Joba 33:1-33
33 “Kanilezvi zvezvi, wena Joba, zwana magezu ya mina;Ingisela zvontlhe lezvi ndzi wulako.
2 Demba ndleve! Ndzi lava ku vhulula nomu wa mina;A lirimi la mina li ta wulawula.
3 A magezu ya mina ma huwelela a kululama ka mbilu ya mina,+Ni minomu ya mina yi wulawula a lisine la lezvi ndzi zvi tivako.
4 Ndzi mahilwe hi moya wa Nungungulu,+Ni kuhefemula ka Loyi wa Ntamu Wontlhe ku ndzi mahile ndzi hanya.+
5 Loku u zvi kota ndzi hlamule;Wula a magezu ya wena ya kutiyimela mahlweni ka mina; ti longisele.
6 Mahlweni ka Nungungulu ndza fana na wena;Minawu ndzi mahilwe hi wumba.+
7 Hikwalaho, u nga ndzi chavi u rurumela,Ni lezvi ndzi to ku byela zvi nga ku bindzeli nguvhu.
8 Kanilezvi u wulawulile tindleveni ta mina,Ina, ndzi simamile kuzwa magezu lawa yaku:
9 ‘Ndzi basile, a ndzi na cihambunyeto;+Ndzi hlazvekile, a ndzi na cigoho.+
10 Kanilezvi Nungungulu i kuma zvigelo zva ku ndzi vhukela;I ndzi wona kota nala wakwe.+
11 I fasa mikondzo ya mina hi makhotso;I hlolisisa a tindlela ta mina tontlhe.’+
12 Kanilezvi a wu na razawu ya ku wula lezvi, hikwalaho, ndzi ta ku hlamula:
Nungungulu wa hombe nguvhu ku hundza a munhu wa ku wafa.+
13 Hikuyini u khalako hi Yena?+
Xana hi lezvi a nga kala ku hlamula a magezu ya wena wontlhe ke?+
14 Hakuva Nungungulu i wulawula khati gin’we, a wulawula ga wumbiri,Kanilezvi i hava a mu ingiselako
15 Lomu norweni, ka muwoniso wa wusiku,+A cikhati leci a vanhu va etleleko wurongo ga hombe,Laha va etleleko mibhedhini yabye.
16 I vhulula a tindleve tabye+A nameka a* gondziselelo yakwe kabye,
17 Kasi a jikisa munhu ka zvakubiha+Ni ku vhikela munhu ka matshandza.+
18 Nungungulu i ponisa a muhefemulo* wakwe nkeleni*+Ni wutomi gakwe lezvaku gi nga lovi hi cipadha.
19 A munhu wa kawukiwa kambe hi kubayisa na a hi mubhedhini wakweNi kupandza ka marambu yakwe ku nga hundziko,
20 Laha ka kuza ni miri* wakwe wu nyenya pawa,A tlhela a tsukula ni zvakuga zva zvinene.+
21 A nyama yakwe ya mbhela,Ni marambu yakwe ma nga fihlele makunu ma sele kubaseni.*
22 A muhefemulo* wakwe wu tshinela nkeleni,*Ni wutomi gakwe gi tshinela ka lava va dayako.
23 Loku vo mu rumelela cirun’wa,*A muyimeli mun’we cikari ka 1000,Kasi ku ya byela munhu lezvi zvi lulamileko,
24 Nungungulu i ta mu mahela wuxinji, aku:‘Mu tlhatlhise kasi a nga releli nkeleni!*+
Hakuva ndzi kumile mutlhatlhisi!+
25 A nyama yakwe yi wa tlhele yiva yiswa* a ku hundza ni ya n’wanana;+I wa tlhelele masikwini ya ntamu wa wuswa gakwe.’+
26 I ta khongotela Nungungulu,+ yena a mu vhumela,I ta wona nghohe yakwe na a kulungela hi kutsaka,Na Yena i ta tlhelisela a kululama Kakwe ka munhu wa ku wafa.
27 A munhu loye i ta yimbelela ka vanhu, aku:‘Ndzi wonhile,+ ndzi hambunyeta nongameto,Kanilezvi a ndzi kumangi lezvi zvi nga ndzi ringana.*
28 I tlhatlhisile a muhefemulo* wa mina kasi wu nga releli nkeleni,*+Ni wutomi ga mina gi ta wona kuwonekela.’
29 Hakunene Nungungulu i maha a zvilo lezvi zvontlheMakhati mambiri, manharu, na a mahela munhu,
30 Kasi a mu humesa* nkeleni,*A fela ku woningelwa hi kuwonekela ka wutomi.+
31 Demba ndleve Joba! Ndzi ingisele!
Miyela uku hwi, ndzi simama ku wulawula.
32 Loku u hi ni ca ku wula, ndzi hlamule.
Wulawula hakuva ndzi lava ku ku komba lezvaku u lulamile.
33 Loku u nga hi na ca ku wula, ndzi ingisele;Miyela uku hwi, ndzi ku gondzisa wutlhari.”
Mitlhamuselo ya lahasi
^ Hi kukongoma: “vekela cifungo ka”.
^ Kutani: “wutomi”.
^ Kutani: “cilahleni”.
^ Hi kukongoma: “wutomi”.
^ Kutani: “ma te tlandlala”.
^ Kutani: “wutomi”.
^ Kutani: “cilahleni”.
^ Kutani: “ngilozi”.
^ Kutani: “cilahleni”.
^ Kutani: “yi hanya khwatsi”.
^ Zvi nga maha na zvi wula ku: “a zvi ndzi sizangi nchumu”.
^ Kutani: “wutomi”.
^ Kutani: “cilahleni”.
^ Kutani: “Kasi a humesa a muhefemulo wakwe”.
^ Kutani: “cilahleni”.
