Hi kutsala ka Johani 19:1-42
19 Pilatu i no teka Jesu, a laya lezvaku a biwa.+
2 A masochwa ma no luka cidlodlo* ca mimizwa ma ci tlhateka hlokweni yakwe, ma mu bohisa nguwo yo pswhuka.+
3 Ma wa simama kuta kakwe ma taku: “Xewe, wena Hosi ya vaJudha!” Ma wa simama ku muba tipama kambe.+
4 Pilatu i no huma kambe lahandle, aku kabye: “Ndzi ta mu humesa ata ka n’wina kasi mu zvi tiva lezvaku a ndzi kumi nandzu ka yena.”+
5 Hikwalaho, Jesu i no huma handle na a bohile cidlodlo* ca mimizwa ni nguwo yo pswhuka. Pilatu aku kabye: “Hi loyi!”
6 Kanilezvi, a cikhati leci a vapristi lava va tihosana ni varindzeli va nga mu wona, va no banguleka, vaku: “I waye mhandzeni! I waye mhandzeni!”*+ Pilatu aku kabye: “Mu tekeni, mu mu daya hi n’wece,* hakuva a ndzi kumi nandzu kakwe.”+
7 A vaJudha va no mu hlamula, vaku: “Hi na ni nayo, niku hi nayo lowo i fanele kufa,+ hakuva i ti mahile n’wana wa Nungungulu.”+
8 Laha Pilatu a ngazwa lezvi va nga kari va wula, i no chava nguvhu,
9 a nghena kambe ndlwini ya govhernadhori aku ngalo ka Jesu: “Uta hi kwihi?” Kanilezvi Jesu a nga mu hlamulangi nchumu.+
10 Pilatu aku kakwe: “Wo ndzi miyelela? A wu zvi tivi ku ndzi na ni ntamu wa ku ku tlhatlha ni ntamu wa ku ku daya?”*
11 Jesu i no mu hlamula, aku: “U wa nga tava ni ntamu hehla ka mina ne wutsongwani loku u wa nga nyikiwangi wona hi le hehla. Hi cigelo leco, a munhu loyi a ndzi nyikeleko ka wena i na ni ciwonho ca hombe.”
12 Hi kota ya lezvo, Pilatu i no simama ku lavetela tindlela ta ku mu tlhatlhisa, kanilezvi a vaJudha va no banguleka, vaku: “Loku u tlhatlha wanuna loyi a wu munghana wa Khezari. Ni wihi loyi a ti mahako hosi i vhukela* Khezari.”+
13 Makunu loku Pilatu a zwile lezvo, i no humesa Jesu lahandle a gumesa a ya tshama citshan’wini ca kulamula laha ku vitaniwako ku Wutshamu go Bambatelwa hi Maribye, kanilezvi hi ciHebheru i Gabhata.
14 Gi wa hi siku ga Kulongisela+ Phasika, kwalomu ka hora ya wu 6.* I no byela vaJudha, aku: “Hi leyi a hosi ya n’wina!”
15 Kanilezvi va no banguleka, vaku: “Mu daye! Mu daye! I waye mhandzeni!”* Pilatu aku kabye: “Ndzi daya a hosi ya n’wina?” A vapristi lava va tihosana va no hlamula, vaku: “A hi na hosi yin’wani ahandle ka Khezari.”
16 Makunu i no mu nyikela kabye lezvaku va mu daya mhandzeni.+
Va no teka Jesu va famba naye.
17 I no huma na a rwele a mhandze yakwe ya hlomulo* aya laha ku vitaniwako ku Wutshamu ga Cirwarwa,*+ kutani ku Golgota hi ciHebheru.+
18 Hi laho va nga mu belela kona mhandzeni+ zvin’we ni vavanuna vambiri matlhelweni yakwe: a mun’we seno, a mun’wani seniya, Jesu a tshama laha cikari.+
19 Pilatu i no tsala magezu a ma vekela laha mhandzeni ya hlomulo.* I no tsala ku: “Jesu wa le Nazareta, a Hosi ya vaJudha.”+
20 A vaJudha vo tala va no lera a magezu lawo, hakuva laha Jesu a nga belelwe kona ku wa gamekene ni dhoropa, niku a magezu ya kona ma wa tsalilwe hi ciHebheru, ni ciLatini, ni ciGreki.
21 Kanilezvi a vapristi lava va tihosana va vaJudha va te ngalo ka Pilatu: “U nga tsali ku: ‘Hosi ya vaJudha’, kanilezvi tsala ku i waku: ‘Ndzi Hosi ya vaJudha.’”
22 Pilatu i no hlamula, aku: “Lezvi ndzi nga tsala, ndzi tsalile.”
23 Andzhako ka loku a masochwa ma belele Jesu laha mhandzeni, ma no teka tinguwo takwe ma ti avanyisa hi mune wa zvipandze, a musochwa ni musochwa a teka cipandze cin’we. Va no teka ni nghanju yakwe kambe. Kanilezvi a nghanju leyo yi wa nga rungiwangi, yi wa lukilwe kusukela hehla kala hasi.
