Joba 5:1-27
5 “Makunu vitana! Ina i kona a to ku hlamula?
Himani cikari ka vobasa loyi u to tsutsumela ka yena ke?
2 Hakuva a civiti ci ta daya a cipumbu,Ni matshoho ma ta dayisa loyi wo kala ku tlhariha.
3 Ndzi wonile cipumbu na ci zima timitsu,Kanilezvi hi citshuketi a wutshamu legi ci hanyako ka gona ga rukatelwa.
4 A vana va cona va kule ni kuvhikelwa,Va siliwa nyangweni ya dhoropa+ na va nga hi na mulamuleli.
5 A wa ndlala iga lezvi a cipumbu ci tshovelako,Hambu loku a zvi teka cikari ka mimizwa,Ni titshomba tabye ta phasiwa.
6 Hakuva a hlomulo a wu humi hi lomu ntshurini,Ni khombo a gi baleki hi lahasi.
7 Hakuva a munhu i pswalelwa makhombo,A ku khwatsi tihlahli ti balekako tiya hehla.
8 Kanilezvi loku ku wa hi mina, ndzi wa ta hlota Nungungulu,Ndzi yisa a mhaka ya mina ka Nungungulu,
9 Loyi a mahako a zvilo zva hombe zvaku a zvi na ku tiviwa,A zvilo zvo hlamalisa zva tsandza-vahlayi.
10 Wa nisa vhula laha misaveniA rumela mati hehla ka masimu.
11 Wa tlakusa a munhu wa nyalidede,A tlakusa loyi a rerekileko a mu yisa kuhanyisweni.
12 Wa tsandzekisa a makungo ya lava vo tlhariha,Kasi a mitiro ya mandla yabye yi nga humeleli.
13 I phasa titlhari manweni ya tona,+Kasi a makungo ya lava vo tlhariha ma tsandzekiswa.
14 Va khon’wa hi munyama na gi hi hlikanhi,Va famba hi kuphiphitela a ku khwatsi gova wusiku.
15 Wa ponisa ka cipadha ca nomu wabye,A ponisa cisiwana canjeni ga loyi wa ntamu,
16 Kasi loyi wa nyalidede ava ni kutsumba,Kanilezvi a nomu wu nga lulamangiko wa vhaliwa.
17 Wa tsaka a munhu loyi a kawukiwako hi Nungungulu;Hikwalaho, u nga ali a kulaya ka Loyi wa Ntamu Wontlhe!
18 Hakuva wa bayisa, kanilezvi wa tlhela a bhandicha cilondza;Wa tshova, kanilezvi a mawoko yakwe ma hanyisa.
19 I ta ku ponisa ka 6 wa makhombo,Hambu legi ga wu 7 gi nga ta ku bayisa.
20 I ta ku tlhatlhisa kufeni cikhatini ca ndlala,Ni ntan’wini wa cipadha cikhatini ca yimpi.
21 U ta vhikelwa ka kukwapa ka lirimi,+U nga ta chava kuhahlula loku kuta.
22 U ta hleka a kulovisa ni ndlala,Niku u nga ta chava a zvivandza zva laha misaveni.
23 Hakuva a maribye ya lomu masin’wini ma nga ta ku bayisa,*Ni zvivandza zva khwati zvi tava ni kurula na wena.
24 U ta zvi tiva lezvaku a tenda ga wena gi kuruleni,*Niku ci hava u to ci vhumala loku u hlola a wuriselo ga wena.
25 U ta tsaka hi kuva ni vana vo tala,Niku a vazukulu va wena va ta tala a ku khwatsi i byanyi ga laha misaveni.
26 U taya cilahleni na wa ha tiyile,A ku fana ni tihlanga ta timbewu ti hlengeletilweko hi nguva ya tona.
27 Phela hi hlolile a mhaka leyi, yi tshamisile zvalezvi.
Ingisa u yi amukela.”
Mitlhamuselo ya lahasi
^ Kutani: “ma tava ni civhumelwano (kuzwanana) na wena”.
^ Kutani: “vhikelekile”.
