Hi kutsala ka Johani 20:1-31
20 Hi siku go sangula ga vhiki, Mariya Magdhala* i noya cilahleni ni mixo,+ na ga ha phumile; i no ya kuma lezvaku a ribye gi susilwe laha cilahleni.+
2 Hikwalaho, i no tsutsuma aya ka Simoni Pedro ni ka mun’wani mupizani, loyi Jesu a nga mu randza,+ a yaku kabye: “Va susile a Hosi lomu cilahleni,+ a hi ku tivi lomu va nga yi veka kona.”
3 Pedro ni mupizani loyi mun’wani va no suka vaya cilahleni.
4 Va no sangula ku tsutsuma hi wumbiri gabye, kanilezvi a mupizani loyi mun’wani i no tsutsuma a siya Pedro, a ranga hi yena a chikela cilahleni.
5 I no korama a hlomela, a wona tinguwo ta wukene* ti nga hi lomo,+ kanilezvi a nga nghenangi.
6 Simoni Pedro yenawu i no chikela na a mu landzela, a nghena lomu cilahleni. I no wona tinguwo ta wukene* ti nga hi lomo.
7 A nguwo leyi yi nga hi hlokweni yakwe yi wa nga hi zvin’we ni zvitarapo lezvi zvin’wani, kanilezvi yi wa petsilwe yi vekiwa yoce hi tlhelo.
8 Hi kulandzela, a mupizani loyi mun’wani a nga ranga hi yena a chikela cilahleni yenawu i no nghena a zvi wona, a se kholwa.
9 Hakuva va wa nga se wu zwisisa a mutsalo lowu wu nge i ta vhuka hi ka vafileko.+
10 Hikwalaho, a vapizani va no tlhela mitini yabye.
11 Kanilezvi Mariya i no simama na a yimile lahandle kusuhani ni cilahla, a rila. Na a ha rila, i no korama a hlomela lomu cilahleni,
12 a wona tingilozi timbiri+ na ti bohile tinguwo to basa na ti tshamile laha a cirumbi ca Jesu ci nga latilwe kona; a yin’we hi le tihlokweni, ni yin’wani hi seno minengeni.
13 Tiku kakwe: “Wasati, u rilela yini?” Aku ka tona: “Va susile a Hosi ya mina, a ndzi ku tivi lomu va nga yi veka kona.”
14 Loku a wulile lezvo, i no hundzuluka a wona Jesu na a yimile laho, kanilezvi a nga mu tivangi lezvaku hi Jesu.+
15 Jesu aku kakwe: “Wasati, u rilela yini? U lavetela mani?” Na a alakanya lezvaku i wulawula ni muhlayisi wa jardhim, i te ngalo kakwe: “Bava, loku ku hi wena u nga mu susa, ndzi byele ku u mu vekile kwihi, ndzi ta ya mu teka.”
16 Jesu aku kakwe: “Mariya!” I no hundzuluka aku ngalo kakwe, hi ciHebheru: “Raboni!” (zvi wulako ku ngalo: “Mugondzisi!”)
17 Jesu aku kakwe: “Tsika ku ndzi dhamarela, hakuva a ndzi se tlakukela ka Papayi. Kanilezvi famba ka vamakabye va mina+ u ya va byela, uku: ‘Ndza tlakukela ka Papayi wa mina+ ni Papayi wa n’wina, a Nungungulu wa mina+ ni Nungungulu wa n’wina.’”
18 Mariya Magdhala* i nota ni mahungu lawo ka vapizani, a taku: “Ndzi yi wonile a Hosi!” I no va byela lezvi yi nga mu byela.+
19 Laha gi nga pelile ka siku lego, ka siku go sangula ga vhiki, a tivati ta lomu a vapizani va nga hi kona na ti khotsilwe hi kota ya ku chava vaJudha, Jesu i no ta yima cikari kabye, aku: “A kurula a kuve na n’wina.”+
20 Andzhako ka ku wula lezvo, i no va komba mandla yakwe ni reve gakwe.+ Zvalezvo a vapizani va no tsaka nguvhu hi ku wona Hosi.+
21 Jesu i no engeta, aku kabye: “A kurula a kuve na n’wina.+ A ku khwatsi hi lezvi Papayi a ndzi rumileko,+ minawu ndza mu ruma.”+
22 Andzhako ka ku wula lezvo, i no va pupuxela, aku kabye: “Amukelani a moya wo basa.+
23 Loku mu tsetselela munhu a zviwonho zvakwe, zvi tsetselelwe; loku mu nga tsetseleli munhu a zviwonho zvakwe, a zviwonho lezvo a zvi tsetselelwangi.”
24 Kanilezvi Tomasi,+ a mun’we wa lava va 12, loyi a nga vitaniwa ku i Hahla,* i wa nga hi navo a cikhati leci Jesu a ngata.
25 Hikwalaho, a vapizani lava van’wani va no mu byela, vaku: “Hi yi wonile a Hosi!” Kanilezvi yena aku kabye: “Loku ndzi nga ku woni lomu a zvipikiri zvi nga bhoxile kona lomu mandleni yakwe, ndzi nghenisa litiho la mina lomu a zvipikiri zvi nga bhoxile, ndzi nghenisa ni canja ga mina laha reveni gakwe,+ cima ndzi nga ta kholwa.”
26 Andzhako ka 8 wa masiku, a vapizani vakwe va wa hi lomu ndlwini kambe, niku Tomasi i wa hi zvin’we navo. Hambu lezvi a tivati ti nga khotsilwe, Jesu i no ta yima cikari kabye, aku: “A kurula a kuve na n’wina.”+
27 Hi kulandzela, i te ngalo ka Tomasi: “Nghenisa litiho la wena laha, niku wona mandla ya mina u tlhela u nghenisa a canja ga wena laha reveni ga mina, u tsika kukanakana* u kholwa.”
28 Tomasi i no mu hlamula, aku: “Hosi ya mina ni Nungungulu wa mina!”
29 Jesu aku kakwe: “U kholwa hi lezvi u nga ndzi wona ke? Va tsaka lava va nga kala ku zvi wona hambulezvo va kholwa.”
30 Kunene, Jesu i mahile zvin’wani zviwoniso zvo tala mahlweni ka vapizani lezvi zvi nga kala ku tsaliwa ka bhuku legi go songiwa.+
31 Kanilezvi, lezvi zvi tsalilwe kasi mu kholwa lezvaku Jesu hi yena Kristu, a N’wana wa Nungungulu, ni lezvaku hi kukholwa mu kuma wutomi vitweni gakwe.+
Mitlhamuselo ya lahasi
^ Kutani: “Mariya wa le Magdhala”.
^ Kutani: “linho”.
^ Kutani: “linho”.
^ Kutani: “Mariya wa le Magdhala”.
^ Kutani: “Dhidhimusi”.
^ Hi kukongoma: “kungakholwi”.