Joba 2:1-13
2 Andzhako ka lezvo, ku no chikela siku legi a vana va Nungungulu wa lisine*+ va nga ya ti wonekelisa mahlweni ka Jehovha;+ Sathani yenawu i no nghena cikari kabye kasi ku ti wonekelisa mahlweni ka Jehovha.+
2 Makunu Jehovha i no wutisa Sathani, aku: “Uta hi kwihi?” Sathani i no hlamula Jehovha, aku: “Ndzi wo ndzulandzula misaveni ni ku fambafamba ka yona.”+
3 Jehovha i no byela Sathani, aku: “U gi wonile* nandza ga mina Joba ke? I hava wo fana naye laha misaveni. Munhu wo lulama ni wo tsumbeka,*+ a chavako Nungungulu, a potsa zvakubiha. Wa ha khomile zvi tiya kutsumbekeni kakwe,+ hambu lezvi u zamako ku ndzi kucetela ku ndzi mu vhukela,+ ndzi mu lovisa* na ku nga hi na cigelo.”
4 Kanilezvi Sathani i no hlamula Jehovha, aku: “Hlonge hi hlonge. A munhu i ta nyikela zvontlhe a nga nazvo hi kota ya wutomi* gakwe.
5 Kanilezvi, hi nga nawuluta canja ga wena uba marambu yakwe ni nyama yakwe, hakunene yena i ta ku rukatela nghoheni ya wena.”+
6 Jehovha i no byela Sathani, aku: “I canjeni ga wena! Ntsena lezvaku u nga teki wutomi* gakwe!”
7 Hikwalaho, Sathani i no suka mahlweni* ka Jehovha a yaba Joba hi zvidlayi zvo bayisa,+ kusukela lahasi ka mikondzo yakwe kala ka tshavatshava ga hloko yakwe.
8 Makunu Joba i no teka a cirengele ca wumba a ti halela hi cona niku i wa tshama lomu khumeni.+
9 Hi kugumesa, a sati wakwe i no mu byela lezvi: “Wa ha simama ku khoma zvi tiya kutsumbekeni ka wena ke? Rukatela Nungungulu, ufa!”
10 Kanilezvi i te ngalo kakwe: “U wulawulisa ku khwatsi u mun’we wa vavasati va nga hiko na kupimisisa. Hi ta amukela ntsena lezvi zva zvinene hi ka Nungungulu wa lisine hi nga amukeli kambe ni lezvi zvo biha ke?”+ Ka zvontlhe lezvi, Joba a nga wonhangi hi nomu wakwe.+
11 Laha a vanghana vanharu va Joba — Elifaze,+ a muTemane; na Bhildhadhe,+ a muXuhi;+ na Zofare,+ a muNaamate — va ngazwa xungetano hi makhombo lawa ma nga mu wela, a mun’we ni mun’wani wabye i nota hi wutshan’wini gakwe hakuva va wa mahile makungo ya ku tlhangana kasi va ya tangalisa Joba ni ku mu chavelela.
12 A cikhati leci va nga mu wona hi le kule, a va mu tivangi. Va no sangula ku rila hi gezu ga hombe, va handzula tinguwo tabye va tlhela va paletela ntshuri wuya hehla ni tihlokweni tabye.+
13 Hi kulandzela, va no tshama lahasi zvin’we naye a 7 wa masiku ni 7 wa wusiku. I hava a nga mu byela gezu hakuva va wonile lezvaku i wazwa kubayisa ka hombe.+
Mitlhamuselo ya lahasi
^ Legi i vingu ga ciHebheru gi wulako tingilozi.
^ Hi kukongoma: “vekile a mbilu ya wena ka”.
^ Kutani: “a nga hiko na nandzu ni wa kululama.”
^ Hi kukongoma: “mita”.
^ Kutani: “muhefemulo”.
^ Kutani: “muhefemulo”.
^ Hi kukongoma: “nghoheni”.
