Jeremiya 7:1-34
7 Leyi i mhaka ya Jehovha yi ngata ka Jeremiya, yi taku:
2 “Yima laha nyangweni ya yindlu ya Jehovha u huwelela a mhaka leyi, uku: ‘Zwanani a mhaka ya Jehovha, n’wina n’wentlhe vanhu va Judha mu nghenako hi tinyangwa leti kasi ku khizamela Jehovha.
3 Jehovha wa mabutho, a Nungungulu wa Izrayeli, i ngalo: “Lulamisani a tindlela ta n’wina ni mitiro ya n’wina, ndzi ta mu tsika mu tshama ka wutshamu legi.+
4 Mu nga tsumbi a magezu yo kanganyisa, muku: ‘Leyi i* tempeli ya Jehovha, a tempeli ya Jehovha, a tempeli ya Jehovha!’+
5 Hakuva, loku hakunene mu lulamisa a tindlela ta n’wina ni mitiro ya n’wina, ni loku hakunene mu lamula hi kululama a mhaka ya munhu ni muakelani wakwe;+
6 loku mu nga xanisi a valuveli, ni vana vo felwa hi vapswali,* ni tinoni,*+ ni loku mu nga halati a nkhata wo kala nandzu ka wutshamu legi, ni loku mu nga landzeli a van’wani vanungungulu kasi mu ti nehela khombo,+
7 ndzi ta mu tsika mu tshama ka wutshamu legi, tikweni legi ndzi nyikileko a vakokwani va n’wina kala kupindzuka.”’”*
8 “Kanilezvi n’wina mu tsumba a magezu yo kanganyisa.+ Lezvo zvi nga ta mu vhuna nchumu.
9 Mu nga yiva,+ mu daya, mu maha wubhayi, mu hlambanya mawunwa,+ mu maha miphahlo ka* Bhaali,+ mu landzela a vanungungulu mu nga va tiviko,
10 mu gumesa mu ta yima laha mahlweni ka mina, ka yindlu leyi yi vitaniwako hi vito ga mina, muku, ‘hi ta ponisiwa’, hambu lezvi mu mahako a zvilo lezvi zvontlhe zvo nyenyeza ke?
11 A yindlu leyi yi vitaniwako hi vito ga mina yova mhako ya vaphangi mahlweni ka n’wina ke?+ Zvi tiveni lezvaku ndza zvi wona”, ku wula Jehovha.
12 “‘Hikwalaho, fambani wutshan’wini ga mina le Xilo,+ lomu ndzi nga vekile a vito ga mina kusanguleni kasi gi tshama lomo,+ mu ya wona lezvi ndzi zvi mahileko seyo hi kota ya kubiha ka vanhu va mina, a vaIzrayeli.+
13 Kanilezvi mu no simama ku maha a zvilo lezvi zvontlhe’, ku wula Jehovha, ‘hambu lezvi ndzi nga wulawula na n’wina hi kuphindaphinda,* a mu ingisangi.+ Ndzi no simama ku mu vitana kanilezvi a mu hlamulangi.+
14 Hikwalaho, ndzi ta maha ka yindlu leyi yi vitaniwako hi vito ga mina,+ leyi n’wina mu yi tsumbako,+ ni ka wutshamu legi ndzi nyikileko n’wina ni vakokwani va n’wina, zvalezvi ndzi nga maha Xilo.+
15 Ndzi ta mu hlongola mahlweni ka mina, a ku khwatsi hi lezvi ndzi hlongolileko vontlhe a vamakabye va n’wina, vontlhe a vana va Efrayime.’+
16 “Kanilezvi wena u nga va khongeleli a vanhu lava. U nga va rileli, ne u nga khongeli hambu ku ndzi khongotela hi kota yabye,+ hakuva ndzi nga ta ku ingisela.+
