Joba 12:1-25
12 Joba i no hlamula, aku:
2 “Kunene hi n’wina mu tivako zvontlhe,*Ni wutlhari gi tafa na n’wina!
3 Kanilezvi minawu ndzi na ni kupimisisa.*
A ndzi mutsongwani ka n’wina.
Himani a kalako a nga zvi tivi lezvo ke?
4 Ndzi mahile cihlekiso ka vanghana va mina,+Mina loyi ndzi vitanako Nungungulu na ndzi lava hlamulo.+
A munhu wa kululama ni wo kala nandzu i mahile cihlekiso.
5 A munhu a nga karatekiko hi nchumu i chepeta khombo,Na a alakanya lezvaku gi ta wela ntsena lava a mikondzo yabye yi retemukako.*
6 A matenda ya makhamba ma kuruleni,+Ni lava va vhukako Nungungulu va hlayisekile,+Lava va welelako nungungulu wabye mandleni yabye.
7 Kanilezvi wutisa a zvihari, zvi ta ku gondzisa;Ni zvinyanyani zva tilo, zvi ta ku byela.
8 Kutani cuwukisisa* misava, yi ta ku gondzisa;Ni tinjhanjhi ta bimbi ti ta ku hlawutela.
9 Hi cihi ka zvontlhe lezvi ci kalako ci nga zvi tiviLezvaku i canja ga Jehovha gi mahileko lezvi?
10 A wutomi ga zvontlhe zvi hanyako gi* canjeni gakweZvin’we ni moya* wa vanhu vontlhe.*+
11 A ndleve a yi ringi magezuA ku khwatsi hi lezvi a lirimi li ringako zvakuga ke?+
12 Xana a wutlhari a gi kumiwi ka vakhosaheleko,+Ni wutomi go leha a gi nehi kuzwisisa ke?
13 A wutlhari ni ntamu zvi na yena;+I na ni wusungukati ni kuzwisisa.+
14 Loku a khungumula nchumu, a ci nge aketwi;+Leci yena a vhalako, a ci vhululwi hi munhu.
15 Loku a vhala mati, zvontlhe zvo woma;+Loku a ma rumela, ma fenengeta misava.+
16 A ntamu ni wutlhari zvi na yena;+Loyi a hambukako ni loyi a hambukisako va canjeni gakwe;
17 I maha masungukati ma famba hi thaba,*Ni valamuli i va maha zvipumbu.+
18 I susa ntamu wa tihosi,+A ti boha zviwunu hi machini.
19 I maha vapristi va famba hi thaba,*+A wisa lava va yimisilweko va tiya zvikhundleni zva wuhosi;+
20 I ma tsona magezu a masungukati yo tsumbekaA va tekela kupima a vanhu va kulileko;*
21 I chulula kuchepetwa hehla ka tihosana,+A rera lava va ntamu;*
22 I tsetsula zvilo zvi etileko hi munyameni,+A neha kuwonekela hehla ka munyama wo tshisa;
23 I tsika matiko ma ti nyika ntamu kasi a ma lovisa;A kulisa matiko kasi a ma yisa wukhumbini.
24 I va susela kupimisisa* a varangeli va vanhuA va maha va pepetseka ciwuleni co kala ndlela.+
25 Va phiphitela munyameni,+ lomu ku nga hiko na kuwonekela;I va maha va pepetseka a ku khwatsi vanhu va popilweko.+
Mitlhamuselo ya lahasi
^ Hi kukongoma: “hi n’wina mu nga vanhu”.
^ Hi kukongoma: “mbilu”.
^ Kutani: “yi nga tiyangiko”.
^ Zvi nga maha na zvi wula ku: “wulawula ka”.
^ Kutani: “A muhefemulo wa vontlhe va hanyako wu”.
^ Kutani: “kuhefemula”.
^ Hi kukongoma: “nyama ya vanhu vontlhe”.
^ Kutani: “bakata”.
^ Kutani: “bakata”.
^ Kutani: “A ma tekela kupima a madhota”.
^ Hi kukongoma: “nyeseta libhandi la lava va ntamu”.
^ Hi kukongoma: “mbilu”.