Joba 15:1-35
15 Elifaze,+ a muTemane, i no hlamula, aku:
2 “A munhu a tlharihileko a nga hlamula hi magezu ma nga vhuniko nchumu,*Kutani a nga tata khwiri gakwe hi moya wa cikobani* ke?
3 A ku hlamula hi magezu yo kala ku vhuna nchumu a zvi sizi,Ni kuwulawula koce a ku na bhindzu.
4 Hakuva wena u mbheta ntamu a kuchava Nungungulu,U chepeta a kuehleketa hi Nungungulu.
5 Hakuva a cigoho ca wena ci gondzisa a nomu wa wena,*Niku u hlawula a magezu ya kukhohlisa.
6 A nomu wa wena hi wona wu ku konako, a hi mina;A minomu ya wena yi nyika a wukustumunyu ga ku ku vhukela.+
7 Kova wena munhu wo sangula ku pswaliwa,Kutani u no pswaliwa a zvitsunga na zvi nga seva kona ke?
8 Xana wo ingisela a mabhulo ya cihundla ya Nungungulu,Kutani kova wena wece u nga ni wutlhari ke?
9 Cini u ci tivako, leci hina hi nga ci tiviko?+
Cini u ci zwisisako, leci hina hi nga ci zwisisiko ke?
10 Cikari ka hina ku na ni lava va wuvhu ni vakhosaheleko,+A vanhu va nga tinhondzo nguvhu ka papayi wa wena.
11 Xana a ku chavelelwa hi Nungungulu a zvi ku eneli,Hambu a magezu ya lirandzo lawa u khongotelwako hi wona ke?
12 Hikuyini a mbilu ya wena yi ti nyikako matshandza?Kona hikuyini a mahlo ya wena ma ngangamelako hi zanga ke?
13 Hakuva u hundzulile a moya wa wena wu vhukela Nungungulu,U tsika magezu yo khwatsi hi lawo ma huma non’wini wa wena.
14 Cini munhu wa ku wafa ko kala ava loyi a hlazvekileko,Kutani munhu a pswalilweko hi wasati, ko kala ava wo lulama ke?+
15 Phela a nga va tsumbi a vobasa vakwe,Ne hambu matilo a ma basangi mahlweni yakwe.+
16 A ndza ha wuli hi munhu loyi a nga cinyenyeko ni mukanganyisi,+Loyi a nwako a kungalulami a ku khwatsi i mati!
17 Ndzi ta ku byela zvokari; ndzi ingisele!
Ndzi ta ku hlawutela lezvi ndzi zvi wonileko,
18 Lezvi a vanhu vo tlhariha va zvi hlawuteleko, kota lezvi va zvi kumileko ka vapapayi vabye,+A zvilo lezvi va nga zvi fihlangiko.
19 A tiko gi nyikilwe vona voce,A ku na wamatiko a hundzileko hi cikari kabye.
20 A munhu wa kubiha wa xaniswa wontlhe masiku yakwe,Ka malembe wontlhe lawa ma hlayiselweko a munhu wa xapi.
21 A guwa go tshisa gi tindleveni takwe;+Cikhatini ca kurula, i vhukelwa hi vaphangi.
22 A nga kholwi lezvaku i ta pona ka munyama;+A cipadha ci mu lavelele.
23 Wa ndzulandzula na a lavetela zvakuga,* aku: ‘Zvi kwihi?’
Wa zvi tiva khwatsi lezvaku a siku ga munyama gi kwalaha nyongeni.
24 A kukarateka ni hlomulo zva mu rurumelisa hi kuchava;Zvita hehla kakwe a ku khwatsi i hosi yi longileko a ku dhumela.
25 Hakuva i tlakusa canja gakwe a vhukela NungunguluA tlhela a zama ku phikiza* Loyi wa Ntamu Wontlhe;
26 I ti nonohisa nhamu a tsutsuma aya Kakwe,Na a hi ni citlhangu cakwe co dziva ni co tiya;
27 A nghohe yakwe yi fenengetilwe hi mafura,Ni tinyonga takwe ti tele hi mafura;
28 I tshama madhoropeni ma to loviswa,Ni tindlwini ti to kala ku tshama munhu,Leti ti to maha tinhulu ta maribye.
29 A nga ta ganya, niku a tshomba yakwe yi nga ta talelana,Ne hambu a titshomba takwe ti nga ta andza laha misaveni.
30 A nga ta pona ka munyama;A langavi gi ta womisa a hluke gakwe,*A lova hi kubuvheta ka nomu wa Nungungulu.*+
31 A nga faneli ku hambuka ne ku tsumba zvilo zvi nga vhuniko nchumu,Hakuva lezvi zvi nga vhuniko nchumu zvi tava nchachazelo wakwe;
32 Lezvi zvi ta humelela a siku gakwe na gi nga se chikela,Ni madhavi yakwe cima ma nga ta hluka.+
33 I ta fana ni vhina* lowu wu hurumukelako mauvha ya wona ya mambisi,Ni olivha lowu wu tlhatlhekako a zvitsangi zva wona.
34 Hakuva a hlengeletano ya lava va nga kholwiko ka Nungungulu* i ngon’wa,+Ni ndzilo wu ta mita matenda ya lava va xavelelwako.
35 Va xura nyimba ya kukarateka, va pswala zvakubiha,Ni makhwiri yabye ma pswala kukanganyisa.”
Mitlhamuselo ya lahasi
^ Kutani: “hi wutivi ga phanga”.
^ Kutani: “moya wa mutsuwuka-gambo”.
^ Kutani: “a cigoho ca wena ci yima ni lezvi u wulako”.
^ Hi kukongoma: “pawa”.
^ Kutani: “zama ku tseramisana ni”.
^ Ku nga kutsumba ka kuhanyiswa.
^ Hi kukongoma: “hi kubuvheta ka nomu wakwe”.
^ A vhina i sinya leyi yi pswalako mauvha.
^ Kutani: “ya vadhuki”.
