Hi kutsala ka Luka 1:1-80
1 A votala va ti karatile va tlhanganisa va tlhela va tsala a timhaka ta lisine leti hi ti kholwako,+
2 kota lezvi hi nyikilweko tona hi lava kusukela kusanguleni va zvi wonileko hi matihlo+ va tlhela va zvi kanela.+
3 Hikwalaho minawu, andzhako ka ku hlola a zvilo zvontlhe kusukela kusanguleni, ndzi no xuva ku ku tsalela zvona hi kulongoloxa, wena Teofilo, a dhumileko,+
4 kasi u nga kanakani ku lezvi u gondzisilweko lisine.+
5 Masikwini ya Herodhi,*+ a hosi ya Judhiya, ku wa hi ni mupristi a vitaniwako ku hi Zakariya, wa ntlawa* wa Abhija.+ A sati wakwe i wa pswaliwa ngangweni wa Aroni; a vito gakwe ku wa hi Elizabheti.
6 Hi wumbiri gabye va wa lulamile mahlweni ka Nungungulu; va wa nga hi na cisolo hakuva va wa hlayisa zvontlhe zvileletelo ni milayo ya Jehovha.*
7 Kanilezvi va wa nga hi na n’wana, hakuva Elizabheti i wa hi ngon’wa, niku hi wumbiri gabye va wa khosahele.
8 Laha Zakariya a nga kari a tira mahlweni ka Nungungulu kota mupristi hi khati ga ntlawa wakwe,+
9 kota lezvi a vapristi va nga tirisa zvona,* ku no chikela a khati gakwe ga ku nyikela libani+ laha a nga nghena wutshan’wini go basa ga Jehovha.*+
10 A citshungu contlhe ci wa khongela lahandle hi cikhati ca ku hisa libani.
11 Makunu a ngilozi ya Jehovha* yi no woneka kakwe na yi yimile tlhelweni ga cinene ga alati ga ku hisela libani.
12 Laha Zakariya a nga yi wona, i no dzuka a chava.
13 Kanilezvi a ngilozi yi te ngalo kakwe: “U nga chavi, Zakariya, hakuva a mikhongelo ya wena yi zwilwe, ni sati wa wena, Elizabheti, i ta ku pswalela n’wana wa mufana; u ta mu chula ku hi Johani.+
14 U ta tsaka u xalala nguvhu, niku a votala va ta tsaka hi kupswaliwa kakwe,+
15 hakuva i tava wahombe mahlweni ka Jehovha.*+ Kanilezvi a nga tshuki anwa vhinyo ne byala ga lin’wani lixaka.+ I ta tala hi moya wo basa na a nga se pswaliwa,*+
16 niku i ta wuyisela vanana vo tala va ka Izrayeli ka Jehovha* Nungungulu wabye.+
17 Ahandle ka lezvo, i ta ranga mahlweni kakwe na a hi ni moya ni ntamu wa Elija,+ kasi ku tlhelisela a timbilu ta vapswali ka vana,+ ni ku kokela lava va nga ingisiko ka wutlhari ga valulamileko, lezvaku a mu longiselela vanhu Jehovha.”*+
18 Zakariya i te ngalo ka ngilozi: “Ndzi nga zvi kholwisa kuyini zvezvo? Phela ndzi wa kale, ni sati wa mina i khosahele.”
19 A ngilozi yi no mu hlamula, yiku: “Hi mina Gabriyeli,+ loyi a yimako mahlweni ka Nungungulu.+ Ndzi rumilwe ku ta wulawula na wena ni ku ku byela mahungu lawa ya manene.
20 Kanilezvi zvezvi, u ta vhaleka gezu u nga ha wulawuli kala siku legi a zvilo lezvi zvi to maheka, hakuva a wu kholwangi a magezu ya mina lawa ma to tatiseka hi cikhati ci yimisilweko.”
21 Ndzeni ka cikhati leco, a vanhu va no simama ku rindzela Zakariya na va hlamala hi lezvi a nga kari a hlwela nguvhu lomu wutshan’wini go basa.
22 A cikhati leci a nga huma, i wa nga ha zvi koti ku wulawula navo, hikwalaho va no zvi wona lezvaku i wa ha hi ku wona ciwoniso wutshan’wini go basa. I wo wulawula hi ku kombakomba kanilezvi i wa nga zwati gezu.
