Joba 40:1-24
40 Jehovha i no simama ku hlamula Joba, aku:
2 “Xana loyi a solasolako i fanele ku kanetisana ni Loyi wa Ntamu Wontlhe ke?+
Loyi a lavako ku kawuka Nungungulu i wa hlamule.”+
3 Joba i no hlamula Jehovha, aku ngalo:
4 “A ndzi wa nchumu.+
Cini ndzi to ku hlamula?
Ndza vhala a nomu wa mina hi canja ga mina.+
5 Ndzi wulawulile khati gin’we, kanilezvi ndzi nga ta ha hlamula kambe;Ndzi wulawulile kumbiri, kanilezvi ndzi nga ta ha wula nchumu.”
6 Makunu Jehovha i no hlamula Joba hi lomu ka mheho, aku:+
7 “Ti longisele kota wanuna;Ndzi ta ku wutisa, wena u ndzi tlhamusela.+
8 Xana u ta kanakanela a kululama ka mina?
U ta ndzi kona na u fela ku kuma razawu ke?+
9 Ina u na ni woko ga ntamu go fana ni ga Nungungulu wa lisine,+Kutani a gezu ga wena gi nga dzindza a ku khwatsi hi legi gakwe ke?+
10 Ti sasekise hi wukosi ni wukulu;Ti bohise wudzundzo ni kungangamela.
11 Tsika a zanga ya wena;Cuwuka a vamatshandza vontlhe, u va tsongahata.
12 Cuwuka vontlhe lava va ti kulisako, u va koramisa,U sila vakubiha matshan’wini yabye.
13 Fihla vontlhe lomu ntshurini;Boha tinghohe tabye wutshan’wini go fihlala,
14 Andzhako ka lezvo, hambu mina ndzi wa ta kholwa ka wena*Lezvaku a canja ga wena ga cinene gi nga ku ponisa.
15 Hi nga cuwuka a vhuwu,* leyi ndzi yi mahileko a ku khwatsi hi wena.
Yiga byanyi a ku fana ni dhuna ga homu.
16 Hi nga cuwuka a ntamu wu nga tinyongeni ta yonaNi ntamu wu nga ka misiha ya khwiri ga yona!
17 Yi tiyisa a mudhoza* wa yona a ku khwatsi i sedhare;A misiha ya mathanga ya yona yi lukene.
18 A marambu ya yona me khwatsi mipuva ya kobre;A zviro zva yona zvo khwatsi tisimbi ti bethilweko.
19 Hi yona yo sangula ka tixaka ta yona cikari ka lezvi Nungungulu a zvi mahileko;A Mumahi wa yona hi yena yece a tiyako ku yi tshinelela ni cipadha cakwe.
20 A zvakuga zva yona zvi huma hi lomu zvitsungeni,Lomu zvontlhe a zvihari zva khwati zvi hlakanako kona.
21 Yi etlela lomu hasi ka matewu,*Ndzhutini wa majeka* ya lomu madhakeni.
22 A matewu* ma yi fenengeta hi ndzhuti wa wona,Ni tisinya ta lomu nkoveni ta yi randzela.
23 Loku a congo wu vhindluka, a yi chavi.
A yi chavi nchumu hambu loku a mati ya Jordhani+ mata non’wini wa yona hi ntamu.
24 I kona wa ku a nga yi phasa na yi zvi wona,Kutani ku yi bhoxa mukhalo nhovhini ya yona ke?
Mitlhamuselo ya lahasi
^ Kutani: “hi kona ndzi to ku dzundza”.
^ Hi ciHebheru i Bhehemote.
^ Kutani: “ncila; suluthu”.
^ Kutani: “zvitsekele”.
^ Kutani: “papiro”.
^ Kutani: “zvitsekele”.
