Hi kutsala ka Johani 13:1-38
13 Kota lezvi a nga zvi tiva na wu nga se chikela a mubuzo wa Phasika lezvaku ci chikele a cikhati cakwe+ ca kuva a suka tikweni legi aya ka Papayi,+ Jesu, na a randzile lava va nga vakwe va nga hi tikweni, i no va randza kala magumo.+
2 Laha va nga kari va lalela, Dhiyabho i wa sina a nghenisile mbilwini ya Judhasi Iskariyoti,+ n’wana wa Simoni, a maalakanyo ya ku mu tokometa.+
3 Makunu Jesu na a zvi tiva lezvaku Papayi i vekile zvilo zvontlhe mandleni yakwe ni lezvaku i tile hi ka Nungungulu niku i waya ka Nungungulu,+
4 i no suka laha kugeni a tlhatlha a bhaji gakwe, a teka thahula a boha ciwunwini cakwe.+
5 Andzhako ka lezvo, i no chela mati lomu ka basiya a sangula ku va hlambisa mikondzo a vapizani a gumesa a yi sula hi thahula legi a nga bohile ciwunwini.
6 I no chikela ka Simoni Pedro. Pedro aku kakwe: “Hosi, u lava ku ndzi hlambisa mikondzo?”
7 Jesu i no mu hlamula, aku: “Lezvi ndzi mahako u nga ta zvi zwisisa zvezvi, kanilezvi u ta zvi zwisisa andzhako ka zvilo lezvi.”
8 Pedro aku kakwe: “U nga ta tshuka u ndzi hlambisa mikondzo.” Jesu i no mu hlamula, aku: “Loku ndzi nga ku hlambisi,+ a wu na ciavelo na mina.”
9 Simoni Pedro aku kakwe: “Hosi, u nga ndzi hlambisi mikondzo yoce, kanilezvi ndzi hlambise ni mandla ni hloko.”
10 Jesu aku kakwe: “Loyi a nga hlamba i basile a mbhelela, a ka ha laveki ku a hlamba zvin’wani zviro, saseka mikondzo yoce. N’wina mu basile, kanilezvi a hi n’wina n’wentlhe.”
11 Hakuva i wa mu tiva loyi a nga kari a mu tokometa.+ Hi cona ci nga mu maha, aku: “A hi n’wina n’wentlhe mu basileko.”
12 Laha makunu a nga mbhetile ku va hlambisa mikondzo a tlhela a boha bhaji gakwe, i noya a ya tshama kambe mezeni, aku kabye: “Ma zvi tiva ku zvi wula yini lezvi ndzi mu maheleko ke?
13 N’wina mu ndzi vitana ku ‘Mugondzisi’ ni ku ‘Hosi’; mu wula zvona hakuva zvi tano.+
14 Hikwalaho, loku mina, ndzi nga Hosi ni Mugondzisi, ndzi mu hlambisile mikondzo,+ n’winawu hlambisanani* mikondzo.+
15 Hakuva ndzi mu nyikile cikombiso, kasi na n’winawu mu fela ku maha kota lezvi ndzi mahileko ka n’wina.+
16 Ndza tiyisa ka n’wina, ndziku: A nandza a hi ga hombe ku hundza a hosi ya gona, hambu a cirun’wa a hi ca hombe a ku hundza loyi a ci rumileko.
17 Loku mu tiva a timhaka leti, ma tsaka loku mu ti maha.+
18 A ndzi wulawuli hi n’wina n’wentlhe; ndza va tiva lava ndzi va hlawulileko. Kanilezvi zvive tano kasi wu fela ku tatiseka a mutsalo lowu wu nge ngalo:+ ‘Loyi a ngaga pawa ya mina, i ndzi jikele.’*+
19 Kusukela lezvi, ndza mu byela na zvi nga se maheka, kasi ku a cikhati leci zvi to maheka mu fela ku kholwa lezvaku hi mina yena.+
20 Ndza tiyisa ka n’wina, ndziku: Ni wihi a amukelako loyi ndzi mu rumileko i amukela na minawu,+ ni loyi a ndzi amukelako i amukela ni Loyi a ndzi rumileko.”+
21 Andzhako ka ku wula timhaka leti, Jesu i no karateka moyeni, a kustumunya, aku: “Ndza tiyisa ka n’wina, ndziku: A mun’we wa n’wina i ta ndzi tokometa.”+