23 Loku a tlhanganisile masiku ya ntiro wakwe wo basa,* i no tlhela kaya.
24 Andzhako ka masiku yo kari, a sati wakwe i no xura nyimba. Hikwalaho, Elizabheti i no tshama ntlhanu wa tihweti na a nga suki laha kaya hakuva i waku:
25 “Hi lezvi Jehovha* a ndzi maheleko ka masiku lawa. I ndzi alakanyile, a susa ciruko ca mina cikari ka vanhu.”+
26 Hi hweti yakwe ya wu 6, Nungungulu i no ruma ngilozi Gabriyeli+ yiya dhoropeni ga Galileya gi vitaniwako ku Nazareta,
27 ka nhwana*+ a nga tsumbisene ku chadha ni wanuna a vitaniwako ku hi Josefa, wa yindlu ya Dhavhidha; a vito ga nhwana loye ku wa hi Mariya.+
28 Loku a ngilozi yi chikele, yi te ngalo kakwe: “Xewe, wena loyi u kumileko thomo ga hombe nguvhu. Jehovha* i na wena.”
29 Kanilezvi yena i no karateka nguvhu hi magezu lawo na a lava ku tiva ku a malosela lawo ma wula yini.
30 Hikwalaho, a ngilozi yi no mu byela, yiku: “U nga chavi Mariya, hakuva u kumile thomo ka Nungungulu.
31 U ta xura nyimba u pswala a n’wana wa mufana,+ niku u ta mu chula ku hi Jesu.+
32 I tava wahombe+ niku i ta vitaniwa ku i N’wana wa Loyi a Tlakukileko ku Hundza Vontlhe,+ na Jehovha* Nungungulu i ta mu nyika citshamu ca wuhosi ca Dhavhidha, a papayi wakwe.+
33 I ta fumela a yindlu ya Jakobe kala kupindzuka; a Mufumo wakwe wu nga ta gumesa.”+
34 Mariya aku ka ngilozi: “Zvi ta mahisa kuyini, hakuva a ndzi se etlela ni wanuna?”+
35 A ngilozi yi no mu hlamula, yiku: “A moya wo basa wu tata hehla ka wena,+ ni ntamu wa Loyi a Tlakukileko ku Hundza Vontlhe wu ta ku fenengeta. Hikwalaho, loyi a to pswaliwa i ta vitaniwa ku hi loyi a basileko,+ a N’wana wa Nungungulu.+
36 A xaka ga wena, Elizabheti, loyi va nge i ngon’wa, yenawu i xurile nyimba ya n’wana wa mufana wukhosaneni gakwe. Leyi i hweti ya wu 6;
37 hakuva ci hava* ci tsandzako Nungungulu.”+
38 Makunu Mariya aku: “Hi zvona, ndzi nandza ga Jehovha!* A zvi maheke ka mina lezvi u zvi wulileko.” Zvalezvo a ngilozi yi no suka kakwe.
39 Ka masiku lawo, Mariya i no suka a famba hi kuhatlisa aya ka dhoropa go kari ga Judha, tikweni ga zvitsunga,
40 a ya chikela mutini wa Zakariya, a losa Elizabheti.
41 Zvalezvi Elizabheti a ngazwa Mariya na a mu losa, a n’wanana loyi a nga hi lomu khwirini gakwe i no tshukuma,* Elizabheti a tala hi moya wo basa
42 a tlakusa gezu, aku: “U katekile wena cikari ka vavasati, niku i katekile a n’wana loyi u to pswala!
43 Ndzova mina mani wo kala ndziva ni thomo legi ga ku endzelwa hi mamani wa Hosi ya mina?
44 Hakuva zvalezvi ndzi nga kuzwa na u ndzi losa, a n’wanana loyi a nga lomu khwirini ga mina i no tshukuma* hi kutsaka.
45 Wa tsaka wena loyi u nga kholwa, hakuva zvontlhe lezvi zvi wulilweko ka wena hi Jehovha* zvi ta tatiseka.”
46 Mariya aku: “A muhefemulo* wa mina wa dhumisa Jehovha,*+
47 ni moya wa mina wa tsaka nguvhu ha Nungungulu, a Muhanyisi wa mina,+
48 hakuva i wonile a wusiwana ga nandza gakwe.+ Kusukela lezvi, zvontlhe zvizukulwana zvi ta ndzi wula loyi a tsakileko,+
49 hakuva Nyamintamu i ndzi mahele zvilo zva hombe; a vito gakwe gi basile,+
50 zvizukulwaneni zvontlhe i va mahela wuxinji lava va mu chavako.+
51 I mahile zvahombe hi woko gakwe; i hangalasile lava va ti kulisako timbilwini tabye.+
52 I wisile tihosi zvitshan’wini zva wuhosi,+ a tlakusa lava va ti koramisako;+
53 i xurisile lava va nga ni ndlala hi zvilo zva zvinene,+ a hlongola lava vo ganya na va nga hi na nchumu.
54 I tile kasi ku ta vhunetela a nandza gakwe Izrayeli, hi ku alakanya wuxinji gakwe,+
55 kota lezvi a wulileko ka vakokwani va hina, ka Abrahama ni ka vana* vakwe,+ kala kupindzuka.”
