Joba 31:1-40
31 “Ndzi mahile civhumelwano ni matihlo ya mina.+
Hikwalaho, ndzi wa ta mu cuwukela yini a nhwana* laha ka kuza ndzi mu navela ke?+
2 Makunu ci wa tava cihi a ciavelo ca mina ka Nungungulu le hehla?Kona yi wa tava yihi a tshomba ya mina ka Loyi wa Ntamu Wontlhe kwale hehla?
3 Xana a khombo a gi rindzeli mugohiNi hlomulo a wu rindzeli lava va mahako zvahava ke?+
4 Ina a nga ti woni a tindlela ta mina+Ni ku hlayela wontlhe a mazambo ya mina ke?
5 Ndzi no tshuka ndzi famba hi mawunwa* ke?
Xana a nkondzo wa mina wu no tsutsumela kukhohliseni?+
6 Nungungulu i wa ndzi peze hi cikalo co lulama;+I ta ku wona a kutsumbeka ka mina.+
7 Loku a mazambo ya mina ma hambukile ndleleni+Kutani loku a mbilu ya mina yi landzele matihlo ya mina+Kutani loku a mandla ya mina ma nyenyezisilwe,
8 Makunu ngha ndzi byala, zvi giwa hi mun’wani,+Ni lezvi ndzi byalako zvi wa tsuwuliwe.*
9 Loku a mbilu ya mina yi xengilwe hi wasati+Ni loku ndzi tshamile ndzi cuwukisela+ a nyangwa ya muakelani wa mina,
10 Makunu a sati wa mina i wa gaye tindzhoho a gayela mun’wani wanuna,Ni van’wani vavanuna va wa hlengele naye masango.*+
11 Hakuva lawo ma wa tava mahanyela ya tingana,A cigoho ci ringanako ku tsayiswa hi valamuli.+
12 Lezvo zvi wa tava ndzilo lowu wu hisako kala wu lovisa,+Wu gako pfuno wa mina wontlhe kala timitswini.
13 Loku ndzi ma alele kululama a malandza ya mina ya cinuna kutani ya cisatiA cikhati leci va nga hi ni cikhalo* ka mina,
14 Ndzi ta kuyini a cikhati leci Nungungulu a to suka a yima?
Ndzi ta mu hlamula yini a cikhati leci a to ndzi xuxisa?+
15 Loyi a ndzi mahileko khwirini a hi yaloyi a nga va mahawu ke?+
A hi yaloyi wa mun’we a nga hi wumba na hi nga se pswaliwa* ke?+
16 Loku ndzi alile ku nyika zvisiwana lezvi zvi ngazvi lava+Kutani ndzi xukuvalisile* matihlo ya noni;+
17 Loku ndzi gile ciavelo ca mina ca zvakuga ndzoceNdzi nga aveli a vana vo felwa hi vapswali;+
18 (Hakuva kusukela wusweni ga mina, ndzi wundlile a n’wana wo felwa hi vapswali a ku khwatsi ndzova papayi wakwe,Niku kusukela wun’wananeni* ndza vhuna noni.)
19 Loku ndzi wonile munhu na a lova hi ku vhumala tinguwoKutani cisiwana ci nga hiko ni ca ku fenengela;+
20 Loku a* nga ndzi katekisangi+Laha a nga ti kufumeta hi woya ga tiyivhu ta mina;
21 Loku ndzi mu tlakusele cibhakela a n’wana wo felwa hi vapswali+A cikhati leci a nga lava ku ndzi mu vhuna laha nyangweni ya dhoropa;+
