Hi kutsala ka Johani 6:1-71
6 Andzhako ka lezvo, Jesu i no tlhatuka Bimbi ga Galileya, kutani Bimbi ga Tibheriya.+
2 I no simama ku landzelwa hi citshungu ca hombe,+ hakuva ci wa wona a zviwoniso lezvi a nga kari a zvi maha zva ku hanyisa vababyi.+
3 Hikwalaho, Jesu i no kandziha citsungeni a ya tshama laho ni vapizani vakwe.
4 Makunu a Phasika,+ gi nga mubuzo wa vaJudha, gi wa hi kusuhani.
5 Laha Jesu a nga tlakusa matihlo a wona citshungu ca hombe leci ci nga kari cita kakwe, i te ngalo ka Filipu: “Hi ta xava kwihi a tipawa ta ku nyika vanhu lava vaga?”+
6 Kanilezvi i wa wula lezvo kasi ku mu ringa, hakuva i wa zvi tiva lezvi a nga lava ku maha.
7 Filipu i no mu hlamula, aku: “A tipawa ta 200 wa tidhenario* a ti eneli ku gisa vanhu lava hambu loku a mun’we ni mun’wani o khema kutsongwani ntsena.”
8 Andrewu, a mun’we wa vapizani vakwe, a makabye wa Simoni Pedro, i te ngalo kakwe:
9 “Ku na ni mufanyana laha a nga ni ntlhanu wa tipawa ta sevhadha ni zvinjhanjhana zvimbiri. Kanilezvi, zvi ta siza yini ka vanhu vo talisa lezvi ke?”+
10 Jesu aku: “Tshamisani vanhu lahasi.” Lezvi ku nga hi ni byanyi go tala ka wutshamu lego, a vavanuna va no tshama lahasi; va wa hi cipimo ca 5000.+
11 Jesu i no teka tipawa, niku laha a nga bongile, i no avela lava va nga tshamile laho. I no maha lezvo kambe hi zvinjhanjhana, vaga kala va xura.
12 Laha va nga gile va xura, i te ngalo ka vapizani vakwe: “Hlengeletelani a zvikhemu lezvi zvi seleko kasi ku nga luzi nchumu.”
13 Hikwalaho, va no hlengeletela a zvikhemu lezvi zvi nga siyilwe hi lava va nga gile a ntlhanu wa tipawa ta sevhadha, va tata a 12 wa zvindzala.*
14 A cikhati leci a vanhu va nga wona a cihlamaliso leci a nga maha, va te ngalo: “Loyi hakunene hi yena a Muphrofeti loyi a nga wa tata tikweni.”+
15 Makunu Jesu na a zvi tiva lezvaku va lava kuta kakwe va ta mu kurumeta ku maha hosi yabye, i no nyemuka+ aya kambe citsungeni na a hi yece.+
16 Laha gi nga pelile, a vapizani vakwe va no relela bimbini,+
17 va ya nghena ngalaveni va tsemakanya bimbi vaya Kapernawume. Ka cikhati leco gi wa phumile, kanilezvi Jesu i wa nga seya kabye.+
18 A bimbi gi wa kari gi vhindluka hi kota ya moya wa hombe lowu wu nga kari wuba.+
19 Loku va bondzile makasiya hi cipimo ca 5 kutani 6 wa tikilometro,* va no wona Jesu na a famba hehla ka bimbi, a tshinela ngalaveni, va se chava.
20 Kanilezvi i te ngalo kabye: “Hi mina; mu nga chavi!”+
21 Hikwalaho, va no mu tsika a nghena ngalaveni. Zvalezvo, a ngalava yi no chikela lomu va ngaya kona.+
22 Hi mandziko wa kona, a citshungu leci ci nga sele ka tlhelo legi gin’wani ga bimbi ci no wona lezvaku ku wa nga hi na ngalava laho. Ku wa vile ni ngalava ya yitsongwani laho, kanilezvi Jesu i wa nga nghenangi ka yona zvin’we ni vapizani vakwe, hakuva a vapizani vakwe va wa fambile voce.
23 Kanilezvi ku no chikela tingalava ta le Tibheriya, kusuhani ni laha va nga gele kona tipawa andzhako ka loku a Hosi yi bongile.
24 Hikwalaho, laha a citshungu ci nga wona lezvaku Jesu ni vapizani vakwe va wa nga hi kona laho, va no nghena tingalaveni tabye vaya Kapernawume va ya lavetela Jesu.