22 A vapizani va no sangula ku cuwukana, na va nga zvi tivi ku i wula mani.+
23 A mun’we wa vapizani, loyi Jesu a nga mu randza,+ i wa tshamile kusuhani na* Jesu.
24 Hikwalaho, Simoni Pedro i no khweneta a mupizani loye hi hloko aku kakwe: “Hi byele ku i wula mani.”
25 A mupizani loye i no khigela cifuveni ca Jesu, aku kakwe: “Hosi, himani?”+
26 Jesu i no hlamula, aku: “Hi loyi ndzi to mu nyika a cikhemu ca pawa leci ndzi petako lomu ngelweni.”+ Hikwalaho, loku a petile pawa lomu ngelweni, i no teka a nyika Judhasi, a n’wana wa Simoni Iskariyoti.
27 Andzhako ka loku Judhasi a tekile a cikhemu ca pawa, Sathani i no nghena kakwe.+ Jesu aku kakwe: “Lezvi u mahako, zvi mahe hi kuhatlisa.”
28 Kanilezvi, i hava ni mun’we wa lava va nga tshamile mezeni a nga zvi tiva ku i mu byela lezvo hikuyini.
29 Kunene, kota lezvi Judhasi a nga hi muhlayisi wa kaxa ga mali,+ a vokari va wa alakanya ku Jesu i ngalo: “Xava lezvi hi zvi lavako laha mubuzweni”, kutani ku i wa nyike zvokari a zvisiwana.
30 Zvalezvi a nga amukela a cikhemu ca pawa, i no tekela ku huma. Gi wa hi wusiku.+
31 Hikwalaho, laha a nga humile, Jesu i te ngalo: “Makunu a N’wana wa munhu wa dhumiswa,+ na Nungungulu wa dhumiswa hi laha ka yena.
32 Nungungulu wutsumbu i ta mu dhumisa,+ niku i ta tekela ku mu dhumisa.
33 Vana vanga, ndza ha tava na n’wina zva cikhatana. Mu ta ndzi lavetela; kanilezvi kota lezvi ndzi wulileko ka vaJudha, ndziku: ‘Lomu ndzi yako kona mu nga ta zvi kota kuta’,+ makunu ndza wula ka n’winawu.
34 Ndza mu nyika a nayo wuswa, wa lezvaku mu randzana; khwatsi hi lezvi ndzi mu randzileko,+ n’winawu randzanani.+
35 Loku mu randzana, a vanhu vontlhe va ta zvi tiva lezvaku mu vapizani va mina.”+
36 Simoni Pedro i te ngalo kakwe: “Hosi, uya kwihi?” Jesu a hlamula, aku: “Lomu ndzi yako kona u nga ta zvi kota ku ndzi landza zvezvi, kanilezvi u ta ndzi landza hi ndzhako ka cikhati.”+
37 Pedro aku kakwe: “Hosi, hikuyini ndzi nga zvi kotiko ku ku landza zvezvi? Ndzi ta nyikela wutomi* ga mina hi kota ya wena.”+
38 Jesu i no hlamula, aku: “U ta nyikela wutomi* ga wena hi kota ya mina? Ndza tiyisa ka wena, ndziku: A nkuku wu nga taba na u nga se ndzi kaneta kunharu.”+
Mitlhamuselo ya lahasi
^ Kutani: “mu fanele ku hlambisana”.
^ Kutani: “i ndzi tlakusele cirendze”.
^ Hi kukongoma: “i wa khigele cifuveni ca”.
^ Kutani: “muhefemulo”.
^ Kutani: “muhefemulo”.
