Hi kutsala ka Johani 10:1-42
10 “Ndza tiyisisa ka n’wina, ndziku: Loyi a nga ngheniko lomu rangeni ga tiyivhu hi laha livatini kanilezvi a noma a nghena hi kun’wani, i khamba ni muphangi.+
2 Kanilezvi loyi a nghenako hi laha livatini hi yena a nga murisi wa tiyivhu.+
3 A murindzeli wa nyangwa wa mu vhululela,+ niku a tiyivhu ta ingisa a gezu gakwe.+ Wa ti vitana hi mavito ya tona a ti humesa lahandle.
4 Loku a humesile tontlhe tiyivhu takwe lahandle, i ranga phambeni, tona ti mu landzela hakuva ta gi tiva a gezu gakwe.
5 Ti nga ta tshuka ti landzela mumbe munhu, kanilezvi ti ta mu tsutsuma, hakuva a ti gi tivi a gezu ga mumbe munhu.”
6 Jesu i no va hlawutela a mufananiso lowu kanilezvi a va zvi zwisisangi lezvi a nga kari a va byela.
7 Hikwalaho, Jesu i no engeta, aku: “Ndza tiyisisa ka n’wina, ndziku: Mina ndzi livati la tiyivhu.+
8 Vontlhe lava va ti wulako ku hi mina, lavo makhamba ni vaphangi; ni tiyivhu a ti va ingisi.
9 Mina ndzi livati; ni wihi a nghenako hi laha ka mina i ta poniswa. I ta nghena ni ku huma, a kuma wuriselo.+
10 A khamba gi tela ku ta yiva ni ku daya ni ku hohlota basi.+ Mina ndzi tile kasi a tiyivhu ti fela ku kuma wutomi, ti gi kuma hi kumbheleleko.
11 Mina ndzi murisi wa munene;+ a murisi wa munene i nyikela a wutomi* gakwe hi kota ya tiyivhu.+
12 A citiri, leci ci nga hiko murisi, leci a tiyivhu ti nga hiko ta cona, loku ci wona a hlolwa na gita co tsika tiyivhu ci tsutsuma — a hlolwa gi khoma tiyivhu gi tlhela gi ti hangalasa —
13 hakuva citiri, a ci na mhaka ni tiyivhu.
14 Mina ndzi murisi wa munene. Ndza ti tiva a tiyivhu ta mina, niku tonawu ta ndzi tiva,+
15 a ku khwatsi hi lezvi Papayi a ndzi tivako, minawu ndzi tiva Papayi.+ Ndza nyikela a wutomi* ga mina hi kota ya tiyivhu.+
16 “Ndzi na ni tiyivhu tin’wani to kala ti nga hi ta ranga legi;+ tonawu ndzi fanele ku ti neha, ti ta ingisa a gezu ga mina tiva ntlhambi wun’we wu nga ni murisi mun’we.+
17 Papayi wa ndzi randza+ hakuva ndza nyikela wutomi* ga mina+ kasi ndzi fela ku tlhela ndzi gi amukela.
18 I hava a nga ni ntamu wa ku gi teka ka mina, kanilezvi ndza gi nyikela hi kuzvirandza. Ndzi na ni ntamu wa ku gi nyikela, ni ntamu wa ku tlhela ndzi gi amukela.+ Ndzi amukele a cileletelo leci hi ka Papayi wa mina.”
19 Ku nova ni kuhambana kambe cikari ka vaJudha+ hi kota ya magezu lawa.
20 A kutala ka vona va waku: “Inaloyi i na ni dhimoni niku wa hlanya. Hikuyini mu mu ingiselako?”
21 A van’wani va waku: “A magezu lawa a hi ya munhu wa dhimoni. A dhimoni gi nga zvi kota ku vhulula matihlo ya zvikhumu?”
22 Ka cikhati leco, ku nova ni Mubuzo wa Kunyikela le Jerusalema. Yi wa hi nguva ya cirami,
23 niku Jesu i wa kari a famba lomu tempeleni Ligumbagumbeni la Solomoni.+
24 A vaJudha va no mu randzela, vaku kakwe: “Kala rini na wa ha hi jikajikisela?* Loku u hi wena Kristu tekela ku hi byela zviku dlunya.”
25 Jesu i no va hlamula, aku: “Ndzi mu byelile, kanilezvi a mu kholwi. A mitiro leyi ndzi mahako hi vito ga Papayi wa mina ya ndzi kustumunyela.+
26 Kanilezvi a mu kholwi hakuva a mu tiyivhu ta mina.+
27 A tiyivhu ta mina ta ingisa a gezu ga mina; ndza ti tiva niku ta ndzi landzela.+
28 Ndza ti nyika wutomi ga pindzukelwa;+ ti nga ta tshuka ti loviswa niku a nga kona a to ti wutla mandleni ya mina.+
29 Lezvi Papayi wa mina a ndzi nyikileko zva hombe a ku hundza zvontlhe zvilo zvin’wani, a nga kona a nga ni ntamu wa ku zvi wutla mandleni ya Papayi.+
30 Mina na Papayi hi mun’we.”*+
31 A vaJudha va no tlhela va rola maribye kasi ku mu gandla hi wona.
32 Jesu aku kabye: “Ndzi mu kombile mitiro yo tala ya yinene yi tako hi ka Papayi. Mu lava ku ndzi gandla hi kota ya ntiro wihi wa kona?”
33 A vaJudha va no mu hlamula, vaku: “A hi lavi ku ku gandla hi kota ya mitiro ya yinene, kanilezvi hi lezvi u nga rukatela.+ Hakuva hambu lezvi u nga munhu, u ti maha nungungulu.”
34 Jesu i no va hlamula, aku: “Kasi a zvi tsaliwangi lomu Nayweni wa n’wina lezvaku: ‘Ndzi ngalo: “N’wina mu vanungungulu”’?+
35 Loku Nungungulu a va wula ‘vanungungulu’+ lava va koniwako hi mhaka yakwe kasi lezvo a mitsalo a yi ciciwi,
36 mu wulisa kuyini ka mina, loyi Papayi a ndzi basisileko a tlhela a ndzi rumela tikweni, muku: ‘Wena wa rukatela’, hi lezvi ndzi ngaku: ‘Ndzi N’wana wa Nungungulu’?+
37 Loku ku hi lezvaku a ndzi mahi a mitiro ya Papayi, mu nga kholwi ka mina.
38 Kanilezvi loku ndzi yi maha, hambu lezvi mu nga kholwiko ka mina, kholwani ka mitiro+ kasi mu zvi tiva ni ku kholwa lezvaku Papayi i zvin’we na mina ni lezvaku mina ndzi zvin’we na Papayi.”+
39 Hikwalaho, va no zama ku mu khoma kambe, kanilezvi i no huluka mandleni yabye.
40 I no famba kambe le tlhatuko wa Jordhani a ya tshama laha Johani a nga bhabhatisa kona kusanguleni.+
41 Ku nota vanhu vo tala kakwe, va taku: “Johani a nga mahangi ne ciwoniso cin’we, kanilezvi zvontlhe lezvi Johani a nga wula hi wanuna loyi lisine.”+
42 A votala va nga hi laho va no kholwa kakwe.
Mitlhamuselo ya lahasi
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
^ Kutani: “na wa ha jikajikisela a mihefemulo ya hina”.
^ Kutani: “hi zvin’we”.