25 A cikhati leci va nga mu kuma le tlhatuko wa bimbi, va te ngalo kakwe: “Rabi,+ u chikele rini laha?”
26 Jesu i no va hlamula, aku: “Ndza tiyisisa ka n’wina, ndziku: A mu ndzi laveteli hi lezvi mu nga wona zviwoniso, kanilezvi hi lezvi mu ngaga tipawa mu xura.+
27 Mu nga tireli zvakuga lezvi zvi mbhelako, kanilezvi tirelani a zvakuga lezvi zvi simamako kala wutomini ga pindzukelwa,+ lezvi a N’wana wa munhu a to mu nyika; hakuva hi yena loyi Papayi — Nungungulu wutsumbu — a mu vekeleko cifungo ca lezvaku wa xalala hi yena.”+
28 Hikwalaho, va te ngalo kakwe: “Zvini hi faneleko ku maha kasi hi maha mitiro ya Nungungulu ke?”
29 Jesu i no va hlamula, aku: “A ntiro wa Nungungulu hi lowu wa kuva mu kombisa kukholwa ka loyi a mu rumeleko.”+
30 Hi kulandzela va no mu wutisa, vaku: “Ciwoniso muni u to maha kasi hi fela ku ci wona hi kholwa ka wena ke?+ I ntiro muni u to maha?
31 A vakokwani va hina va gile mana ciwuleni,+ kota lezvi zvi tsalilweko zvaku: ‘I no va nyika pawa ya le tilweni kasi vaga.’”+
32 Hi kulandzela, Jesu aku kabye: “Ndza tiyisa ka n’wina, ndziku: Mosi a nga mu nyikangi a pawa ya le tilweni, kanilezvi a Papayi wa mina wa mu nyika a pawa ya lisine ya le tilweni.
33 Hakuva a pawa ya Nungungulu hi loyi a relelako hi le tilweni a ta nyika wutomi ka tiko.”
34 Vaku ngalo kakwe: “Hosi, hi nyike a pawa leyo contlhe cikhati.”
35 Jesu aku kabye: “Mina ndzi pawa ya wutomi. Ni wihi loyi a tako ka mina a nga ta hazwa ndlala, ni loyi a kombisako kukholwa ka mina a nga ta hazwa tora.+
36 Kanilezvi a ku khwatsi hi lezvi ndzi mu byelileko, mu sina mu ndzi wonile hambulezvo a mu kholwi.+
37 Vontlhe lava Papayi a ndzi nyikako va tata ka mina, niku loyi a tako ka mina ndzi nga ta tshuka ndzi mu hlongola;+
38 hakuva ndzi relele hi le tilweni+ kasi ku ta maha a kurandza ka loyi a ndzi rumileko na ku nga hi kurandza ka mina.+
39 A kurandza ka loyi a ndzi rumileko hi lezvaku ndzi nga lahli ne mun’we wa vontlhe lava a ndzi nyikileko, kanilezvi ndzi va vhuxa+ hi siku go gumesa.
40 Hakuva a kurandza ka Papayi wa mina hi lezvaku ni wihi loyi a vhumelako N’wana, a tlhela a kombisa kukholwa kakwe a kuma a wutomi ga pindzukelwa,+ niku ndzi ta mu vhuxa+ hi siku go gumesa.”
41 Hikwalaho, a vaJudha va no sangula ku mu ngurangurela hi lezvi a ngaku: “Ndzi pawa yi releleko hi le tilweni.”+
42 Vaku ngalo: “A hi yena Jesu loyi, a n’wana wa Josefa, loyi a papayi wakwe ni mamani wakwe hi va tivako?+ Makunu hikuyini a wulako ku: ‘Ndzi relele hi le tilweni’?”
43 Jesu i no va hlamula, aku: “Hi nga tsikani ku ngurangura.
44 A ku na munhu a zvi kotako kuta ka mina, ahandle ka loku a kokiwa hi Papayi loyi a ndzi rumileko,+ niku ndzi ta mu vhuxa hi siku go gumesa.+
45 Lomu ka Vaphrofeti ku tsalilwe ku ngalo: ‘Vontlhe va ta gondzisiwa hi Jehovha.’*+ Ni wihi a ingisako Papayi, a gondza kakwe, wata ka mina.
