Jeremiya 9:1-26
9 Mayiwako loku a hloko ya mina yi wa hi mati,Ni loku a matihlo ya mina ma wa hi cibuka ca mihloti!+
Ndzi wa ta rila mumu ni wusikuHi kota ya zvirumbi zva vanhu va mina.
2 Mayiwako loku ndzi wa hi ni chacha wa vaendzi lomu ciwuleni!
Ndzi wa ta tsika a vanhu va mina ndziya kule navo,Hakuva vontlhe zvibhayi,+I ntlawa wa vakanganyisi.
3 Va petsa lirimi labye a ku khwatsi i wura.A tiko gi tele hi mawunwa, a ku na kutsumbeka.+
“Va maha wubihi hehla ka wubihi;A va dembi ndleve ka mina”,+ ku wula Jehovha.
4 “N’wentlheni ti woneleni ka muakelani wa n’wina;Mu nga tsumbi hambu makabye wa n’wina.
Hakuva a vamakabye vontlhe vatokometi,+Ni vaakelani vontlhe valumbeti.+
5 A mun’we ni mun’wani i kanganyisa muakelani wakwe;A nga kona a wulawulako lisine.
Va gondzisile a lirimi labye a ku wulawula mawunwa.+
Va ti karata hi ku maha zvakubiha.
6 U hanya cikari ka wukanganyisi.
Hi kota ya wukanganyisi gabye va ala ku ndzi tiva”, ku wula Jehovha.
7 Hikwalaho, Jehovha wa mabutho i ngalo:
“Ndzi ta va nyekisa, ndzi va hlola,+Hakuva cini cin’wani ca ku ndzi nga maha hi nhanyana wa vanhu va mina ke?
8 A lirimi labye i paxa wu dayako, li wulawulako wukanganyisi.
Hi nomu wakwe, a munhu i wulawula kurula ni muakelani wakwe,Kanilezvi hi le ndzeni wa mu xiyelela.”
9 “Xana a ndzi faneli ku va tsayisa hi kota ya zvilo lezvi ke?”, ku wula Jehovha.
“A ndzi* faneli ku ti photela ka tiko go kota legi ke?+
10 Ndzi ta rila, ndziba mikosi hi kota ya zvitsunga.Ndzi ta yimbelela a lisimu la cirilo hi kota ya wuriselo ga lomu ciwuleni,Hakuva gi hisilwe laha kaku a ka ha hundzi munhu hi kona,Ni guwa ga mitlhambi a ga ha zwali.
A zvinyanyani zva tilo ni zvihari zvi tsutsumile; zvi fambile.+
11 Jerusalema ndzi ta mu maha tinhulu ta maribye,+ a wutumbelo ga makhanga.+Ndzi ta hahlula a madhoropa ya Judha ma maha ciwula, ku nga ha tshami munhu.+
12 Himani a tlharihileko kuringana ku a zwisisa zvilo lezvi ke?
A nomu wa Jehovha wu wulawulile na mani kasi a zvi hlawutela?
Hikuyini a tiko gi lovisilweko?
Hikuyini gi hisilweko gi fana ni ciwula,Laha kaku ku nga ha hundzi munhu hi kona?”
13 Jehovha i no hlamula, aku: “Hi kota ya lezvi va tsikileko a nayo* wa mina lowu ndzi wu vekileko mahlweni kabye, ni lezvi va nga kala ku wu landzela ne ku ingisa a gezu ga mina.
14 Kanilezvi va no ti nonohisa va landzela a timbilu tabye,+ va tlhela va landzela zvifananiso zva Bhaali, kota lezvi va gondzisilweko hi vapapayi vabye.+
15 Hikwalaho, Jehovha wa mabutho, a Nungungulu wa Izrayeli, i ngalo: ‘A vanhu lava ndzi ta va gisa a sinya ya kubava, ndzi va nwisa a mati ya vhenene.+
16 Ndzi ta va hangalasa cikari ka matiko lawa vona ni vapapayi vabye va nga kala va nga ma tivi;+ ndzi ta va rumelela cipadha kala ndzi va lovisa va ku bhi.’+
17 Jehovha wa mabutho i ngalo:‘Pimisisani khwatsi.
Vitanisani a vavasati lava va yimbelelako a tisimu ta cirilo,+Mu vitanisa a vavasati lava va zvi kotako khwatsi kurila,
18 Va hatlisa vata va ta hi bela nkosi,Kasi a matihlo ya hina ma khulunga mihloti,Ni tikohe ta hina ti xililika mati.+
19 Hakuva ku zwele a guwa ga cirilo hi le Ziyoni:+
“Lezvi hi nga hahluliswa zvona!
A hi kukula ka tingana ta hina!
Hakuva hi tsikile tiko; vona va hahlulile ni miti ya hina.”+
20 N’wina vavasati, zwanani a mhaka ya Jehovha.
A tindleve ta n’wina ti wa amukele a mhaka ya nomu wakwe.
Gondzisani a vanhanyana va n’wina a nkosi lowu,Mu gondzisana a lisimu leli la cirilo.+
21 Hakuva a kufa ku nomile ku nghena hi majanela ya hina;Ku nghenile lomu tikhokholeni* ta hina ti tiyisilweko khwatsiKasi ku daya vanana lomu maruweni,Ni majaha lomu maprasa.*+
22 Wula uku: ‘Jehovha i ngalo:“A zvirumbi zva vanhu zvi ta mbambamela a ku fana ni citromu lomu masin’wini,A ku fana ni minumbi ya timbewu ta ha hi ku tsemiwako ti salako le ndzhako ka mutshoveli.A nga kona a to zvi hlengeleta.”’”+
23 Jehovha i ngalo:
“Loyi a tlharihileko a nga ti kulisi hi wutlhari gakwe;+Loyi a nga ni ntamu a nga ti kulisi hi ntamu wakwe;Loyi a ganyileko a nga ti kulisi hi titshomba takwe.”+
24 “Kanilezvi loyi a ti kulisako i wa ti kulise hi mhaka leyi yaku:
I na ni kupimisisa niku wa ndzi tiva+Lezvaku hi mina Jehovha, loyi a kombisako lirandzo li nga mbheliko, ni nongameto, ni kululama laha misaveni,+Hakuva ndzi tsakisiwa hi zvilo lezvi”,+ ku wula Jehovha.
25 “A masiku mata”, ku wula Jehovha, “laha ndzi to lamula vontlhe lava va mahileko wukwera* kuveni hi lisine va ha hi makhuna:+
26 Ku nga Gibhite,+ na Judha,+ na Edhomi,+ ni vaAmoni,+ na Mowabhi,+ ni vontlhe lava va hanyako lomu ciwuleni,+ va tsemileko misisi lomu mareveni; hakuva a matiko wontlhe a ma mahangi wukwera,* ni yindlu yontlhe ya Izrayeli a yi mahangi wukwera mbilwini ya yona.”+
Mitlhamuselo ya lahasi
^ Kutani: “A muhefemulo wa mina a wu”.
^ Kutani: “gondziselelo”.
^ Kutani: “torres”.
^ Kutani: “tlulisilweko ngoma”.
^ Kutani: “tlulisiwangi ngoma”.
