Hi kutsala ka Johani 2:1-25
2 Hi siku ga wunharu, ku no mahiwa mubuzo wa muchadho le Kana wa Galileya; a mamani wa Jesu i wa hi kwalaho.
2 Jesu ni vapizani vakwe vonawu va wa rambilwe mubuzweni lowo ya muchadho.
3 A cikhati leci a vhinyo yi nga mbhela, a mamani wa Jesu i te ngalo kakwe: “A va na vhinyo.”
4 Kanilezvi Jesu i no mu hlamula, aku: “Wasati, mina na wena hi nghena kwihi ka zvona zvezvo?* A cikhati ca mina a ci se chikela.”
5 A mamani wakwe i no byela lava va nga kari va tira, aku: “Mahani ni cihi a to mu byela.”
6 Ku wa hi ni 6 wa tifuko to mahiwa hi maribye ti nga vekilwe laho kota kulaya ka nayo wa vaJudha+ wa kutibasisa. A fuko yin’we ni yin’wani yi waya tipimo timbiri kutani tinharu ta zvilo zvo hluluka.*
7 Jesu aku kabye: “Tatani tifuko hi mati.” Va no ti tata ti ku khapa.
8 Andzhako ka lezvo, i te ngalo kabye: “Makunu khanani mu ya nyika murangeli wa mubuzo.” Va nokha va ya mu nyika.
9 A cikhati leci a murangeli wa mubuzo a nga ringa mati lawa makunu ma nga cicilwe ma maha vhinyo, na a nga zvi tivi ku yi wata hi kwihi (hambu lezvi a zvitiri lezvi zvi ngakha mati zvi nga zvi tiva), i no vitana noivho,
10 aku kakwe: “A van’wani vanhu va ranga hi ku humesa vhinyo leyi yo nandziha, makunu loku a vanhu va popilwe, va humesa leyi yo biha. Kanilezvi wena u vekile leyi yo nandziha kala lezvi.”
11 Jesu i mahile zvilo lezvi le Kana wa Galileya kota masangulo ya zviwoniso zvakwe, a kombisa a ntamu wakwe;+ ni vapizani vakwe va no kholwa kakwe.
12 Andzhako ka lezvo, yena ni mamani wakwe, ni vamakabye vakwe,+ ni vapizani vakwe, va no relela vaya Kapernawume,+ kanilezvi a va tshamangi masiku yo tala seyo.
13 Makunu a Phasika+ ga vaJudha gi wa hi laha kusuhani, hikwalaho Jesu i no kandziha aya Jerusalema.
14 I no ya kuma lava va nga kari va xavisa tihomu ni tiyivhu ni zvipomba+ lomu tempeleni, ni vacicisi va mali na va hi matshan’wini yabye.
15 I no luka musephu wa tingoti, a hlongola vontlhe lomu tempeleni zvin’we ni tiyivhu tabye ni tihomu tabye, a hangalasa a mali ya vacicisi va mali, a khubhunyeta timeza tabye.+
16 Hi kulandzela, i no byela lava va nga xavisa zvipomba, aku: “Susani zvilo lezvi laha! Tsikani ku teka yindlu ya Papayi wa mina mu yi maha yindlu ya mabhindzu!”*+
17 A vapizani vakwe va no alakanya lezvi zvi tsalilweko, zvaku: “A kutitsitsirita hi yindlu ya wena ku ta ndziga.”+
18 Hikwalaho, a vaJudha va no mu hlamula, vaku: “Ciwoniso muni ca ku u nga hi mahela+ kasi ku komba lezvaku u nyikilwe ntamu wa ku maha zvilo lezvi?”
19 Jesu i no va hlamula, aku: “Hahlulani a tempeli leyi, ndzi ta yi vhuxa hi masiku manharu.”+
20 A vaJudha vaku: “A tempeli leyi yi akilwe hi 46 wa malembe, u nga yi vhuxa wena hi masiku manharu?”
21 Kanilezvi a tempeli leyi a nga yi wula ku wa hi miri wakwe.+
22 Kanilezvi, a cikhati leci a nga vhuxiwa hi ka vafileko, a vapizani vakwe va no zvi alakanya lezvaku i wa tala ku wula magezu lawo,+ hikwalaho va no kholwa a mitsalo ni lezvi Jesu a nga zvi wulile.
23 Kanilezvi na a ha hi Jerusalema mubuzweni wa Phasika, a vanhu vo tala va no kholwa vitweni gakwe hi ku wona zviwoniso lezvi a nga kari a maha.
24 Hambulezvo, Jesu i wa nga va tsumbi hakuva i wa va tiva vontlhe,
25 niku i wa ngazi a lava lezvaku a wokari a mu tlhamusela nchumu hi munhu, hakuva i wa zvi tiva lezvi zvi nga ka munhu.+
Mitlhamuselo ya lahasi
^ Hi kukongoma: “Cini ka mina ni ka wena, wasati?” A magezu lawa i vingu ga ku komba kungazvilavi. A ku wula ku “wasati” a hi ku nga mu kombisi cichavo.
^ Kutani: “mu yi maha merkadho”.
