Hi kutsala ka Johani 21:1-25
21 Andzhako ka lezvo, Jesu i no woneka kambe ka vapizani le Bimbini ga Tibheriyasi. I wonekisile lezvi:
2 Ku wa tlhangene Simoni Pedro, na Tomasi (loyi a nga vitaniwa ku i Hahla),*+ na Nataneli+ wa le Kana wa Galileya, ni vana va Zebhedhi,+ ni van’wani vapizani vakwe va vambiri.
3 Simoni Pedro i te ngalo kabye: “Ndza haya ndzi ya kukuta.” Vaku kakwe: “Hi ta famba na wena.” Va no suka va ya nghena ngalaveni, kanilezvi a va kumangi nchumu ka wusiku lego.+
4 Hambulezvo, laha gi ngaya kuceni, Jesu i no yima mbhirini ya bimbi, kanilezvi a vapizani a va mu tivangi lezvaku hi Jesu.+
5 Jesu aku kabye: “Vana vanga, mu na ni ca* kuga?” Va no hlamula, vaku: “Ahihi!”
6 Aku kabye: “Hoxelani likoka* tlhelweni ga cinene ga ngalava, mu ta kuma cokari.” Hikwalaho, va no li hoxela, kanilezvi va wa nga zvi koti ku li kokela hi kota ya kutala ka tinjhanjhi.+
7 Zvalezvo, a mupizani loyi Jesu a nga mu randza+ i te ngalo ka Pedro: “Hi Hosi!” Makunu laha Simoni Pedro a ngazwa lezvaku hi Hosi, i no boha tinguwo, hakuva i wa hi cimbyiri,* a gumesa a bhun’wala bimbini.
8 Kanilezvi a vapizani lava van’wani va nota hi cingalavana na va koka likoka* lo tala hi tinjhanjhi hakuva va wa nga hi kule ni mbhiri ya bimbi; ku wa hi cipimo ca 90 wa timetro* basi.
9 A cikhati leci va nga chikela seno handle, va no wona ndzilo wa makhala na ku hi ni tinjhanjhi hehla ka wona, ni pawa.
10 Jesu aku kabye: “Ndzi teleni ni tinjhanjhi to kari mu nga phasa zvalezvi.”
11 Simoni Pedro i no nghena ngalaveni a koka likoka* li nga tele hi tinjhanjhi ta hombe li huma handle. Ti wa hi 153 wa tona. Hambu lezvi ti nga tele nguvhu, a likoka a li handzukangi.
12 Jesu aku kabye: “Tanani mu ta fihlula.” A ku na mupizani ni mun’we a nga tiya ku mu wutisa ku: “Hi wena mani?” hakuva va wa zvi tiva lezvaku hi Hosi.
13 Jesu i no teka pawa a va nyika, a va nyika ni tinjhanjhi kambe.
14 Legi give khati ga wunharu+ legi Jesu a nga woneka ka vapizani andzhako ka ku vhuxiwa hi ka vafileko.
15 A cikhati leci va nga mbheta ku fihlula, Jesu i no wutisa Simoni Pedro, aku: “Simoni, n’wana wa Johani, wa ndzi randza ku hundza lezvi ke?” I no hlamula, aku: “Ina, Hosi, wa zvi tiva lezvaku ndza ku randza.” Aku kakwe: “Gisa a tiyivhana ta mina.”+
16 I no engeta, aku kakwe, hi khati ga wumbiri: “Simoni, n’wana wa Johani, wa ndzi randza ke?” I no hlamula, aku: “Ina, Hosi, wa zvi tiva ku ndza ku randza.” Aku kakwe: “Risa a tiyivhana ta mina.”+
17 I te ngalo kakwe hi khati ga wunharu: “Simoni, n’wana wa Johani, wa ndzi randza ke?” Pedro i no karateka hi lezvi a nga mu wutisa hi khati ga wunharu, aku: “Wa ndzi randza ke?” Hikwalaho, i te ngalo kakwe: “Hosi, wena wa zvi tiva zvontlhe; wa zvi tiva ku ndza ku randza.” Jesu aku kakwe: “Gisa a tiyivhana ta mina.+
18 Ndza tiyisisa ka wena, ndziku: A cikhati leci u nga ha hi mufana, u wa boha hi wece uya ni kwihi u ku lavako. Kanilezvi, laha u to khosahala, u ta tshambuluta mandla ya wena u bohisiwa hi mun’wani munhu a ku yisa laha u nga ku laviko.”
19 I no wula lezvi kasi ku komba a fela legi Pedro a nga wa ta mu dhumisa hi gona Nungungulu. Andzhako ka loku a wulile lezvi, i te ngalo kakwe: “Simama ku ndzi landzela.”+
20 Pedro i no hundzuluka a wona lezvaku a mupizani loyi Jesu a nga mu randza+ i wa kari a va landza, ku nga yaloyi a nga khigele cifuveni ca Hosi na va kari va lalela, aku: “Hosi, himani a ku tokometako?”
21 Makunu laha Pedro a nga mu wona, i te ngalo ka Jesu: “Hosi, ahati inaloyi?”
22 Jesu aku kakwe: “Loku ndzi randza lezvaku a hanya kala ndzi wuya, u lava ku zvi tiva u zvi maha yini? Wena simama ku ndzi landzela.”
23 Hikwalaho, a mhaka ya lezvaku a mupizani loyi a nga tafa yi no hangalaka cikari ka vamakabye. Hambulezvo, Jesu a nga mu byelangi lezvaku a nga tafa, kanilezvi i te ngalo: “Loku ndzi randza lezvaku a hanya kala ndzi wuya, u lava ku zvi tiva u zvi maha yini?”
24 A mupizani loyi+ hi yena a nyikako wukustumunyu ga timhaka leti, hi yena kambe a nga tsala, niku ha zvi tiva lezvaku a wukustumunyu gakwe lisine.
25 Kunene, ku na ni zvin’wani zvilo zvo tala lezvi Jesu a nga maha, zva ku loku zvontlhelele zvi wa no tsaliwa, ndzi alakanya ku a tiko gi wa nga ta zvi kota ku welela a mabhuku ya kona.+
Mitlhamuselo ya lahasi
^ Kutani: “Dhidhimusi”.
^ Kutani: “njhanjhi ya”.
^ Kutani: “juya”.
^ Kutani: “i wa nga bohangi tinguwo to enela”.
^ Kutani: “juya”.
^ Kutani: “juya”.