Hi kutsala ka Johani 15:1-27
15 “Mina ndzi vhina* wa lisine, Papayi hi yena murimi.
2 Ni gihi dhavi gi nga ka mina, legi gi nga pswaliko mihandzu, wa gi tsema; kanilezvi legi gi pswalako mihandzu wa gi thena,* kasi gi fela ku pswala mihandzu yo tala.+
3 N’wina mu sina mu basile hi kota ya mhaka leyi ndzi nga mu byela.+
4 Tshamani hi wumun’we na mina, minawu ndzi ta tshama hi wumun’we na n’wina. Kota lezvi a dhavi gi nga zvi kotiko ku pswala mihandzu ahandle ka loku gi hi laha vhineni, n’winawu a mu nge zvi koti ku pswala mihandzu ahandle ka loku mu tshama ka mina.+
5 Mina ndzi vhina; n’wina mu madhavi. Ni wihi loyi a tshamako hi wumun’we na mina minawu ndzi tshama hi wumun’we naye, a munhu loye wa pswala mihandzu yo tala;+ hakuva loku mu hambene na mina a mu zvi koti ku maha nchumu.
6 Loku a munhu a nga tshami hi wumun’we na mina, o hoxiwa handle a ku fana ni dhavi, a woma. A vanhu va hlengeleta a madhavi lawo va ma hoxa ndzilweni, ma hisiwa.
7 Loku mu tshama hi wumun’we na mina ni timhaka ta mina ti tshama ka n’wina, kombelani ni cihi mu ci lavako, mu ta mahelwa.+
8 A Papayi wa mina wa dhumiswa hi lezvi mu simamako ku pswala mihandzu yo tala ni kuva vapizani va mina.+
9 A ku khwatsi hi lezvi Papayi a ndzi randzako,+ minawu ndza mu randza; tshamani lirandzweni la mina.
10 Loku mu hlayisa a milayo ya mina mu ta tshama lirandzweni la mina, khwatsi hi lezvi minawu ndzi hlayisako a milayo ya Papayi ndzi tshama lirandzweni lakwe.
11 “Ndzi mu byelile a timhaka leti kasi a kutsaka ka mina ku fela ku tshama ka n’wina, ni lezvaku a kutsaka ka n’wina ku mbhelela.+
12 A nayo wa mina hi lowu: Randzanani, khwatsi hi lezvi mina ndzi mu randzileko.+
13 A ku na munhu a nga ni lirandzo la hombe lo hundza leli, la kuza a nyikela wutomi* gakwe hi kota ya vanghana vakwe.+
14 N’wina mu vanghana va mina loku mu maha lezvi ndzi mu leletelako.+
15 A ndza ha mu vitani ku mu malandza, hakuva a nandza a gi zvi tivi lezvi zvi mahiwako hi hosi ya gona. Kanilezvi ndzi mu vitana ku mu vanghana, hakuva ndzi mu byelile zvontlhe lezvi ndzi zvi zwileko ka Papayi wa mina.
16 A hi n’wina mu nga ndzi hlawula, kanilezvi hi mina ndzi nga mu hlawula, ndzi mu yimisa kasi mu simama ku pswala mihandzu, ni lezvaku a mihandzu ya n’wina yi simama, kasi ni cihi leci mu to ci kombela ka Papayi hi vito ga mina a fela ku mu nyika.+
17 “Ndzi mu leletela a zvilo lezvi kasi mu randzana.+
18 Loku a tiko gi mu venga, zvi tiveni lezvaku gi rangile hi mina gi ndzi venga.+
19 Loku mu wa hi va tiko, a tiko na gi mu randzile hakuva na mu hi va gona. Makunu lezvi mu nga hiko va tiko,+ kanilezvi na ndzi mu hlawulile ka gona, hikwalaho a tiko ga mu venga.+
20 Mu nga rivali a mhaka leyi ndzi nga mu byela, ndziku: A nandza a hi ga hombe ku hundza a hosi ya gona. Loku va xanisile mina, va ta xanisa na n’winawu;+ loku va hlayisile a mhaka ya mina, va ta hlayisa ni leyi ya n’winawu.
21 Kanilezvi va ta maha zvilo lezvi zvontlhe ka n’wina hi kota ya vito ga mina, hakuva a va mu tivi Loyi a ndzi rumileko.+
22 Loku ndzi wa nga tangi ndzi ta kanela kabye, na va nga hi na ciwonho.+ Kanilezvi a va ha hi na ku ti phendla ciwonhweni cabye.+
23 Loyi a ndzi vengako i venga ni Papayi wa mina kambe.+
24 Loku ndzi wa nga mahangi mitiro cikari kabye leyi yi nga kala ku mahiwa hi mun’wani munhu, na va nga hi na ciwonho;+ kanilezvi va wonile mina ni Papayi wa mina va tlhela va hi venga.
25 Kanilezvi a zvilo lezvi zvi mahekile kasi ku tatiseka a mhaka leyi yi tsalilweko Nayweni wabye, yaku: ‘Va ndzi vengile mahala.’+
26 A cikhati leci a to chikela a muvhuni loyi ndzi to mu rumela hi ka Papayi, wu nga moya wa lisine,+ lowu wu tako hi ka Papayi, a muvhuni loye i ta nyika wukustumunyu hi mina;+
27 na n’winawu mu ta nyika wukustumunyu,+ hakuva mu wa hi na mina kusukela kusanguleni.
Mitlhamuselo ya lahasi
^ A vhina i sinya leyi yi pswalako mauvha.
^ Hi kukongoma: “basisa”.
^ Kutani: “muhefemulo”.