22 Makunu a woko ga mina* gi wa hapuke laha katleni,Ni woko ga mina gi wa tshoveke* hi laha ka cisungunu.
23 Hakuva ndzi wa chava a khombo gi tako hi ka Nungungulu,Niku ndzi wa nga ta tiya ku yima mahlweni ka wudzundzo gakwe.
24 Loku ndzi tsumbile ouroKutani ku byela ouro ya yinene, ndziku: ‘Wena u wuchavelo ga mina!’+
25 Loku ku hi ku ndzi wa tsakiswa hi kuva ciganyi+Hi kota ya lezvi ndzi hlengeleteleko a titshomba to tala;+
26 Loku ndzi wonile a gambo* na gi phatimaKutani hweti na yi famba kungangameleni ka yona,+
27 A mbilu ya mina yi xengiwa cihundleni,Ni nomu wa mina wu pswopswa canja ga mina hi ku zvi khozela;+
28 Makunu leco ci wa tava cigoho ci ringanako ku tsayiswa hi valamuli,Hakuva na ndzi kanetile a Nungungulu wa lisine le hehla.
29 Xana ndzi tshukile ndzi tsaka hi kuloviswa ka nala wa mina+Kutani ku bhuma hi lezvi a welweko hi zvakubiha ke?
30 Cima a ndzi se tsika nomu wa mina wu wonhaHi ku wula ciruko ndzi kombela lezvaku afa.+
31 A vanhu va lomu tendeni ga mina, a va wulangi vaku:‘Himani a nga kumako munhu wo kala a nga xurangi hi zvakuga zvakwe* ke?’+
32 A ku na mumbe munhu* a nga tshama lahandle ni wusiku;+Ndzi no vhulula tinyangwa ta mina ndzi vhululela a muendzi.
33 Xana ndzi tshukile ndzi zama ku phutsela zvihambunyeto zva mina, a ku khwatsi hi lezvi a van’wani va mahako,+Hi ku fihla a cigoho ca mina lomu phaketini ga nguwo ya mina ke?
34 Ina ndzi tshukile ndzi chava citshungu,Kutani ku dzukiswa hi kuchepeta ka yin’wani mingango,Laha ko kala ndzi miyela ndzi tlhela ndzi chava ku huma lahandle ke?
35 O, loku ku wo khwatsi ndzo kuma wo ndzi ingisela!+
Ndzi wa ta sinara lahasi ka magezu ya mina.
Ngha Loyi wa Ntamu Wontlhe a ndzi hlamula!+
Loku ku wo khwatsi a mulumbeti wa mina i tsalile a zvilumbeto zva kona laha ka phepha!
36 Ndzi wa ta zvi pinga makatleni ya mina,Ndzi tlhela ndzi zvi boha a ku khwatsi cidlodlo* hlokweni ya mina.
37 Ndzi wa ta ya ti hlamulela kakwe hi kota ya wontlhe mazambo lawa ndzi bileko;Ndzi wa ta mu tshinelela cihundleni, a ku khwatsi ndzi hosana.
38 Loku a simu ga mina gi rilile gi ndzi vhukelaNi loku a misele ya gona yontlhe yi rilile;
39 Loku ndzi gile mihandzu ya gona mahala,+Kutani loku ndzi mahile a venyi va gona va kayakaya;+
40 Makunu gi wa ndzi milisele mimizwa wutshan’wini ga trigoNi byanyi go nuha wutshan’wini ga sevhadha.”
A magezu ya Joba ma gumesa laha.
Mitlhamuselo ya lahasi
^ Kutani: “virgem”.
^ Zvi nga maha na zvi wula ku: “ni vanhu va mawunwa”.
^ Kutani: “Ni vana va mina va wa tsuwuliwe”.
^ Hi kukongoma: “Ni van’wani vavanuna va wa khizame hehla kakwe”.
^ Kutani: “mhaka”.
^ Hi kukongoma: “khwirini”.
^ Hi kukongoma: “firimelisile”.
^ Hi kukongoma: “kusukela khwirini ga mamani”.
^ Hi kukongoma: “a ciwunu cakwe ci”.
^ Kutani: “a ciphanga ca mina”.
^ Kutani: “sukuruke; tlumuke”.
^ Hi kukongoma: “kuwoninga”.
^ Hi kukongoma: “hi nyama yakwe”.
^ Kutani: “muluveli”.
^ Kutani: “korowa”.
