Hi kutsala ka Johani 7:1-52
7 Andzhako ka lezvo, Jesu i no simama ku fambafamba Galileya hakuva i wa nga zvi lavi kuya Judhiya hi kota ya lezvi a vaJudha va nga lava ku mu daya.+
2 Kanilezvi a Mubuzo wa Matabhernakeli*+ wa vaJudha wu wa hi kusuhani.
3 Hikwalaho, a vamakabye vakwe+ va te ngalo kakwe: “Suka uya Judhiya kasi a vapizani va wena va fela ku yi wonawu a mitiro leyi u mahako.
4 Hakuva a nga kona a mahako nchumu cihundleni na a lava ku tiviwa kubaseni. Lezvi u mahako a mitiro leyi, ti kombekise mahlweni ka vanhu.”
5 Hi lisine, a vamakabye vakwe va wa nga kombisi kukholwa kakwe.+
6 Hikwalaho, Jesu i te ngalo kabye: “A cikhati ca mina a ci se chikela,+ kanilezvi n’wina mu nga maha lezvo ni ka cihi cikhati.
7 A tiko a gi na cigelo ca ku mu venga, kanilezvi mina ga ndzi venga hakuva ndza kustumunya lezvaku a mitiro ya gona yi bihile.+
8 N’wina fambani mubuzweni; mina a ndzi se lava ku famba mubuzweni lowu, hakuva a cikhati ca mina a ci se tatiseka.”+
9 Hikwalaho, loku a va byelile lezvo, i no sala Galileya.
10 Kanilezvi laha a vamakabye vakwe va nga sukile vaya mubuzweni, yenawu i no sala a suka na zvi nga tiviwi hi munhu.
11 Hikwalaho, a vaJudha va no sangula ku mu lavetela laha mubuzweni na vaku: “Kasi i kwihi inaloyi?”
12 Cikari ka zvitshungu, a votala va wa hlevetela hi yena, vaku: “Munhu wa munene.” Kanilezvi a van’wani va waku: “A hi munene. I hambukisa citshungu.”+
13 Hambulezvo, i hava a nga tiya ku wulawula hi yena laha kubaseni hakuva va wa chava vaJudha.+
14 Laha a mubuzo wu nga hi laha cikari, Jesu i no kandziha aya tempeleni a ya sangula ku gondzisa.
15 A vaJudha va no hlamala nguvhu, vaku: “Kasi a wanuna loyi i yi tivisa kuyini Mitsalo+ kuveni a nga gondzangi zvikoleni?”*+
16 Jesu i no va hlamula, aku: “Lezvi ndzi gondzisako a hi zva mina, kanilezvi zva loyi a ndzi rumileko.+
17 Loku a wokari a xuva ku maha a kurandza ka Loyi a ndzi rumileko i ta zvi tiva lezvaku lezvi ndzi zvi gondzisako zvita hi ka Nungungulu+ kutani ndzo ti sangulela ke.
18 Ni wihi loyi a wulawulako hi kutisangulela kakwe i ti lavela wudzundzo; kanilezvi loyi a lavako ku dzundza loyi a mu rumileko+ i wula lisine niku a kungalulami a ku kona kakwe.
19 Kasi Mosi a nga mu nyikangi Nayo+ ke? Kanilezvi a nga kona cikari ka n’wina a wu ingisako. Hikuyini mu lavako ku ndzi daya?”+
20 A citshungu ci no hlamula, ciku: “Wena u na ni dhimoni. Himani a lavako ku ku daya?”
21 Jesu i no va hlamula, aku: “Ndzi mahile cihlamaliso cin’we, n’wentlhe mu hlamala.
22 Hi cigelo leco, Mosi i mu nyikile a nayo wa ku maha wukwera,*+ na ku nga hi lezvaku wu wa sukela ka yena kanilezvi wu wa sukela ka vakokwani,+ niku n’wina ma mahisa munhu wukwera hi sabhadho.
23 Loku n’wina mu mahisa munhu wukwera* hambu hi sabhadho kasi mu nga hambunyeti a Nayo wa Mosi, hikuyini mu ndzi zangarelako nguvhu hi lezvi ndzi nga hanyisa munhu hi sabhadho?+
24 Tsikani ku lamula hi nghohe, kanilezvi lamulani hi kululama.”+
25 Andzhako ka lezvo, a vokari va nga hanya Jerusalema va no sangula ku wula lezvi: “Kasi a hi yena wanuna loyi va lavako ku mu daya ke?+
26 Kanilezvi hi nga wonani! o wulawula laha kubaseni, kanilezvi a va wuli nchumu kakwe. A ku a tihosi ti noza ti kholwa lezvaku hakunene loyi hi yena Kristu?
27 Kanilezvi hina ha ku tiva lomu a tako hi kona wanuna loyi;+ niku a cikhati leci Kristu a tota, i hava a to ku tiva lomu a sukelako kona.”
