Hi kutsala ka Johani 3:1-36
3 Ku wa hi ni wanuna wa muFarisi a vitaniwako ku hi Nikodhemusi,+ a nga hi hosana ya vaJudha.
2 I nota kakwe ni wusiku,+ a taku kakwe: “Rabi,+ ha zvi tiva lezvaku u mugondzisi a tileko hi ka Nungungulu, hakuva i hava a nga mahako a zviwoniso+ lezvi u mahako ahandle ka loku Nungungulu a hi zvin’we naye.”+
3 Jesu i no mu hlamula, aku: “Ndza tiyisa ka wena, ndziku: Loku a munhu a nga pswaliwi luswa,*+ a nge zvi koti ku wona a Mufumo wa Nungungulu.”+
4 Nikodhemusi i te ngalo kakwe: “A munhu a nga pswalisiwa kuyini na a hi wa kale? A nga nghena ga wumbiri rumbwini ga mamani wakwe a gumesa a pswaliwa kambe ke?”
5 Jesu i no hlamula, aku: “Ndza tiyisa ka wena, ndziku: Loku a munhu a nga pswaliwi hi mati+ ni moya,+ a nga ta zvi kota ku nghena Mufun’weni wa Nungungulu.
6 Leci ci pswalilweko hi nyama i nyama, ni leci ci pswalilweko hi moya i moya.
7 U nga hlamali hi lezvi ndzi nga ku byela, ndziku: Mu fanele ku pswaliwa luswa.
8 A moya wuba wuya lomu wu ku lavako, ku zwala a guwa ga wona, kanilezvi a ku tiveki lomu wu tako hi kona ne lomu wu yako kona. Zvi mahisa lezvo ni ka wihi munhu a pswalilweko hi moya.”+
9 Nikodhemusi i no mu hlamula, aku: “Zvi nga mahekisa kuyini a zvilo lezvi?”
10 Jesu aku: “Wena u mugondzisi wa Izrayeli, hambulezvo a wu zvi tivi a zvilo lezvi ke?
11 Ndza tiyisa ka wena ndziku: Hina hi wulawula hi lezvi hi zvi tivako, hi kustumunya lezvi hi zvi wonileko, kanilezvi n’wina a mu vhumeli a wukustumunyu ga hina.
12 Lezvi ndzi nga mu byela a zvilo zva laha misaveni mu nga kholwi, mu ta kholwisa kuyini loku ndzi mu byela a zvilo zva le tilweni ke?
13 Ahandle ka lezvo, i hava a tlakukeleko tilweni,+ saseka loyi a releleko hi le tilweni,+ ku nga N’wana wa munhu.
14 A ku fana ni lezvi Mosi a tlakusileko nyoka le ciwuleni,+ a N’wana wa munhu yenawu i fanele ku tlakusiwa,+
15 kasi ni wihi loyi a kholwako kakwe a kuma wutomi ga pindzukelwa.+
16 “Hakuva Nungungulu i no randza nguvhu tiko laha ka kuza a nyikela N’wana wakwe a pswalilweko yece,+ kasi ni wihi loyi a kombisako kukholwa kakwe a nga lovisiwi, kanilezvi a kuma wutomi ga pindzukelwa.+
17 Hakuva Nungungulu a nga rumelangi a N’wana wakwe tikweni lezvaku a ta lamula tiko, kanilezvi i mu rumele lezvaku a tiko gi fela ku hanyiswa ha yena.+
18 Ni wihi a kombisako kukholwa kakwe a nga ta lamuliwa.+ Loyi a nga kombisiko kukholwa i sina a lamulilwe, hakuva a nga kombisangi kukholwa vitweni ga N’wana a pswalilweko yece wa Nungungulu.+
19 A kulamula ku seketelwa ka mhaka leyi yaku: a kuwonekela ku tile tikweni,+ kanilezvi a vanhu va no randza munyama ku hundza kuwonekela, hakuva a mitiro yabye yi wa bihile.
20 Hakuva ni wihi a mahako zvilo zvakubiha wa venga kuwonekela niku a ngati kuwonekeleni, kasi a mitiro yakwe yi nga soliwi.*
21 Kanilezvi loyi a mahako zvilo zva zvinene ita kuwonekeleni,+ kasi a mitiro yakwe yi woneka lezvaku yi mahilwe hi kuya hi kurandza ka Nungungulu.”
22 Andzhako ka lezvo, Jesu i noya tikweni ga Judhiya zvin’we ni vapizani vakwe a ya tshama cikhatana navo na a bhabhatisa.+
23 Kanilezvi Johani yenawu i wa kari a bhabhatisa le Enoni kusuhani ni Salimi hakuva ku wa hi ni mati ya kutala;+ ni vanhu va waya va ya bhabhatiswa,+
24 hakuva Johani i wa nga se vhalelwa paxweni.+
25 A vapizani va Johani va no kanetisana ni muJudha hi mhaka ya kubasiswa.
26 Hikwalaho, va nota ka Johani va taku kakwe: “Rabi, a wanuna loyi u nga hi zvin’we naye le tlhatuko wa Jordhani, loyi u nga kustumunya ha yena,+ o bhabhatisa, niku a vanhu vontlhe vaya kakwe.”
27 Johani i no hlamula, aku: “A munhu a nge amukeli nchumu loku a nga nyikwangi wona hi le tilweni.
28 N’wina mu vakustumunyu va lezvi ndzi nga wula, ndziku: ‘A hi mina Kristu,+ kanilezvi ndzi rumilwe a ku ranga mahlweni kakwe.’+
29 Loyi a nga ni noivha i noivho.+ Kanilezvi loku a munghana wa noivho a yima kusuhani a muzwa, wa tsaka nguvhu hi kuzwa a gezu ga noivho. Hikwalaho, a kutsaka ka mina ku mbhelele.
30 Yena i fanele ku simama a andza, kanilezvi mina ndzi fanele ku simama ku bohla.”*
31 Loyi a tako hi le hehla i hehla ka vontlhe.+ Loyi a nga wa laha misaveni wa laha misaveni, niku i wulawula hi zvilo zva laha misaveni. Loyi a tako hi le tilweni i hehla ka vontlhe.+
32 I kustumunya lezvi a nga zvi wona ni ku zvizwa,+ kanilezvi i hava a vhumelako wukustumunyu gakwe.+
33 Ni wihi a vhumelako wukustumunyu gakwe i tiyisa lezvaku Nungungulu i na ni lisine.+
34 Hakuva loyi a rumelweko hi Nungungulu i wulawula timhaka ta Nungungulu,+ hakuva Nungungulu a nga kengezi* loku a nyika moya wakwe.
35 A Papayi wa randza N’wana,+ niku i vekile zvilo zvontlhe mandleni yakwe.+
36 Loyi a kombisako kukholwa ka N’wana i na ni wutomi ga pindzukelwa;+ loyi a nga ingisiko N’wana a nga ta gi wona wutomi,+ kanilezvi a zanga ya Nungungulu yi tshama hehla kakwe.+
Mitlhamuselo ya lahasi
^ Zvi nga maha na zvi wula ku: “pswaliwi hi le hehla”.
^ Kutani: “wonekeliswi kubaseni”.
^ Kutani: “ku hunguleka”.
^ Kutani: “a nga pimi”.
