Hi kutsala ka Johani 8:12-59
8 12 Jesu i no engeta, aku kabye: “Mina ndzi kuwonekela ka tiko.+ Ni wihi a ndzi landzelako a nga ta famba munyameni, kanilezvi i tava ni kuwonekela+ ka wutomi.”
13 Hikwalaho, a vaFarisi va te ngalo kakwe: “Wena u ti kustumunyela ha wece; a wukustumunyu ga wena a hi lisine.”
14 Jesu i no va hlamula, aku: “Hambu loku ndzi ti kustumunyela hi ndzoce, a wukustumunyu ga mina lisine hakuva ndza ku tiva lomu ndzi tako hi kona ni lomu ndzi yako kona.+ Kanilezvi n’wina a mu ku tivi lomu ndzi tako hi kona ne lomu ndzi yako kona.
15 N’wina mu lamula hi ka nyama;*+ mina a ndzi lamuli munhu.
16 Hambu loku ndzi lamula, a kulamula ka mina ka lisine hakuva a ndzi ndzoce, kanilezvi Papayi, loyi a ndzi rumileko, i zvin’we na mina.+
17 Ahandle ka lezvo, lomu Nayweni wa n’wina ku tsalilwe ku ngalo: ‘A wukustumunyu ga vanhu vambiri lisine.’+
18 Mina ndza ti kustumunyela ha ndzoce, na Papayi loyi a ndzi rumileko wa ndzi kustumunyela.”+
19 Makunu va te ngalo kakwe: “Kasi i kwihi a Papayi wa wena?” Jesu i no hlamula, aku: “A mu ndzi tivi, ne Papayi wa mina a mu mu tivi.+ Loku mu wa ndzi tiva, na mu tiva ni Papayi wa mina kambe.”+
20 I wulile magezu lawa na a hi ka wutshamu legi ku nga vekiwa minyikelo,+ a cikhati leci a nga kari a gondzisa lomu tempeleni. Kanilezvi i hava a nga mu khoma, hakuva a cikhati cakwe ci wa nga se chikela.+
21 I no va byela kambe, aku: “Ndza famba, niku mu ta ndzi lavetela, kanilezvi mu ta fela kuwonheni ka n’wina.+ Laha ndzi toya kona mu nga ta zvi kota kuta.”+
22 Hi kota ya lezvo, a vaJudha va no sangula ku wula, vaku: “Kona a ngo lava ku ti daya? Hakuva i ngalo: ‘Laha ndzi yako kona mu nga ta zvi kota kuta.’”
23 I no engeta, aku kabye: “N’wina mu va laha misaveni; kanilezvi mina ndzi wa le tilweni.+ N’wina mu va tiko legi; kanilezvi mina a ndzi wa tiko legi.
24 Hi caleco ci ndzi mahileko ndzi mu byela, ndziku: Mu ta fela zviwonhweni zva n’wina. Hakuva loku mu nga kholwi lezvaku hi mina yena, mu ta fela zviwonhweni zva n’wina.”
25 Vaku kakwe: “Kasi hi wena mani?” Jesu i no va hlamula, aku: “Kona ndzi buvhela yini hi ku wulawula na n’wina?
26 Ndzi na ni zvilo zvo tala zva ku zvi wula hi n’wina ni ku lamula. Kunene, Loyi a ndzi rumileko i wulawula lisine, niku lezvi ndzi zvi zwileko kakwe hi zvalezvi ndzi zvi wulako tikweni.”+
27 A va zvi zwisisangi lezvaku i wa wulawula hi Papayi.
28 Makunu Jesu i te ngalo: “Andzhako ka loku mu tlakusile a N’wana wa munhu,+ hi kona mu to zvi tiva lezvaku hi mina yena,+ ni lezvaku a ndzi zvi randzi ndzi maha nchumu hi kutisangulela ka mina;+ kanilezvi ndzi wulawula timhaka leti Papayi a ndzi gondzisileko.
29 Loyi a ndzi rumileko i zvin’we na mina; a nga ndzi tsikangi ndzoce hakuva contlhe cikhati ndzi maha lezvi zvi mu tsakisako.”+
30 Laha a nga kari a wula timhaka leti, a votala va no kholwa kakwe.
31 Jesu i no engeta a byela vaJudha lava va nga kholwile kakwe, aku: “Mu vapizani va mina loku mu simama ku hlayisa a timhaka ta mina.
32 Mu ta tiva lisine,+ ni lisine li ta mu tlhatlhisa.”+
33 Va no mu hlamula, vaku: “Hina hi pswalo wa Abrahama, a hi se tshuka hiva tikhumbi ta munhu. Makunu, hikuyini u nge: ‘Mu ta tlhatlhiswa’?”
34 Jesu i no va hlamula, aku: “Ndza tiyisisa ka n’wina, ndziku: Ni wihi a wonhako i khumbi ya ciwonho.+
35 Ahandle ka lezvo, a khumbi a yi tshami laha mutini wa n’winyi wa yona kala kupindzuka, kanilezvi a n’wana i tshama kala kupindzuka.