28 Laha Jesu a nga kari a gondzisa tempeleni, i no tlakusa gezu, aku: “N’wina ma ndzi tiva, ni lomu ndzi tako hi kona ma ku tiva. A ndzi zvi sukelangi ndzita,+ Loyi a ndzi rumileko wa lisine kanilezvi n’wina a mu mu tivi.+
29 Mina ndza mu tiva+ hakuva ndzi muyimeli wakwe; hi Yena a nga ndzi ruma.”
30 Hikwalaho, va no lava ku mu khoma+ kanilezvi i hava a nga mu khoma hakuva a cikhati cakwe ci wa nga se chikela.+
31 Hambulezvo, a kutala ka vanhu cikari ka citshungu va no kholwa kakwe,+ vaku: “A cikhati leci Kristu a tota, ina i ta maha zviwoniso zvo hundza lezvi zvi mahiwako hi wanuna loyi?”
32 A vaFarisi va nozwa lezvi a citshungu ci nga kari ci zvi wula hi yena; makunu a vapristi lava va tihosana ni vaFarisi va no rumela varindzeli kasi va ya mu khoma.
33 Jesu i te ngalo: “Ndza ha ta tshama kutsongwani na n’wina na ndzi nga se tlhela ka Loyi a ndzi rumileko.+
34 Mu ta ndzi lavetela, kanilezvi mu nga ta ndzi kuma, ni laha ndzi toya kona mu nga ta zvi kota kuta.”+
35 Hikwalaho, a vaJudha va no byelana, vaku: “A wanuna loyi o lava kuya kwihi ko kala hi nga mu kumi? A ngo lava kuya ka vaJudha va hangalakileko cikari ka vaGreki a ya gondzisa vaGreki?
36 I lava ku wula yini loku aku: ‘Mu ta ndzi lavetela kanilezvi mu nga ta ndzi kuma, ni laha ndzi toya kona mu nga ta zvi kota kuta’?”
37 Ka siku go gumesa, gi nga hi siku ga hombe ga mubuzo,+ Jesu i no suka a yima a tlakusa gezu, aku: “Loyi a nga ni tora, i wate ka mina a tanwa.+
38 Ni wihi loyi a kholwako ka mina, kota lezvi yi wulako mitsalo: ‘Ku ta khulunga a micongo ya mati ya wutomi hi kueteni ka mbilu yakwe’.”+
39 Kanilezvi i wa wula lezvi xungetano hi moya lowu lava va kholwako kakwe va nga lava ku wu amukela; hakuva ku wa nga seva ni moya+ kota lezvi Jesu a nga kala a nga se tlakusiwa.+
40 A vokari cikari ka citshungu va ngazwa magezu lawo va te ngalo: “Loyi hakunene hi yena Muphrofeti.”+
41 A van’wani va waku: “Loyi hi Kristu.”+ Ni van’wani kambe vaku: “Ina Kristu ita hi Galileya?+
42 Kasi a Mitsalo a yi wuli lezvaku Kristu i ta huma hi ka pswalo wa Dhavhidha+ le Bhetlehema,+ cidhoropaneni leci Dhavhidha a nga huma ka cona ke?”+
43 Hikwalaho, a citshungu ci no hambana hi kota ya yena.
44 Hambu lezvi a vokari cikari kabye va nga lava ku mu khoma, i hava a nga tlhateka mandla hehla kakwe.
45 A cikhati leci a varindzeli va nga tlhela, a vapristi lava va tihosana ni vaFarisi va no va wutisa, vaku: “Hikuyini mu nga kala ku wuya naye?”
46 A varindzeli va no hlamula, vaku: “A ku se tshuka kuva ni munhu wa ku wulawulisa lezvi.”+
47 A vaFarisi va te ngalo kabye: “A mu no ya kanganyisiwa n’winawu?
48 Kova ni mufumeli kutani muFarisi a kholwako kakwe ke?+
49 Kanilezvi a citshungu leci, ci nga wu tiviko Nayo, ci rukatelwe.”
50 Nikodhemusi, loyi kusanguleni a nga yile kakwe, na a hi mun’we wabye, i te ngalo kabye:
51 “A Nayo wa hina wa kona munhu na va nga rangangi hi ku muzwa ni ku tiva lezvi a mahako ke?”+
52 Va no mu hlamula, vaku: “Wenawu a wota hi Galileya? Hlolisisa, u ta zvi wona lezvaku a ku na muphrofeti a to huma hi Galileya.”*
Mitlhamuselo ya lahasi
^ Kutani: “Michacha”.
^ Ku nga zvikola zva vaRabi.
^ Kutani: “tlula ngoma”.
^ Kutani: “tlulisa munhu ngoma”.
^ A kutala ka mabhuku yo tsumbeka ya kale a ma na vs. 53 kala cipimo 8, vs. 11.
