Hi kutsala ka Johani 5:1-47
5 Andzhako ka lezvo, ku nova ni mubuzo+ wa vaJudha; Jesu i no kandziha aya Jerusalema.
2 Le Jerusalema ku na ni citivana laha Nyangweni ya Tiyivhu,+ leci hi ciHebheru ci vitaniwako ku i Bhetesdha, ci nga ni ntlhanu wa tigumbagumba.
3 Ka tigumbagumba leto, ku wa etlela a citshungu ca hombe ca vababyi, ni zvikhumu, ni zvilima, ni lava va khanyeneko* zviro.
4 *——
5 Ka wutshamu lego ku wa hi ni wanuna a nga babya hi 38 wa malembe.
6 Laha Jesu a nga mu wona na a etlele laho, na a zvi tiva lezvaku i na ni cikhati co leha na a babya, i te ngalo kakwe: “Wa zvi lava ku hanya?”+
7 A wanuna loye wo babya i no mu hlamula, aku: “Bava, a ndzi na munhu wa ku ndzi peta lomu citivaneni a cikhati leci a mati ma vhindlukako, hakuva loku ndza haya, a mun’wani o relela a ndzi rangela.”
8 Jesu aku kakwe: “Suka u yima, u teka sango ga wena u famba.”+
9 Zvalezvo a wanuna loye i no hanya, a teka sango gakwe a sangula ku famba.
A siku lego gi wa hi sabhadho.
10 Hikwalaho, a vaJudha va no byela a wanuna loye a nga hanyisilwe, vaku: “Nyamutlha i sabhadho, a nayo a wu vhumeli ku u rwala sango.”+
11 Kanilezvi i no va hlamula, aku: “Loyi a nga ndzi hanyisa hi yena a nga ndzi byela, aku: ‘Teka sango ga wena u famba.’”
12 Va no mu wutisa, vaku: “Himani yaloye a nga ku byela ku, ‘Teka sango ga wena u famba’?”
13 Kanilezvi a wanuna loye a nga hanyisilwe i wa nga zvi tivi lezvaku hi mani, hakuva Jesu i wa nyamalele cikari ka citshungu leci ci nga hi laho.
14 Andzhako ka lezvo, Jesu i no kuma wanuna loye lomu tempeleni, aku kakwe: “Wa zvi wona ku u hanyile. U nga ha wonhi kambe kasi u nga humelelwi hi nchumu wo biha ku hundza lowu.”
15 A wanuna loye i no suka a famba, a ya byela vaJudha lezvaku hi Jesu a nga mu hanyisa.
16 Hikwalaho, a vaJudha va no sangula ku vhukela Jesu, hakuva i wa maha zvilo lezvi hi sabhadho.
17 Kanilezvi i no va hlamula, aku: “A Papayi wa mina wa ha tira kala ni lezvi, niku minawu ndza ha tira.”+
18 Hi cigelo leco, a vaJudha va no sangula ku hlota tindlela tontlhe kasi ku mu daya hakuva i wa nga hambunyeti a sabhadho basi, kanilezvi i wa tlhela aku Nungungulu i Papayi wakwe,+ a ti fananisa na Nungungulu.+
19 Hikwalaho, Jesu i no va hlamula, aku: “Ndza tiyisisa ka n’wina, ndziku: A N’wana a nga zvi randzi a maha nchumu hi kutisangulela kakwe, kanilezvi i maha lezvi a zvi wonileko na zvi mahiwa hi Papayi.+ Hakuva zvontlhe lezvi Papayi a mahako, a N’wana yenawu i zvi mahisa zvalezvo.
20 Hakuva Papayi wa mu randza N’wana,+ a mu komba zvontlhe lezvi a mahako, niku i ta mu komba mitiro ya hombe yo hundza leyi, kasi n’wina mu hlamala.+
21 Hakuva khwatsi hi lezvi Papayi a vhuxako vafileko a va hanyisa,+ a N’wana yenawu i hanyisa ni wihi a mu lavako.+
22 Hakuva Papayi a nga lamuli munhu, kanilezvi i hendleletile a kulamula kontlhe ka N’wana,+
23 kasi vontlhe va kombisa cichavo ka N’wana a ku khwatsi hi lezvi va kombisako cichavo ka Papayi. Ni wihi a nga kombisiko cichavo ka N’wana a nga kombisi cichavo ka Papayi loyi a mu rumileko.+
24 Ndza tiyisisa ka n’wina, ndziku: Ni wihi a zwako mhaka ya mina a kholwa ka Loyi a ndzi rumileko i na ni wutomi ga pindzukelwa;+ a ngayi kulamulweni kanilezvi i humele kufeni a nghena wutomini.+
25 “Ndza tiyisisa ka n’wina, ndziku: Cata cikhati, niku hi caleci, laha a vafileko va tozwa gezu ga N’wana wa Nungungulu; lava va to ngha va dembile ndleve va ta hanya.
