Hi kutsala ka Johani 4:1-54
4 A cikhati leci a Hosi yi nga tiva lezvaku a vaFarisi va zwile lezvaku Jesu wa maha vapizani vo tala ni ku va bhabhatisa+ a ku hundza Johani —
2 hambu lezvi ku nga ku Jesu wutsumbu i wa nga bhabhatisi, saseka vapizani vakwe —
3 i no suka Judhiya a tlhela Galileya.
4 Kanilezvi zvi wa lava ku a tsemakanya hi Samariya.
5 Hikwalaho, i no chikela Sikari, gi nga dhoropa ga Samariya, kusuhani ni petso lowu Jakobe a nga nyikile Josefa, a n’wana wakwe.+
6 Kwalaho, ku wa hi ni hlowo ya Jakobe.+ Makunu lezvi Jesu a nga karele hi ku famba, i no tshama laha hloweni.* Zvi wa hi kwalomu ka hora ya wu 6.*
7 Ku nota wasati wa muSamariya a takha mati. Jesu aku kakwe: “Hi nga ndzi nyika ndzinwa.”
8 (A vapizani vakwe va wa yile dhoropeni va ya xava zvakuga.)
9 A wasati wa muSamariya i te ngalo kakwe: “Hikuyini u kombelako mati ka mina wasati wa muSamariya kuveni wena u muJudha?” (Hakuva a vaJudha va wa nga gelani ni vaSamariya.)+
10 Jesu i no mu hlamula, aku: “Loku u wa ci tivile a cinyikiwo ca mahala ca Nungungulu+ ni lezvaku himani loyi a ku byelako, aku: ‘Hi nga ndzi nyika ndzinwa’, na u kombelile yena, niku yena na a ku nyikile a mati ya wutomi.”+
11 Aku kakwe: “Bava, ne cigobhoza* a wu naco, kuveni a hlowo yi etile. Makunu u ma kuma kwihi a mati lawo ya wutomi ke?
12 Wova wa hombe a ku hundza kokwani wa hina Jakobe, loyi a hi nyikileko a hlowo leyi, a nganwa ka yona yena ni vana vakwe ni mitlhambi yakwe?”
13 Jesu i no mu hlamula, aku: “Ni wihi a nwako mati lawa i ta tlhela azwa tora.
14 Kanilezvi loyi a nwako a mati lawa ndzi to mu nyika a nga ta ha gizwa kambe tora,+ kanilezvi a mati lawa ndzi to mu nyika ma ta maha a cibuka ca mati ndzeni kakwe, lawa ma vhelako ma nyika wutomi ga pindzukelwa.”+
15 A wasati aku kakwe: “Bava, ndzi nyike mati lawo, kasi ndzi nga hazwi tora ne ku khiringela ka wutshamu legi ndzi takha mati.”
16 I te ngalo kakwe: “Famba u ya vitana nuna wa wena u wuya naye laha.”
17 A wasati i no hlamula, aku: “A ndzi na nuna.” Jesu aku kakwe: “U wula zvona loku uku: ‘A ndzi na nuna.’
18 Hakuva u vile ni ntlhanu wa vanuna, niku a wanuna loyi u nga naye zvalezvi a hi nuna wa wena. Hikwalaho, u wula lisine.”
19 A wasati aku ngalo kakwe: “Bava, ndza zvi wona lezvaku u muphrofeti.+
20 A vakokwani va hina va wa khozela ka citsunga leci, kanilezvi n’wina mu ngalo a vanhu va fanele ku ya khozela le Jerusalema.”+
21 Jesu aku kakwe: “Wasati, kholwa ka mina: Cata cikhati leci mu to kala ku khozela Papayi ka citsunga leci ne le Jerusalema.
22 N’wina mu khozela leci mu nga ci tiviko;+ hina hi khozela leci hi ci tivako hakuva a kuhanyiswa kuta hi ka vaJudha.+
23 Hambulezvo, cata cikhati niku hi caleci, laha a vakhozeli va lisine va to khozela Papayi hi moya ni lisine, hakuva Papayi i hlota vanhu lavo lezvaku va mu khozela.+
24 Nungungulu i Moya,+ niku lava va mu khozelako va fanele ku mu khozela hi moya ni lisine.”+
25 A wasati aku kakwe: “Ndza zvi tiva lezvaku Mesiya wata, loyi a vitaniwako ku hi Kristu. A cikhati leci a to chikela, i ta hi tlhamusela zvilo zvontlhe.”
26 Jesu aku kakwe: “Mina yaloyi ndzi wulawulako na wena, hi mina yena.”+
27 Zvalezvo a vapizani vakwe va no chikela, va hlamala nguvhu hi lezvi a nga kari a wulawula ni wasati. Hambulezvo, i hava a nga mu wutisa ku: “U lava yini?” kutani ku: “Hikuyini u wulawulako naye?”
