Hi kutsala ka Johani 11:1-57
11 Makunu a wanuna wo kari a vitaniwako ku hi Lazaru i wa babya; i wa hi wa le Bhetaniya, cidhoropaneni ca Mariya ni makabye wakwe Marta.+
2 Mariya loyi hi yaloyi a nga chulula mafura yo nuhela hehla ka Hosi a tlhela a sula mikondzo ya Hosi hi misisi yakwe;+ Lazaru loyi a nga kari a babya i wa hi makabye wakwe.
3 Hikwalaho, a vamakabye vakwe va no rumela gezu kakwe, vaku: “Hosi, loyi u mu randzako wa babya.”
4 A cikhati leci Jesu a ngazwa lezvo, i te ngalo: “A wubabyi legi a gi yisi kufeni, kanilezvi gi yisa kudzundzweni ka Nungungulu+ kasi a N’wana wa Nungungulu a fela ku dzundziwa hi kota ya gona.”
5 Jesu i wa randza Marta, ni makabye wakwe, na Lazaru.
6 Hambu lezvi a nga zwile lezvaku Lazaru wa babya, i no tshama masiku mambiri laha a nga hi kona.
7 Andzhako ka lezvo, i no byela vapizani, aku: “A hi fambeni kambe Judhiya.”
8 A vapizani vaku kakwe: “Rabi,+ a hi kale a vanhu va le Judhiya va nga lava ku ku gandla hi maribye.+ Wa ha lava kuya seyo kambe?”
9 Jesu i no hlamula, aku: “A siku a gi na 12 wa tihora ta kuwonekela ke?+ Loku a munhu a famba ni mumu a nga ti gumuli hi nchumu, hakuva wa wona a kuwonekela ka tiko legi.
10 Kanilezvi loku a munhu a famba ni wusiku wa ti gumula, hakuva a nga na kuwonekela.”
11 Andzhako ka ku wula timhaka leti, i no engeta, aku: “Lazaru a munghana wa hina i etlele,+ kanilezvi ndziya leyo ndzi ya mu vhuxa.”
12 A vapizani vaku kakwe: “Hosi, loku a no etlela i ta kalamuka.”
13 Jesu i wa wulawula hi kufa ka Lazaru, kanilezvi vona va wa alakanya lezvaku i wula ku etlela wurongo.
14 Hikwalaho, Jesu i no va byela zviku dlunya, aku: “Lazaru i file,+
15 niku hi kota ya n’wina ndza tsaka hi lezvi ndzi nga hi hava seyo, kasi mu fela ku kholwa. Hambulezvo, a hi fambeni kakwe.”
16 Tomasi, loyi a nga vitaniwa ku i Hahla,* i no byela vapizani-kulobye, aku: “Hinawu a hi fambeni kasi hi yafa naye.”+
17 Loku Jesu a chikele, i no kuma lezvaku ku wa hundza a mune wa masiku Lazaru na a lahlilwe.
18 A tiko ga Bhetaniya gi wa hi kusuhani ni Jerusalema, ka pfhuka wa cipimo ca tikilometro tinharu.*
19 A vaJudha vo tala va wa tile ka Marta na Mariya kasi ku ta va chavelela hi kota ya makabye wabye.
20 A cikhati leci Marta a ngazwa lezvaku Jesu wata, i no mu khinga; kanilezvi Mariya+ i no sala laha kaya.
21 Marta i no byela Jesu, aku: “Hosi, loku u wa hi kona laha, a makabye wa mina na a nga fangi.
22 Kanilezvi hambu zvezvi ndza zvi tiva lezvaku ni cihi leci u ci kombelako ka Nungungulu, Nungungulu i ta ku nyika.”
23 Jesu aku kakwe: “A makabye wa wena i ta vhuka.”
24 Marta aku kakwe: “Ndza zvi tiva lezvaku i ta vhuka hi siku go gumesa kuvhukeni ka vafileko.”+
25 Jesu aku kakwe: “Mina ndzi kuvhuka ni wutomi.+ Loyi a kombisako kukholwa ka mina, hambu loku afa, i ta vhuka a hanya;
26 niku ni wihi loyi a hanyako na a kombisa kukholwa ka mina a nga ta tshuka afa.+ Wa kholwa lezvo ke?”
27 Yena aku kakwe: “Ina Hosi, ndza kholwa lezvaku hi wena Kristu, a N’wana wa Nungungulu, loyi a nga wa tata tikweni.”
28 Loku Marta a wulile lezvo, i no ya vitana Mariya a makabye wakwe hi le cihundleni, aku: “Mugondzisi+ i chikele, wa ku vitana.”
29 Laha a ngazwa lezvo, i no suka hi kuhatlisa aya kakwe.
30 Jesu i wa nga se nghena lomu cidhoropaneni, kanilezvi i wa ha hi laha a nga kumana kona na Marta.
31 A cikhati leci a vaJudha lava va nga tshamile na Mariya va mu singata va nga mu wona na a suka hi kuhatlisa a huma, va no mu landza na va alakanya lezvaku iya cilahleni+ a ya rilela kona.