56 Mariya i no tshama na Elizabheti a cipimo ca tihweti tinharu. Andzhako ka lezvo, i no tlhela kaya kakwe.
57 Makunu ci no chikela cikhati ca lezvaku Elizabheti a pswala, hikwalaho i no pswala n’wana wa mufana.
58 Laha a vaakelani vakwe ni maxaka yakwe va ngazwa lezvaku Jehovha* i mu mahele wuxinji ga hombe, va no tsaka naye.+
59 Hi siku ga wu 8, va nota va ta mu mahisa wukwera* a n’wanana+ niku va wa lava ku mu chula vito ga papayi wakwe, va ku hi Zakariya.
60 Kanilezvi a mamani wakwe i no hlamula, aku: “Ayeyi! I ta vitaniwa ku hi Johani.”
61 Vona vaku kakwe: “A wu na xaka ne gin’we gi nga ni vito lego.”
62 Hikwalaho, va no wutisa a papayi wa kona hi ku kombakomba lezvaku i lava ku a n’wanana a chuliwa ku hi yena mani.
63 Zakariya i no kombela a cipulangwana a tsala ku: “A vito gakwe hi Johani.”+ Laha vontlhe va nga wona lezvo, va no hlamala.
64 Zvalezvo, a nomu wakwe wu no vhululeka, a lirimi lakwe li tlhatlheka a sangula ku wulawula,+ a dhumisa Nungungulu.
65 A vaakelani vabye vontlhe va no chava nguvhu, niku a timhaka leti tontlhe ti no hangalaka tikweni gontlhe ga zvitsunga ga Judhiya.
66 Vontlhe lava va nga zvizwa va no zvi hlayisa timbilwini tabye, vaku: “A n’wanana loyi i tava munhu wo tshamisa kuyini?” Hakuva a canja ga Jehovha* gi wa hi zvin’we naye.
67 Zakariya a papayi wakwe i no tala hi moya wo basa, a phrofeta, aku:
68 “A ku dhumisiwe Jehovha,* a Nungungulu wa Izrayeli,+ hakuva i alakanyile vanhu vakwe a va nehela kutlhatlhisa.+
69 I hi vhuxele limhondzo la kuhanyisa*+ mutini wa Dhavhidha, a nandza gakwe,+
70 kota lezvi a wulileko hi nomu wa vaphrofeti vakwe vo basa va kaleloko,+
71 lezvaku i ta hi tlhatlhisa ka valala va hina ni mandleni ya vontlhe lava va hi vengako,+
72 kasi ku hi mahela wuxinji legi a tsumbisileko vakokwani va hina ni ku alakanya civhumelwano cakwe co basa,+
73 leci a hlambanyileko ka Abrahama, a kokwani wa hina,+
74 ca ku hi nyika a thomo ga ku mu mahela a ntiro wo basa na hi nga chavi nchumu, andzhako ka loku a hi tlhatlhisile mandleni ya valala va hina,
75 hi tsumbeka hi tlhela hi maha zvakululama wutomini ga hina gontlhe.
76 Kanilezvi wena, n’wananga, u ta vitaniwa ku u muphrofeti wa Loyi a Tlakukileko ku Hundza Vontlhe, hakuva u ta ranga mahlweni ka Jehovha* u longisela tindlela takwe,+
77 kasi ku kanela ka vanhu vakwe lezvaku i ta va hanyisa hi ku va tsetselela zviwonho zvabye,+
78 hi kota ya wuxinji ga hombe ga Nungungulu wa hina. A wuxinji lego ga le tilweni gi ta hi woningela a ku fana ni kuhuma ka gambo,
79 kasi ku woningela lava va tshamileko munyameni ni ndzhutini wa kufa,+ ni ku rangela a mikondzo ya hina ndleleni ya kurula.”
80 A n’wanana i no kula, a tiya moyeni na a tshama ciwuleni kala siku legi a nga ya woneka kubaseni ka vaIzrayeli.
Mitlhamuselo ya lahasi
^ Ntlawa wa vapristi.
^ Kutani: “kota mukhuwo wa vapristi”.
^ Kutani: “na a ha hi khwirini ga mamani wakwe”.
^ Kutani: “ntiro wakwe lowu a nga mahela vanhu”.
^ Kutani: “virgem”.
^ Kutani: “a ku na gezu”.
^ Kutani: “tlulatlula”.
^ Kutani: “tlulatlula”.
^ Hi kukongoma: “mbewu”.
^ Kutani: “tlulisa ngoma”.
^ Kutani: “muhanyisi wa ntamu”. Wona laha ka ku: “Limhondzo” ka Tlhamuselo wa magezu ya Bhibhiliya.