26 Hakuva kota lezvi Papayi a nga ni wutomi* ka yena wutsumbu,+ i nyikilewo ni N’wana a kuva ni wutomi ka yena wutsumbu.+
27 I mu nyikile a ntamu wa ku lamula,+ hakuva i N’wana wa munhu.+
28 Mu nga hlamali hi lezvi, hakuva cata cikhati leci vontlhe lava va nga zvilahleni va tozwa gezu gakwe+
29 va huma, lava va mahileko a zvilo zva zvinene va vhuka vaya wutomini, ni lava va mahileko a zvilo zva kubiha va vhuka vaya kulamulweni.+
30 A ndzi zvi randzi ndzi maha nchumu hi kutisangulela ka mina. Ndzi lamula hi kuya hi lezvi ndzi zvi zwako, niku a kulamula ka mina ku lulamile+ hakuva a ndzi mahi kurandza ka mina, kanilezvi ka loyi a ndzi rumileko.+
31 “Loku ndzi ti mahela wukustumunyu, a wukustumunyu ga mina a hi lisine.+
32 I kona a ndzi mahelako wukustumunyu, niku ndza zvi tiva lezvaku a wukustumunyu legi a ndzi mahelako lisine.+
33 Mu rumile vanhu ka Johani, niku i no kustumunya hi lisine.+
34 Hambulezvo, a ndzi vhumeli a wukustumunyu ga munhu, kanilezvi ndzi wula zvilo lezvi kasi mu fela ku poniswa.
35 A wanuna loye i wa hi kandiya yi vhurako yi woninga. Hi cikhatana mu wa xuva ku tsaka nguvhu kuwonekeleni kakwe.+
36 Kanilezvi ndzi na ni wukustumunyu ga hombe ga ku hundza legi ga Johani, hakuva a mitiro leyi a Papayi wa mina a ndzi rumileko ku maha, ku nga yaleyi ndzi mahako, ya kustumunya lezvaku ndzi rumilwe hi Papayi.+
37 Hambu Papayi loyi a ndzi rumileko i mahile wukustumunyu hi mina.+ N’wina a mu sezwa gezu gakwe, ne ku wona nghohe yakwe,+
38 niku a mhaka yakwe a yi tshami ka n’wina, hakuva a mu kholwi ka loyi a mu rumileko.
39 “N’wina mu hlola Mitsalo+ na mu alakanya lezvaku mu ta kuma hi yona wutomi ga pindzukelwa; kanilezvi hi yona yi nyikako wukustumunyu hi mina.+
40 Hambulezvo, a mu zvi lavi kuta ka mina+ kasi mu fela ku kuma wutomi.
41 A ndzi vhumeli wudzundzo ga vanhu,
42 kanilezvi ndza zvi tiva khwatsi lezvaku a mu na lirandzo la Nungungulu.
43 Ndzi tile hi vito ga Papayi wa mina kanilezvi a mu ndzi amukelangi. Loku a wokari i wota hi vito ga yena n’winyi mu wa ta mu amukela.
44 Mu ta kholwisa kuyini na mu vhumela ku dzundzana, kuveni a mu hloti a wudzundzo legi gi tako hi ka Nungungulu a nga yece?+
45 Mu nga alakanyi lezvaku ndzi ta mu kecara ka Papayi; i kona loyi a mu kecarako, ku nga Mosi,+ loyi n’wina mu mu tsumbako.
46 Kunene, loku mu wa kholwile ka Mosi, na mu kholwa ka minawu hakuva yena i tsalile xungetano hi mina.+
47 Kanilezvi loku mu nga kholwi lezvi a zvi tsalileko, mu ta zvi kholwisa kuyini lezvi ndzi wulako ke?”