32 Loku Mariya a chikele laha Jesu a nga hi kona, a mu wona, i nowa mikondzweni yakwe, aku: “Hosi, loku u wa hi kona laha, a makabye wa mina na a nga fangi.”
33 Laha Jesu a nga mu wona na a rila, a wona ni vaJudha lava va nga tile naye na va rilawu, i no keta moyeni,* a karateka.
34 Aku: “Mu mu vekile kwihi?” Vaku kakwe: “Hosi, tana u ta ku wona.”
35 Jesu a rila.+
36 Laha a vaJudha va nga wona lezvo, va te: “Hi nga wonani lezvi a nga mu randzisa zvona!”
37 Kanilezvi a vokari cikari kabye va te: “A wanuna loyi a nga vhulula matihlo ya cikhumu,+ na a nga zvi kotangi a ku vhalela Lazaru lezvaku a ngafi ke?”
38 Andzhako ka loku Jesu a ketile kambe moyeni, i noya cilahleni. A cilahla ca kona ci wa hi mhako yi nga vhalilwe hi ribye.
39 Jesu aku: “Susani ribye.” Marta, a makabye wa matsuva, i te ngalo kakwe: “Hosi, makunu wa nuha hakuva mune wa masiku na a file.”
40 Jesu aku kakwe: “A ndzi ku byelangi lezvaku loku u kholwa u ta wona a ntamu wa Nungungulu?”+
41 Hikwalaho, va no susa ribye. Jesu i no tlakusa matihlo yakwe a cuwuka tilweni,+ aku: “Papayi, ndza ku bonga hi lezvi u nga ndzizwa.
42 Kunene, ndza zvi tiva lezvaku wa ndzizwa contlhe cikhati; kanilezvi ndzi wula lezvi hi kota ya citshungu leci ci yimileko laha, kasi ci kholwa lezvaku hi wena u ndzi rumileko.”+
43 Laha a nga wulile timhaka leti, i no tlakusa gezu, aku: “Lazaru, huma!”+
44 Loyi a nga file i no huma na a tsondzelwe mikondzo ni mandla hi zvitarapo, ni nghohe yakwe na yi fenengetilwe hi nguwo. Jesu aku kabye: “Mu tlhatlheni mu mu tsika a famba.”
45 Hikwalaho, a vaJudha vo tala lava va nga tile ka Mariya ni lava va nga wona lezvi Jesu a nga maha, va no kholwa kakwe,+
46 kanilezvi a vokari cikari kabye va noya ka vaFarisi va ya va hlawutela lezvi Jesu a nga mahile.
47 Hikwalaho, a vapristi lava va tihosana ni vaFarisi va no tlhanganisa a Tribhunali ya Hombe, vaku: “Hi ta kuyini lezvi a wanuna loyi a mahako zviwoniso zvo tala?+
48 Loku hi mu tsika, vontlhe va ta kholwa kakwe, ni vaRoma va tata va ta teka a wutshamu* ga hina ni tiko ga hina.”
49 Kanilezvi a mun’we wabye, ku nga Kayafasi,+ loyi a nga hi mupristi wa hombe ka lembe lego, i te ngalo kabye: “N’wina a mu tivi nchumu.
50 Kasi a mu zvi zwisisi ku zvi ta vhuna n’wina lezvaku a munhu mun’we a fela vanhu a ku hundza ku a tiko gontlhe gi lovisiwa?”
51 Hambulezvo, a nga no halahala a wula timhaka leti, kanilezvi kota lezvi a nga hi mupristi wa hombe ka lembe lego, i no phrofeta lezvaku Jesu i wa ta fela tiko,
52 na ku nga hi tiko goce kanilezvi ni ku hlengeletela ka ntlawa wun’we a vana va Nungungulu va hangalakileko.
53 Kusukela ka siku lego va no xuxa cikungo ca ku mu daya.
54 Hikwalaho, Jesu i wa nga ha fambi kubaseni cikari ka vaJudha, kanilezvi i no suka laho aya ka wutshamu gi gamekeneko ni ciwula, dhoropeni ga Efrayime,+ a ya tshama laho ni vapizani.
55 Makunu a Phasika+ ga vaJudha gi wa hi kusuhani; a vanhu vo tala va ngata hi le handle ka dhoropa va no kandziha vaya Jerusalema va ya ti basisa hi kuya hi Nayo, a Phasika na gi nga se sangula.
56 Va wa kari va lavetela Jesu, va wutisana na va yimile lomu tempeleni, vaku: “Mu zvi wonisa kuyini? Mu alakanya ku a nga tata mubuzweni?”
57 Kanilezvi a vapristi lava va tihosana ni vaFarisi va wa layile lezvaku loku a wokari a ku tiva lomu Jesu a nga kona, i wa va byele kasi va fela ku ya mu khoma.