24 Ma no byelana, maku: “Hi nga handzuleni, a hi beni tihlolo kasi hi tiva ku yi tava ya mani.”+ Lezvi zvi wa fela ku ku tatiseka a mutsalo lowu wu nge ngalo: “Va avelene a tinguwo ta mina, vaba tihlolo va bela a nguwo ya mina.”+ Kunene, a masochwa ma zvi mahile lezvo.
25 Laha kusuhani ni mhandze ya hlomulo* ya Jesu ku wa yimile a mamani wakwe ni makabye* wa mamani wakwe;+ na Mariya a sati wa Klopasi, na Mariya Magdhala.*+
26 Makunu laha Jesu a nga wona mamani wakwe ni mupizani loyi a nga mu randza+ na va yimile kusuhani, i no byela mamani wakwe, aku: “Wasati, a n’wana wa wena hi loyi!”
27 Hi kulandzela, i no byela mupizani loye, aku: “A mamani wa wena hi loyi!” Kusukela kwalaho, a mupizani loye i no mu teka a ya tshama naye mutini wakwe.
28 Andzhako ka lezvo, na a zvi tiva lezvaku kala ka cikhati leco zvontlhe zvi wa tatisekile, Jesu i no wula magezu lawa kasi ku tatiseka a mutsalo, aku: “Ndzizwa tora.”+
29 Ku wa vekilwe cifukwana co tala hi vhinyo yo dzunga. Hikwalaho, va no tlhomeka ciponja co tala hi vhinyo yo dzunga ka lihlanga la hisope* va li tlakusa kala non’wini wakwe.+
30 Andzhako ka ku ringa a vhinyo leyo yo dzunga, Jesu i te ngalo: “Zvi mbhelile!”+ a gowota hloko, a nyikela moya wakwe.*+
31 Kota lezvi ku nga hi siku ga Kulongisela+ Phasika, na zvi nga laveki lezvaku a zvirumbi zvi simama timhandzeni+ hi sabhadho (hakuva a sabhadho lego gi wa hi sabhadho ga hombe),+ a vaJudha va no kombela Pilatu lezvaku ku tshoviwa minenge ya lava va nga belelwe, ni lezvaku a zvirumbi zvabye zvi susiwa.
32 Hikwalaho, a masochwa ma nota ma ta tshova minenge ya wanuna wo sangula ni ya loyi mun’wani a nga hi mhandzeni reveni gakwe.
33 Kanilezvi, a cikhati leci ma nga chikela ka Jesu, ma no wona lezvaku i wa sina a file, hikwalaho a ma mu tshovangi minenge.
34 Kanilezvi a gin’we ga masochwa gi no mu tlhava laha reveni hi tlhari,+ ku tekela ku huma nkhata ni mati.
35 Makunu loyi a zvi wonileko wa kustumunya ha zvona, niku a wukustumunyu gakwe lisine; wa zvi tiva lezvaku i wula lisine kasi n’winawu mu fela ku kholwa.+
36 Kunene, a zvilo lezvi zvi mahekile kasi ku tatiseka a mutsalo lowu wu nge ngalo: “Gi hava ni rambu gin’we gakwe gi to tshoviwa.”*+
37 Ni mutsalo wun’wani wu nge: “Va ta cuwuka loyi va mu tlhavileko.”+
38 Andzhako ka zvilo lezvi, Josefa wa le Arimateya, loyi a nga hi mupizani wa Jesu kufihlaleni hi kota ya ku chava vaJudha,+ i noya ka Pilatu a ya mu kombela lezvaku a mu tsika a hawula a cirumbi ca Jesu; Pilatu i no vhumela. Hikwalaho, Josefa i nota a ta susa cirumbi.+
39 Nikodhemusi,+ loyi a nga yile kakwe hi khati go sangula ni wusiku, yenawu i nota ni mira ni mhangani na zvi patselwe,* zva cipimo ca 33 wa tikilo.*+
40 Hikwalaho, va no teka a cirumbi ca Jesu va ci phutsela ka tinguwo ta wukene* ti nga chelilwe mafura yo nuhela,+ kota mukhuwo wa malahlela ya vaJudha.
41 Ku wa hi ni jardhim ka wutshamu legi a nga dayelwa ka gona.* Ka jardhim leyo ku wa hi ni cilahla ca ciswa+ ca ku ku wa nga se lahliwa munhu ka cona.
42 Kota lezvi gi nga hi siku ga vaJudha ga Kulongisela,+ ni lezvi ku nga hi ni cilahla laha kusuhani, va no lahla Jesu laho.
Mitlhamuselo ya lahasi
^ Kutani: “korowa”.
^ Kutani: “korowa”.
^ Kutani: “Mu daye mhandzeni! Mu daye mhandzeni!”
^ Kutani: “mu mu daya hi n’wece mhandzeni”.
^ Kutani: “ku ku daya mhandzeni”.
^ Kutani: “i wulawula kubiha hi”.
^ Ku nga kwalomu ka dhina.
^ Kutani: “Mu daye mhandzeni!”
^ Kutani: “Cikodo; Cikuwa”.
^ Kutani: “Mariya wa le Magdhala”.
^ A makabye loyi wa cisati.
^ Kutani: “afa”.
^ Kutani: “fayiwa”.
^ Zvi nga maha na zvi wula ku: “na zvi hi cibubu”.
^ Kutani: “linho”.
^ Kutani: “a nga dayelwa ka gona laha mhandzeni”.
