Joba 11:1-20
11 Zofare,+ a muNaamate, i no hlamula, aku:
2 “Xana a magezu lawa wontlhe ma ta simamaku nga hlamuliwi,Kutani a ku wulawula nguvhu* zvi ta maha munhu ava ni razawu?
3 A kuwulawula ka wena ka hava ku ta miyeta vanhu ke?
Ina i hava a to ku kawuka hi kota ya magezu ya wena ya ku poyila?+
4 Hakuva u ngalo: ‘A gondziselelo ya mina yi basile,+Minawu ndzi basile mahlweni ya wena.’+
5 Mayiwako loku Nungungulu i wo wulawulaA vhulula nomu wakwe ka wena!+
6 I wa ta ku vhululela mifihlakalo ya wutlhari,Hakuva a wutlhari gi na ni matshamela yo tsalangana.
Makunu u wa ta zvi tiva lezvaku Nungungulu wa rivala zvihoxo zvokari zva wena.
7 U nga zvi kota ku pola zvilo zvi etileko zva NungunguluKutani ku pola zvilo zvontlhe xungetano hi* Loyi wa Ntamu Wontlhe ke?
8 Gi tlakukile ku hundza tilo. Cini ca ku u nga maha?
Gi etile ku hundza Cilahla.* U nga tiva yini?
9 Gi lehile ku hundza misavaNi kuanama ku hundza bimbi.
10 Loku a hundza a khoma munhu a famba naye tribhunali,Himani wa ku a nga mu betela?
11 Hakuva wa zvi tiva loku a vanhu va kanganyisa.
A cikhati leci a wonako zvakubiha a nga ta chela kota ke?
12 Kanilezvi a munhu wa hloko yo tala mati a ngo zvi zwisisaNtsena loku a mbongola ya khwati yo pswala munhu.*
13 Mayiwako loku u wo longisela mbilu ya wenaU tlakusa mandla ya wena kakwe!
14 Loku a canja ga wena gi maha zvahava, zvi hoxe kule,U nga tsiki a kungalulami ku tshama matendeni ya wena,
15 Makunu u ta tlakusa a nghohe ya wena na u ngawi tingana;U ta yima u tiya, na u nga chavi nchumu.
16 Hakuva u ta rivala hlomulo wa wena;U wu alakanya ntsena kota mati ma khulungileko ma hundza.
17 A wutomi ga wena gi ta wonekela ku hundza dhina;Hambu a munyama wa gona wu ta ku khwatsi i mixo.
18 U nga ta chava nchumu, hakuva ku na ni kutsumba,U ta cuwuka lomu matlhelweni, u etlela kuruleni.
19 U ta etlela na ku nga hi na wa ku ku dzukisa,Niku a vanhu vo tala va ta kombela kuva ni thomo ka wena.
20 Kanilezvi a mahlo ya vakubiha ma ta timeka;Va nga ta kuma ko tsutsumela kona,Ni kutsumba kabye ku tava kufa ntsena.”+
Mitlhamuselo ya lahasi
^ Kutani: “kutikulisa”.
^ Kutani: “ku kuma magumo ya”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “loku a mbongola ya khwati yo pswaliwa na yi hi munhu”.
