Papilo ga Judha 1:1-25
1 Judha, a nandza ga Jesu Kristu, kanilezvi a makabye wa Jakobe,+ ka lava va vitanilweko+ lava va randziwako hi Nungungulu, a Papayi, lava va hlayiselweko Jesu Kristu:+
2 Ngha a wuxinji, ni kurula, ni lirandzo zvi engetelwa ka n’wina.
3 Varandzekako, hambu lezvi ndzi nga maha zvontlhe ndzi zvi kotako kasi ku mu tsalela hi kuhanyiswa loku hi hlengelako,+ ndzi zvi wonile na zvi hi chukwana a ku mu tsalela ndzi mu kuca lezvaku mulwa a kulwa ka hombe mu lwela kukholwa+ loku ku nyikilweko vobasa khati gin’we zvi enela.
4 A cigelo hi lezvaku ku nghenile vanhu vo kari hi kunyanimela cikari ka n’wina, lava a cima ka kaleloko va yimiselweko ku lamuliwa hi Mitsalo; vanhu va nga chaviko Nungungulu, va hundzulusako a tipswalo ta Nungungulu wa hina tiva kutiyimelela ka mahanyela ya tingana*+ va tlhela va kaneta a n’winyi wa hina wa mun’we tlhelo Hosi, Jesu Kristu.+
5 Hambu lezvi mu zvi tivako khwatsi zvontlhe lezvi, ndzi lava ku mu alakanyisa lezvaku Jehovha* i tlhatlhisile vanhu tikweni ga Gibhite,+ kanilezvi andzhako ka lezvo i no lovisa lava va nga kala ku kombisa kukholwa.+
6 Ni tingilozi leti ti nga kala ku hlayisa ciyimo ca tona, ti tsika wutshamu legi ti nga mahelwe ku hanya ka gona,+ i ti hlayisile machinini ya pindzukelwa munyameni wo tshisa kala kulamulweni ka siku ga hombe.+
7 Hi kufanana, Sodhoma ni Gomora ni madhoropa ya laha kusuhani nawo wonawu ma no ti nyikela wubhayini* ga tshisela ga cima ma tlhela ma hlongolisela a kunavela ka nyama ku nga hiko ka ntumbuluko;+ ma mahlweni ka hina kota citlharihiso hi kuva ma tsayisilwe hi kulamulwa hi ndzilo wa pindzukelwa.+
8 Hambulezvo, a vanhu lavo vonawu va ti nyikela milorweni, va nyenyezisa nyama, va kanyisa wuhosi, va tlhela va wulawula kubiha hi lava vo ngangamela.+
9 Kanilezvi a cikhati leci Mikayeli,+ a ngilozi ya hombe,+ a nga hambana kupima na Dhiyabho, va kanetisana hi cirumbi ca Mosi,+ a nga tsutsumelangi ku mu lamula hi magezu ya kubiha,+ kanilezvi i te ngalo: “Jehovha* i wa ku kawuke.”+
10 Kanilezvi a vanhu lavo va wulawula kubiha hi zvilo zvontlhe lezvi hakunene va nga zvi zwisisiko.+ Niku ka zvilo zvontlhe lezvi va zvi zwisisako hi ntumbuluko wabye a ku fana ni zvihari zvi nga pimisiko,+ va simama ku ti goha.
11 Khombo ka vanhu lavo, hakuva va landzele ndlela ya Kana+ va tlhela va ti peta mahanyeleni ya hava ya Bhalami+ hi ku fela nchachazelo, niku va lovile kuwulawuleni ka kuhluwuka+ ka Kora!+
12 A vanhu lavo maribye ma fihleleko hasi ka mati lomu ka mibuzo ya n’wina ya lirandzo+ laha va buzako zvin’we na n’wina; varisi lava va ti gisako wutsumbu gabye na va nga chavi;+ marefu ma nga hiko na mati ma kukuletwako hi moya maya seno ni seno;+ tisinya ti nga pswaliko mihandzu ta nguva ya kusangula ka cirami hambu loku ku chikela nguva, leti ti feleko magumo ti tlhela ti tsuwuliwa;
13 mavingo* ma kwatileko, lawa ma hlatako a khuvi ga tingana ta wona;+ tinyeleti ti pepetsekako leti ti vekelweko a munyama wo tshisa kala pindzukelwa.+
14 Ina, a munhu wa wu 7 ka cizukulwana ca Adhamu, Enoki,+ yenawu i phrofetile hi vona laha a ngaku: “Wonani! Jehovha* i tile ni tingilozi takwe to basa ta tsandza-vahlayi*+
15 kasi ku ta lamula vontlhe,+ ni ku kona vontlhe lava va nga chaviko Nungungulu hi kota ya mitiro yontlhe yo biha leyi va yi mahileko hi ndlela ya kubiha, ni hi kota ya zvilo zvontlhe zvo tsema hlanha lezvi a vawonhi lava va nga chaviko Nungungulu va zvi wulileko hi yena.”+
16 A vavanuna lava vanguranguri,+ va khalako hi lezvi a wutomi gabye gi nga tshamisa zvona, va landzelako a kunavela kabye,+ niku a minomu yabye ya ti dzundza hi zvilo zva hombe na va kari va dzundza van’wani hi ku fayelisela* hi ku fela ku bhindzula.+
17 Kanilezvi, n’wina varandzekako, alakanyani a timhaka leti ti sinako ti wulilwe* ka n’wina hi vapostoli va Hosi ya hina Jesu Kristu,
18 lava va nga tshamela ku mu byela ku: “Cikhatini co gumesa ku tava ni vatseketseli lava va hanyako hi ku landza kunavela kabye ka ku nga chavi Nungungulu.”+
19 Lava hi vona va vangako kuhambana,+ na va hi ni mahanyela ya wuhari,* ni va nga hiko na wumoya.*
20 Kanilezvi n’wina, varandzekako, ti akeni kukholweni ka n’wina ku basileko nguvhu, mu khongela hi moya wo basa,+
21 kasi mu simama lirandzweni la Nungungulu,+ na mu rindzela a wuxinji ga Hosi ya hina Jesu Kristu, legi gi yisako wutomini ga pindzukelwa.+
22 Ahandle ka lezvo, simamani ku va mahela wuxinji+ lava va kanakanako;+
23 va hanyiseni+ hi ku va wutla ndzilweni. Kanilezvi simamani ku va mahela wuxinji a vanhu van’wani, mu maha lezvo hi ku chava, na mu venga hambu a nguwo leyi yi chakisilweko hi nyama.+
24 Makunu, ka loyi a zvi kotako ku mu wonelela lezvaku mu nga khunguvanyeki ni ku mu yimisa na mu nga hi na noda+ mahlweni ka kungangamela kakwe* hi litsako la hombe,
25 ka yena yece Nungungulu a Muhanyisi wa hina ha Jesu Kristu a Hosi ya hina, a kuve kona wudzundzo, ni wukulu, ni ntamu, ni wuhosi kupindzukeni kontlhe ku hundzileko, ni zvezvi, ni kala kupindzuka kontlhe. Amen.
Mitlhamuselo ya lahasi
^ Hi ciGreki: asélgeia. Wona Tlhamuselo wa magezu ya Bhibhiliya.
^ Kutani: “mabyandlati; mavimbi”.
^ Kutani: “makume ya makume ya mazana”.
^ Kutani: “va hlamala vanhu”.
^ Kutani: “zvilo zvi phrofetilweko”.
^ Kutani: “na va hi vanhu va nyama”.
^ Hi kukongoma: “moya”.
^ Kutani: “ka kuvakona kakwe ko ngangamela”.