28 Hikwalaho, a wasati i no siya fuko yakwe ya mati, aya dhoropeni a ya byela vanhu, aku:
29 “Tanani mu ta wona a wanuna a ndzi byelileko zvontlhe lezvi ndzi nga maha. A kova yena Kristu ke?”
30 Va no huma dhoropeni, vata kakwe.
31 Ka cikhatana caleco, a vapizani va wa mu khongotela, vaku: “Rabi,+ gana.”
32 Kanilezvi i te ngalo kabye: “Ndzi na ni zvakuga zva ku a mu zvi tivi.”
33 Hikwalaho, a vapizani va no wutisana, vaku: “Kova ni munhu a nga mu tela ni zvakuga?”
34 Jesu aku kabye: “A zvakuga zva mina ku maha kurandza ka loyi a ndzi rumileko+ ni ku mbheta a ntiro wakwe.+
35 Mu ngalo ka ha kiyela a mune wa tihweti kasi ku chikela a kutshovela, a hi zvona ke? Ndza wula ka n’wina, ndziku: Tlakusani matihlo ya n’wina mu cuwuka masimu lezvaku ma te xwe kasi ma tshovelwa.+
36 A mutshoveli wa amukela a hakhelo yakwe ni ku hlengeleta mihandzu leyi yi toga tshomba ya wutomi ga pindzukelwa, kasi a mubyali ni mutshoveli va tsaka zvin’we.+
37 Hi cigelo leco, a mhaka leyi yi wula lisine loku yiku: A mun’we mubyali, a mun’wani mutshoveli.
38 Ndzi mu rumile ku ya tshovela lezvi mu nga kala ku zvi tirela. A van’wani va tirile, n’wina mu vhuneka hi ntiro wabye.”
39 A vaSamariya vo tala va ngata hi dhoropeni lego va no kholwa kakwe hi lezvi va ngazwa a wukustumunyu ga wasati loyi a ngaku: “I ndzi byelile zvontlhe lezvi ndzi nga maha.”+
40 Hikwalaho, loku a vaSamariya va chikele kakwe, va no mu kombela ku a tshama navo. I no tshama navo masiku mambiri.
41 Hi kota ya lezvo, a votala va no kholwa hi kuzwa lezvi a nga wula,
42 vaku ka wasati: “A ha ha kholwi ntsena hi lezvi u nga hi byela, hakuva hi zvi zwile ha hoce, makunu ha zvi tiva lezvaku hakunene a wanuna loyi hi yena muhanyisi wa tiko.”+
43 Andzhako ka masiku mambiri, i no suka laho aya Galileya.
44 Jesu i no nyika wukustumunyu hi yece ga ku a muphrofeti a nga dzundziwi tikweni gakwe.+
45 Hikwalaho, a cikhati leci a nga chikela Galileya, a vaGalileya va no mu amukela khwatsi, hakuva va wa wonile zvilo zvontlhe lezvi a nga mahile mubuzweni le Jerusalema,+ hakuva vonawu va wa yile mubuzweni.+
46 I no tlhela aya Kana wa Galileya, laha a nga cicile mati ma maha vhinyo.+ Makunu ku wa hi ni hosana yi nga babyelwa hi n’wana le Kapernawume.
47 A cikhati leci a wanuna loye a ngazwa lezvaku Jesu i sukile hi Judhiya aya Galileya, i noya kakwe a ya mu kombela lezvaku a relela a ya hanyisa n’wana wakwe, hakuva i wa hi kusuhani ni kufa.
48 Kanilezvi Jesu i te ngalo kakwe: “Loku n’wina mu nga woni zviwoniso ni zvihlamaliso, cima mu nga ta kholwa.”+
49 A hosana yi no mu hlamula, yiku: “Hosi, relela a n’wana wa mina na a nga sefa.”
50 Jesu aku kakwe: “Tlhela kaya; a n’wana wa wena i hanyile.”+ A wanuna loye i no kholwa a mhaka leyi Jesu a nga mu byela, a suka a famba.
51 Kanilezvi na a ha relela, a malandza yakwe ma no mu khinga ma mu byela lezvaku a n’wana wakwe i hanyile.*
52 Hikwalaho, i no ma wutisa a cikhati leci a nga kalamuka hi cona. Ma no mu hlamula, maku: “A feveri yi mu tsikile tolo hi hora ya wu 7.”*
53 A papayi wa kona i no zvi tiva lezvaku kuve ka hora leyo Jesu a nga mu byela ku: “A n’wana wa wena wa hanya.”+ Hikwalaho, yena ni ngango wakwe wontlhe va no kholwa.
54 Leci ciwoniso ca wumbiri+ leci Jesu a nga maha le Galileya na ata hi le Judhiya.
Mitlhamuselo ya lahasi
^ Kutani: “cibukeni”.
^ Ku nga kwalomu ka dhina.
^ Kutani: “bhaketi”.
^ Kutani: “wa chukwata”.
^ Ku nga kwalomu ka ma 13 hora.
