi zvin’we naye le Bhabhuloni.
33 Hikwalaho, Jehoyakina i no tlhatlha a tinguwo takwe ta wubochwa niku contlhe cikhati i waga mahlweni ka hosi, wontlhe a masiku ya kuhanya kakwe.
34 Siku ni siku i waga a zvakuga zvi ngata hi ka hosi ya Bhabhuloni, wontlhe a masiku ya kuhanya kakwe, kala a siku legi a ngafa hi gona.
Mitlhamuselo ya lahasi
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “palácio”.
^ A zvivhina masimu ya tisinya leti ti pswalako mauvha.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “mihefemulo”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “mihefemulo”.
^ Hi kukongoma: “i no tlakusa a hloko ya”.