36 Hikwalaho, loku a N’wana a mu tlhatlhisa, hakunene mu tlhatlhekile.
37 Ndza zvi tiva lezvaku mu vana va Abrahama. Kanilezvi mu lava ku ndzi daya hakuva a mu vhumeli lezvi ndzi gondzisako.
38 Ndzi wulawula hi zvilo lezvi ndzi zvi wonileko na ndza ha hi na Papayi wa mina,+ kanilezvi n’wina mu maha zvilo lezvi mu zvi zwileko ni papayi wa n’wina.”
39 Va no mu hlamula, vaku: “A papayi wa hina hi Abrahama.” Jesu aku ngalo kabye: “Loku mu wa hi vana va Abrahama,+ na mu maha mitiro ya Abrahama.
40 Kanilezvi, zvezvi mu lava ku ndzi daya, mina loyi ndzi nga mu byela lisine leli ndzi li zwileko ka Nungungulu.+ Abrahama a nga mahangi lezvo.
41 N’wina mu maha mitiro ya papayi wa n’wina.” Vaku ngalo kakwe: “A hi pswaliwangi hi wubhayi;* hi na ni Papayi mun’we, ku nga Nungungulu.”
42 Jesu aku kabye: “Loku Nungungulu i wa hi Papayi wa n’wina, na mu ndzi randza,+ hakuva ndzita hi ka Nungungulu niku ndzi laha. A ndzi zvi randzangi ndzita, kanilezvi hi Yena a nga ndzi ruma.+
43 Hikuyini mu nga zvi zwisisiko lezvi ndzi wulako? Hi lezvaku a mu zvi koti ku ingisela timhaka ta mina.
44 N’wina mu vana va papayi wa n’wina Dhiyabho, niku mu lava ku maha kurandza ka papayi wa n’wina.+ Yena mudayi kusukela kusanguleni;+ a nga simamangi lisineni hakuva a lisine a li kona kakwe. Loku a hemba, i hemba kota tshamela gakwe, hakuva muhembi ni papayi wa mawunwa.+
45 Kanilezvi mina ndzi mu byela lisine, hambulezvo a mu kholwi ka mina.
46 Himani cikari ka n’wina a ndzi konako aku ndzi muwonhi? Loku ndzi wula lisine, hikuyini mu kalako mu nga kholwi ka mina ke?
47 Loyi a nga wa Nungungulu wa ingisa timhaka ta Nungungulu.+ N’wina a mu ti ingisi hakuva a mu va Nungungulu.”+
48 A vaJudha va no mu hlamula, vaku: “Kasi ho hemba loku hiku: ‘Wena u muSamariya+ niku u na ni dhimoni’?”+
49 Jesu i no hlamula, aku: “A ndzi na dhimoni; ndzo dzundza Papayi wa mina kanilezvi n’wina ma ndzi kanyisa.
50 A ndzi ti laveli wudzundzo;+ i kona Loyi a gi lavako a tlhela a lamula.
51 Ndza tiyisisa ka n’wina, ndziku: Ni wihi loyi a hlayisako timhaka ta mina a nga ta tshuka afa.”+
52 A vaJudha va te ngalo kakwe: “Makunu ha zvi tiva lezvaku hakunene u na ni dhimoni. Abrahama i file ni vaphrofeti vonawu, kanilezvi wena u ngalo: ‘Ni wihi loyi a hlayisako timhaka ta mina a nga ta tshuka a ringa kufa.’
53 Wova wa hombe wena ku hundza a papayi wa hina Abrahama, loyi a ngafa ke? A vaphrofeti vonawu va file. U alakanya ku hi wena mani?”
54 Jesu i no hlamula, aku: “Loku ndzi ti dzundza, a wudzundzo ga mina a hi ga nchumu. Loyi a ndzi dzundzako hi Papayi wa mina+ loyi n’wina mu nge i Nungungulu wa n’wina.
55 Hambulezvo, n’wina a mu mu tivi,+ kanilezvi mina ndza mu tiva.+ Loku ndzi wa te a ndzi mu tivi, ndzi wa tava muhembi a ku fana na n’wina. Kanilezvi ndza mu tiva niku ndza hlayisa a timhaka takwe.
56 A papayi wa n’wina Abrahama i no tsaka nguvhu hi kuva ni kutsumba ka ku wona a siku ga mina, niku i gi wonile a tsaka.”+
57 A vaJudha va te ngalo kakwe: “Ne a wu na 50 wa malembe, makunu u mu wonisile kuyini Abrahama?”
58 Jesu i te ngalo kabye: “Ndza tiyisisa ka n’wina, ndziku: Ndzive kona Abrahama na a nga seva kona.”+
59 Hikwalaho, va no rola maribye kasi va mu hoxela, kanilezvi Jesu i no fihlala a gumesa a huma lomu tempeleni.
Mitlhamuselo ya lahasi
^ Kutani: “hi malamulela ya vanhu”.
^ Hi ciGreki: porneía. Wona Tlhamuselo wa magezu ya Bhibhiliya.