17 A wu zvi woni lezvi va mahako lomu madhoropeni ya Judha ni lomu maruweni ya Jerusalema ke?
18 A vana va kona va hlengeletela tihunyi, a vapapayi va kona va dzivela ndzilo, a vasati va kona va vhuva mapa kasi ku maha a tibholu* ta ku maha miphahlo ka Muzindza wa Tilo,*+ niku va chulula a minyikelo ya zvakunwa kasi ku ndzi zangarisa.+
19 ‘Kanilezvi kasi kova mina va ndzi nehelako khombo* ke?’, ku wula Jehovha. ‘A hi vona va ti vangelako khombo ha voce kasi vawa tingana?’+
20 Hikwalaho, Jehovha, a Hosi ya Hombe, i ngalo: ‘A zanga ya mina ni khulo ga mina zvi ta chululiwa hehla ka wutshamu legi,+ ni ka vanhu, ni ka zvihari, ni ka tisinya ta khwati, ni ka mihandzu ya misava; yi ta vhura yi nga timiwi.’+
21 “Jehovha wa mabutho, a Nungungulu wa Izrayeli, i ngalo: ‘Simamani mu engetela a minyikelo ya n’wina ya kuhiswa ya mirumba ka miphahlo yin’wani ya n’wina, muga a nyama ya kona.+
22 Hakuva a siku legi ndzi nga humesa a vakokwani va n’wina tikweni ga Gibhite a ndzi va byelangi kutani ku va laya nchumu xungetano hi minyikelo ya kuhiswa ya mirumba ni miphahlo.+
23 Kanilezvi ndzi no va laya, ndziku: “Ingisani a gezu ga mina, mina ndzi tava Nungungulu wa n’wina, na n’wina mu tava vanhu va mina.+ Fambani tindleleni ta mina tontlhe leti ndzi mu layileko kasi zvi mu fambela khwatsi.”’+
24 Kanilezvi a va ingisangi ne a va dembangi ndleve.+ Wutshan’wini ga lezvo, va no famba manweni* yabye, va ti nonohisa va landzela timbilu tabye to biha;+ va no tlhelela ndzhako va ngayi phambeni,
25 kusukela a siku legi a vakokwani va n’wina va nga huma tikweni ga Gibhite kala nyamutlha.+ Hikwalaho, ndzi no simama ku mu rumelela wontlhe a malandza ya mina, a vaphrofeti, ndzi va rumela siku ni siku, hi kuphindaphinda.*+
26 Kanilezvi va no ala ku ndzi ingisa, va nga dembi a ndleve yabye;+ va no ti nonohisa,* va maha kubiha ko hundza ni ka vakokwani vabye!
27 “U ta wulawula timhaka leti tontlhe kabye,+ kanilezvi va nga ta ku ingisa; u ta va vitana kanilezvi va nga ta ku hlamula.
28 U taku ka vona: ‘A vanhu va tiko legi a va ingisangi a gezu ga Jehovha, a Nungungulu wabye, niku a va vhumelangi ku layiwa. A kutsumbeka ku fuvile niku a ka ha kumbukiwi cikari kabye.’*+
29 “Halula misisi ya wena yi nga tsemiwangiko* u yi hoxa kule; yimbelela a lisimu la cirilo hehla ka zvitsungana zva cisapa hakuva Jehovha i alile tiko legi gi mu zangarisileko niku i ta gi tsika.
30 ‘Hakuva a vanhu va Judha va mahile lezvi zvi bihileko mahlweni ka mina’, ku wula Jehovha. ‘Va vekile a zvifananiso zvabye zvo nyenyeza lomu ndlwini leyi yi vitaniwako hi vito ga mina kasi va yi nyenyezisa.+
31 Va akile a matshamu ma tlakukileko ya Tofete, lawa ma nga Nkoveni wa N’wana wa Hinome,*+ kasi va hisela kona a vafana vabye ni vanhanyana vabye ndzilweni,+ a zvilo zva ku a ndzi va layangi ku maha ne a zvi tshukangi zvi ndzi tela mbilwini ya mina.’*+
32 “‘Hikwalaho, a masiku mata’, ku wula Jehovha, ‘laha a wutshamu legi gi to kala gi nga ha vitaniwi ku Tofete kutani Nkova wa N’wana wa Hinome,* kanilezvi gi to vitaniwa ku Nkova wa Kuhihirita. Va ta lahla zvirumbi le Tofete kala ku nga ha sali wutshamu.+
33 A zvirumbi zva vanhu lava zvi tava zvakuga zva zvinyanyani zva matilo ni zva zvihari zva laha misaveni niku i hava a to zvi hlongola.+
34 Ndzi ta fuvisa a guwa ga kutsaka ni guwa ga kunengela ni gezu ga noivha ni gezu ga noivho+ lomu madhoropeni ya Judha ni lomu maruweni ya Jerusalema, hakuva a tiko gi ta hahluliwa gi maha rumbi.’”+
Mitlhamuselo ya lahasi
^ Hi kukongoma: “Tona i”, na ku wuliwa a tiyindlu tontlhe ta tempeli.
^ Kutani: “vana va nga hiko na vapapayi”.
^ Kutani: “vavasati vo felwa hi vanuna”.
^ Kutani: “kusukela kupindzukeni kala kupindzuka”.
^ Kutani: “mu mu tuvikisela musi wa muphahlo”.
^ Hi kukongoma: “ndzi nga vindzuka ndzi wulawula”.
^ Cikhundla ca nungungulu wa cisati a nga khozelwa hi vaIzrayeli va kudhuka; kuzvilava i nungungulu loyi va nga kari vaku wa vhulula marumbu.
^ Kutani: “zvikhekhetselo”.
^ Kutani: “vhukako; va ndzi zwisako kubayisa”.
^ Kutani: “ka wusungukati”.
^ Hi kukongoma: “siku ni siku ndzi vindzuka ndzi va rumela”.
^ Hi kukongoma: “va no nonohisa a nhamu yabye”.
^ Hi kukongoma: “niku ku tsemilwe non’wini wabye.”
^ Kutani: “misisi yi nyikelweko”.
^ Wona laha ka ku: “Gehena” ka Tlhamuselo wa magezu ya Bhibhiliya.
^ Kutani: “a zvi tshukangi zvi nghena maalakanyweni ya mina”.
^ Wona laha ka ku: “Gehena” ka Tlhamuselo wa magezu ya Bhibhiliya.
