Hi kutsala ka Johani 16:1-33
16 “Ndzi mu byelile a zvilo lezvi kasi mu nga khunguvanyeki.
2 Va ta mu hlongola sinagogeni.+ Kunene, cata cikhati leci ni wihi loyi a to mu daya+ a to alakanya lezvaku i tirela Nungungulu.
3 Kanilezvi va ta maha zvilo lezvi hakuva a va mu tivi Papayi ne mina a va ndzi tivi.+
4 Hambulezvo, ndzi mu byelile a timhaka leti kasi loku ci chikela a cikhati ca lezvaku ti maheka, mu fela ku zvi alakanya lezvaku ndzi wa mu byelile.+
“A ndzi mu byelangi a timhaka leti kusanguleni, hakuva ndzi wa ha hi na n’wina.
5 Kanilezvi zvezvi ndza famba ka Loyi a ndzi rumileko;+ hambulezvo i hava ni mun’we wa n’wina a ndzi wutisako ku: ‘Uya kwihi?’
6 Kanilezvi kota lezvi ndzi mu byelileko a timhaka leti, a timbilu ta n’wina ti tele hi kukarateka.+
7 Hambulezvo, ndza mu byela lisine, ndziku: Zvi ta vhuna n’wina lezvi ndzi fambako. Hakuva loku ndzi nga fambi, a muvhuni+ a nga tata ka n’wina; kanilezvi loku ndzi famba, ndzi ta mu rumela ka n’wina.
8 A cikhati leci a to chikela, i ta nyika tiko a citiyisekiso ci kholwisako xungetano hi ciwonho, ni kululama, ni kulamula:
9 a kusangula, xungetano hi ciwonho,+ hakuva a va kombisi kukholwa ka mina;+
10 hi kulandzela, xungetano hi kululama, hakuva ndza famba ka Papayi niku mu nga ta ha ndzi wona;
11 hi kugumesa, xungetano hi kulamula, hakuva a hosana ya tiko legi yi lamulilwe.+
12 “Ndza hi ni timhaka to tala kasi ndzi mu byela, kanilezvi ka cikhati leci ti nga mu tsandza.
13 Hambulezvo, a cikhati leci yena* a to chikela, ku nga moya wa lisine,+ i ta mu rangela lisineni lontlhe, hakuva a nga ta zvi randza a wulawula hi kutisangulela kakwe, kanilezvi i ta wulawula lezvi a zvi zwileko, a mu hlawutela zvilo zva ha tako.+
14 Loye i ta ndzi dhumisa+ hakuva i ta amukela lezvi zvi nga zva mina a zvi kanela ka n’wina.+
15 Zvontlhe lezvi Papayi a nga nazvo zva mina.+ Hi cigelo leco ndzi ngaku a muvhuni i amukela lezvi zvi nga zva mina a zvi kanela ka n’wina.
16 Zvalezvanyana mu nga ta ha ndzi wona,+ kanilezvi zvalezvanyana mu ta tlhela mu ndzi wona.”
17 Laha va ngazwa lezvo, a vokari cikari ka vapizani vakwe va no wutisana, vaku: “Kasi i lava ku wula yini loku a hi byela ku: ‘Zvalezvanyana mu nga ta ha ndzi wona, kanilezvi zvalezvanyana mu ta tlhela mu ndzi wona’, niku ‘hakuva ndza famba ka Papayi’?”
18 Hikwalaho, va waku: “I lava ku wula yini loku aku: ‘zvalezvanyana’? A hi zvi tivi lezvi a zvi wulako.”
19 Jesu i no zvi tiva lezvaku va wa lava ku mu wutisa, hikwalaho i te ngalo kabye: “Mu wutisana hi kota ya lezvi ndzi ngaku: ‘Zvalezvanyana mu nga ta ha ndzi wona, kanilezvi zvalezvanyana mu ta tlhela mu ndzi wona’?
20 Ndza tiyisisa ka n’wina, ndziku: Mu ta rila muba huwa, kanilezvi a tiko gi ta tsaka; mu tava kuxanisekeni, kanilezvi a kuxaniseka ka n’wina ku ta hundzuluswa kuva kutsaka.+
21 A cikhati leci a wasati a pswalako, wa xaniseka hakuva ci chikele a cikhati cakwe, kanilezvi loku a pswalile n’wana a nga ha ku alakanyi a kubayisa hi kota ya litsako la lezvi ku pswalilweko munhu tikweni.
22 Hizvalezvo, n’winawu ma karateka ka cikhati leci, kanilezvi ndzi ta tlhela ndzi mu wona, a timbilu ta n’wina ti tsaka,+ niku a nga kona a to mu tekela a litsako la n’wina.
23 Ka siku lego, mu nga ta ha ndzi wutisa nchumu. Ndza tiyisa ka n’wina, ndziku: Ni cihi leci mu to ci kombela ka Papayi,+ i ta mu nyika hi vito ga mina.+
24 Kala lezvi a mu se kombela nchumu hi vito ga mina. Kombelani mu ta nyikiwa, kasi a kutsaka ka n’wina ku fela ku mbhelela.
25 “Ndzi kanele a timhaka leti ka n’wina hi mifananiso. A cikhati cata leci ndzi to kala ndzi nga ha wulawuli na n’wina hi mifananiso, kanilezvi ndzi to mu byela zviku dlunya xungetano hi Papayi.
26 Ka siku lego mu ta kombela ka Papayi hi vito ga mina; a ndzi wuli ku hi mina ndzi to mu kombelela.
27 Hakuva Papayi wa mu randza hi lezvi n’wina mu ndzi randzako+ ni lezvi mu kholwako lezvaku ndzi tile kota muyimeli wa Nungungulu.+
28 Ndzi tile tikweni na ndzita hi ka Papayi. Makunu ndza suka tikweni ndzi tlhela ka Papayi.”+
29 A vapizani vakwe va te ngalo: “Lezvi u wulawula zviku dlunya, a wa ha wulawuli hi mifananiso.
30 Makunu ha zvi wona lezvaku wa zvi tiva a zvilo zvontlhe niku a zvi lavi ku kala u wutisiwa hi munhu. Hikwalaho, ha kholwa lezvaku u tile hi ka Nungungulu.”
31 Jesu i no va hlamula, aku: “Makunu ma kholwa?
32 Zwanani lezvi: Cata cikhati, niku ci chikele, laha n’wentlhe mu to hangalaka, a mun’we ni mun’wani a ti yela kaya kakwe, mu ndzi siya ndzoce.+ Kanilezvi a ndzi ndzoce, hakuva Papayi i zvin’we na mina.+
33 Ndzi mu byelile a timhaka leti kasi mu fela kuva ni kurula hi kota ya mina.+ Mu ta xaniseka tikweni, kanilezvi tiyani hlanha! Mina ndzi hlulile tiko.”+
Mitlhamuselo ya lahasi
^ A gezu legi ga ku “yena” ka vs. 13, ni legi ga ku “loye” ka vs. 14, ma wula a “muvhuni” a kumbukiwako ka vs. 7. Jesu i tirisile a gezu legi ga ku “muvhuni” kasi ku fananisa a moya wo basa ni munhu, kanilezvi a moya wo basa a hi munhu, i ntamu.
