Joyeli 2:1-32
2 “Banani linanga* le Ziyoni!+
Banani tinyandha ta yimpi citsungeni ca mina co basa.
A vaaki vontlhe va tiko* va wa rurumele,Hakuva a siku ga Jehovha gata!+ Gi laha kusuhani!
2 I siku ga kuphuma ni munyama;+I siku ga marefu ni munyama wo tshisa,+Gi khwatsi kuwonekela ka wuronga ku hangalakako lomu zvitsungeni.
Ku na ni vanhu vo tala ni va ntamu.+A ku se tshuka kuva ni vanhu vo kota vona,Ne va nga ta ha tshuka vava kona kambeKa malembe ya zvizukulwana zvontlhe.
3 Mahlweni kabye, ku na ni ndzilo wu khadamulako,Ni le ndzhako kabye, ku na ni langavi gi hisako.+
A tiko legi gi nga mahlweni kabye gi fana ni jardhim ya Edheni,+Kanilezvi le ndzhako kabye ciwula,A ku na ca ku ci nga pona.
4 Va tshamisile ku khwatsi mahaxi,Va tsutsumisa ku khwatsi mahaxi ya yimpi.+
5 A guwa gabye gi fana ni ga tikareta loku ti tsutsuma le hehla ka zvitsunga,+Gi fana ni guwa ga ndzilo wu hisako byanyi.
Va fana ni vanhu va ntamu va xaxametilweko khwatsi a ku fana ni mitlawa ya masochwa.+
6 Hi kota yabye, a matiko ma ta karateka.
A tinghohe tontlhe ti ta chava.
7 Va dhumelisa ku khwatsi tinhenha,Va kandziha khurisi a ku khwatsi masochwa.A mun’we ni mun’wani i simama ku famba hi ndlela yakwe,Niku a va hambuki tindleleni tabye.
8 A va nikinyani;A wanuna mun’we ni mun’wani iya mahlweni hi ndlela yakwe.
Loku a matlhari ma wisa vokari,Lava van’wani a va fotholi a xaxameto.
9 Va dhumela dhoropa, va tsutsuma hi le hehla ka muro.
Va kandziha tiyindlu, va nghena hi majanela a ku khwatsi makhamba.
10 Mahlweni kabye, a tiko ga rurumela ni matilo ma tsekatseka.
A gambo ni hweti zvi mahile munyama,+Ni tinyeleti ti ta lahlekelwa hi kungangamela ka tona.
11 Jehovha i ta tlakusa gezu gakwe mahlweni ka butho gakwe,+ hakuva a wugovelo gakwe ga hombe nguvhu.+
Hakuva loyi a tatisako a mhaka Yakwe i na ni ntamu;Hakuva a siku ga Jehovha ga hombe niku ga tshisa.+
Himani a to gi tiyela?”+
12 “Hambu zvalezvi”, ku wula Jehovha, “wuyani ka mina hi timbilu ta n’wina tontlhe,+Na mu pfhunga,*+ ni ku rila ni kuba huwa.
13 Handzulani a timbilu ta n’wina,+ na ku nga hi tinguwo ta n’wina,+Mu tlhelela ka Jehovha, a Nungungulu wa n’wina,Hakuva wa zwela wusiwana, i na ni wuxinji, wa nonoka ku zangara+ niku i tele hi lirandzo li nga mbheliko;+I ta hlolisisa* khombo.
14 Himani a zvi tivako ku a nga ta tlhela ndzhako a hlolisisa,*+A siya cikatekiso,A munyikelo wa tindzhoho ni munyikelo wa zvakunwa kasi ku nyika Jehovha, a Nungungulu wa n’wina ke?
15 Banani linanga* le Ziyoni!
Yimisani* a siku ga kupfhunga,* mu ramba mutlhangano wo basa.+
16 Tlhanganisani vanhu, mu basisa a bandla.+
Hlengeletani zvikhosana,* mu tlhanganisa vanana ni zvivanana zva ha an’wako.+
A noivho yi wa hume hi ndlwini ya yona, ni noivha yi wa hume hi ndlwini ya yona ya wunoivha.
17 Cikari ka ligumbagumba ni alati,+Ngha a vapristi, a malandza ya Jehovha, va rila va tlhela vaku:
‘O Jehovha, va zwele wusiwana a vanhu va wena!U nga tsiki a tshomba ya wena yiva cihlekiso,Hi ku tsika matiko ma yi fumela.