46 A ku na munhu a wonileko Papayi,+ saseka loyi a tako hi ka Nungungulu; hi yena a wonileko Papayi.+
47 Ndza tiyisa ka n’wina, ndziku: Loyi a kholwako i na ni wutomi ga pindzukelwa.+
48 “Mina ndzi pawa ya wutomi.+
49 A vakokwani va n’wina va gile a mana ciwuleni hambulezvo va file.+
50 Leyi i pawa yi relelako hi le tilweni, kasi ni wihi a yi gako a ngafi.
51 Mina ndzi pawa yi hanyako yi releleko hi le tilweni. Loku munhu aga a pawa leyi i ta hanya kala kupindzuka; kunene, a pawa leyi ndzi to mu nyika i nyama ya mina leyi ndzi to yi nyikela kasi a tiko gi hanya.”+
52 A vaJudha va no sangula ku kanetisana, vaku: “A wanuna loyi a nga hi nyikisa kuyini a nyama yakwe higa?”
53 Jesu i no va hlamula, aku: “Ndza tiyisisa ka n’wina, ndziku: Loku mu ngagi a nyama ya N’wana wa munhu ni kunwa a nkhata wakwe a mu na wutomi ka n’wina.+
54 Ni wihi a gako nyama ya mina ni kunwa nkhata wa mina i na ni wutomi ga pindzukelwa, niku ndzi ta mu vhuxa+ hi siku go gumesa;
55 hakuva a nyama ya mina i zvakuga zva lisine, ni nkhata wa mina kunwa ka lisine.
56 Ni wihi a gako nyama ya mina ni kunwa nkhata wa mina i simama zvin’we na mina, minawu ndzi simama zvin’we naye.+
57 Khwatsi hi lezvi Papayi loyi a hanyako a ndzi rumileko, ni lezvi ndzi hanyako hi kota ya Papayi, hi zvalezvo kambe, loyi a ndzi gako i ta hanya hi kota ya mina.+
58 Leyi i pawa yi releleko hi le tilweni. A yi koti leyi a vakokwani va n’wina va ngaga va gumesa vafa. Loyi a gako a pawa leyi i ta hanya kala kupindzuka.”+
59 I wulile timhaka leti a cikhati leci a nga gondzisa sinagogeni* le Kapernawume.
60 A cikhati leci va ngazwa lezvo, a kutala ka vapizani vakwe va te ngalo: “A timhaka leti ta tshisa; himani wa ku a nga ti ingisela ke?”
61 Kanilezvi, Jesu na a zvi tiva lezvaku a vapizani vakwe vo ngurangura hi mhaka leyi, i te ngalo kabye: “A mhaka leyi ya mu khunguvanyisa?
62 Makunu ahati loku mu wo wona a N’wana wa munhu na a tlakuka aya lomu a nga hi kona kusanguleni?+
63 A moya hi wona wu nyikako wutomi,+ a nyama a yi vhuni nchumu. A timhaka leti ndzi nga mu byela i moya ni wutomi.+
64 Kanilezvi ku na ni vokari cikari ka n’wina va nga kholwiko.” Hakuva Jesu i wa va tiva kusukela kusanguleni lezvaku hi vamani lava va nga kala va nga kholwi niku hi mani loyi a to mu tokometa.+
65 I no engeta, aku: “Hi caleci ci nga ndzi maha ndzi mu byela, ndziku: A ku na munhu a zvi kotako kuta ka mina ahandle ka loku a vhumelelwa hi Papayi.”+
66 Hi kota ya lezvo, a kutala ka vapizani vakwe va no tlhelela ka zvilo lezvi va nga zvi tsikile,+ a va ha fambafambangi naye.
67 Hikwalaho, Jesu i te ngalo ka lava va 12: “N’winawu mu lava ku famba ke?”
68 Simoni Pedro i no mu hlamula, aku: “Hosi, hi taya ka mani?+ Wena u na ni timhaka ta wutomi ga pindzukelwa.+
69 Hi kholwile niku ha zvi tiva lezvaku hi wena Loyi wa Kubasa wa Nungungulu.”+
70 Jesu i no va hlamula, aku: “Ndzi hlawulile n’wina va 12, a hi zvona ke?+ Hambulezvo, a mun’we wa n’wina i sathani.”*+
71 I wa wula Judhasi, a n’wana wa Simoni Iskariyoti, hakuva hi yena a nga lava ku mu tokometa, hambu lezvi a nga hi mun’we wa lava va 12.+
Mitlhamuselo ya lahasi
^ Kutani: “zvirundzu”.
^ Zvi nga maha na zvi wula ku: “laha ku nga hlengeletene vanhu”.
^ Kutani: “dhiyabho”.