A matiko ma wa ta wulela yini, maku: “I kwihi a Nungungulu wabye?”’+
18 Jehovha i ta pinyamela a tiko gakweA tlhela a va zwela wusiwana a vanhu vakwe.+
19 Jehovha i ta hlamula vanhu vakwe, aku:
‘Ndza mu rumelela a timbewu, ni vhinyo yiswa, ni mafura;Mu ta xura.+Ndzi nga ta ha mu tsika mu chepetiwa hi matiko.+
20 Ndzi ta hlongola loyi a tako hi le n’walungu* aya kule na n’wina;Ndzi ta mu hangalasa aya tikweni ga tora ni ga ciwula,A ntlawa wakwe lowu wo ranga na wu cuwukile bimbini ga mutsuwuka-gambo*Ni ntlawa wakwe wa le ndzhako na wu cuwukile bimbini ga mupela-gambo.*
A masema yakwe yo nyenyeza ma ta tlakukela hehla,A kunuha kakwe ku ta simama ku tlakukela hehla,+Hakuva Yena i ta maha zvilo zva hombe.’
21 U nga chavi, wena tiko.
Tsaka u nengela hakuva Jehovha i ta maha zvilo zva hombe.
22 Mu nga chavi n’wina zvivandza zva khwati,Hakuva a wuriselo ga ciwula gi ta nyuka,+Ni tisinya ti ta pswala mihandzu;+A nkuwu ni vhina* zvi ta pswala mihandzu yo tala.+
23 N’wina vana va Ziyoni, tsakani mu nengela ka Jehovha, a Nungungulu wa n’wina;+Hakuva i ta mu nyika vhula yo sangula hi mpimo wu nene;A mu nisela vhula ya hombe,A vhula yo sangula ni yo gumesa, a ku fana ni kale.+
24 A matshamu yo hulela kona ma ta tala hi timbewu ti hulilweko,Ni zvigowolo zvi ta tala zvi tlhela zvi halakela hi vhinyo yiswa ni mafura.+
25 Ndzi ta mu tlhelisela lezvi mu nga luza ka malembe lawo,Lezvi zvi gilweko hi ntlawa wa humbi, ni humbi yi nga hiko na tipapa, ni humbi yi lambileko, ni humbi yi pamileko,*Ku nga butho ga mina ga hombe legi ndzi gi rumeleko.+
26 Hakunene mu taga mu xura,+Niku mu ta dhumisa a vito ga Jehovha, a Nungungulu wa n’wina,+Loyi a mahileko zvihlamaliso hi kota ya n’wina;A vanhu va mina va nga ta ha tshuka va wisiwa tingana.+
27 N’wina mu ta zvi tiva lezvaku mina ndzi cikari ka Izrayeli+Ni lezvaku hi mina Jehovha, a Nungungulu wa n’wina+ — a ku na mun’wani!
A vanhu va mina va nga ta ha tshuka va wisiwa tingana.
28 Andzhako ka lezvo, ndzi ta chulula a moya wa mina+ hehla ka nyama ya tixaka tontlhe,Niku a vafana va n’wina ni vanhanyana va n’wina va ta phrofeta;A zvikhosana zva n’wina zvi ta lora miloro;A majaha ya n’wina ma ta wona miwoniso.+
29 Hambu hehla ka zvitiri zva mina zva cinuna ni zvitiri zva mina zva cisatiNdzi ta chulula a moya wa mina masikwini lawo.
30 Ndzi ta maha zvihlamaliso le matilweni ni laha misaveni:A nkhata, ni ndzilo, ni marefu ya musi.+
31 A gambo gi ta cica giva munyama ni hweti yiva nkhata+Na gi nga se chikela a siku ga Jehovha ga hombe ni go tshisa.+
32 Ni wihi loyi a khongelako vitweni ga Jehovha i ta ponisiwa;+Hakuva Citsungeni ca Ziyoni ni Jerusalema, ku tava ni lava va ponileko,+ kota lezvi Jehovha a wulileko,A vaponileko lava Jehovha a va vitanako.”
Mitlhamuselo ya lahasi
^ Kutani: “khombela”.
^ Kutani: “misava”.
^ Kutani: “jejuwara”.
^ Kutani: “I ta ti laya hi kota ya”.
^ Kutani: “a ti laya”.
^ Kutani: “khombela”.
^ Hi kukongoma: “Basisani”.
^ Kutani: “kujejuwara”.
^ Kutani: “madhota”.
^ Kutani: “norte”.
^ Ku nga Bimbi Gofa.
^ Ku nga Bimbi ga Medhiteraneo.
^ A vhina i sinya leyi yi pswalako mauvha.
^ Kutani: “khadamulako”.
