Hi kutsala ka Luka 15:1-32
15 Vontlhe a vakhupisi ni vawonhi va no simama ku hlengeletana laha kakwe kasi ku mu ingisela.+
2 A vaFarisi ni vatsali va wa ngurangura, vaku: “Inaloyi i amukela vawonhi a tlhela aga navo.”
3 Makunu i no va hlawutela mufananiso lowu, aku:
4 “Himani cikari ka n’wina wa ku loku a hi ni 100 wa tiyivhu, ku lahleka yin’we, a nga siyiko leti ta 99 ciwuleni a famba a lavetela leyi yi nga lahleka kala a yi kuma ke?+
5 Loku a yi kuma, o yi pakatsa a tlhela a tsaka.
6 A cikhati leci a chikelako kaya, i vitana vanghana vakwe ni vaakelani vakwe, a taku kabye: ‘Tsakani na mina hakuva ndzi yi kumile a yivhu ya mina leyi yi nga lahlekile.’+
7 Hi kufanana, ndza mu byela, ndziku: Ku tava ni litsako la hombe le tilweni hi kota ya muwonhi mun’we a ti solako+ a ku hundza hi lava va 99 va kululama zvi nga laviko ku va ti sola.
8 “Kona hi wihi wasati wa ku loku a hi ni 10 wa zvingerengere zva drakma* a gumesa a lahla a drakma yin’we, a nga lumekiko a kandiya a swiyela a yindlu yakwe a lavetela khwatsi kala a yi kuma ke?
9 A cikhati leci a yi kumako, i vitana vanghana vakwe* ni vaakelani, a taku: ‘Tsakani na mina hakuva ndzi yi kumile a drakma* ya mina leyi ndzi nga lahlile.’
10 Hi kufanana, ndza mu byela, ndziku: Ku na ni litsako cikari ka tingilozi ta Nungungulu hi kota ya muwonhi mun’we a ti solako.”+
11 I no tlhela aku: “A wanuna wo kari i wa hi ni vafana vambiri.
12 Loyi wa ndzisana i no byela papayi wakwe, aku: ‘Papayi, ndzi nyike a ciavelo ca tshomba leci ci tova ca mina.’ Hikwalaho, i no va avela a tshomba yakwe.
13 Andzhako ka masiku ma tsongwani, loyi wa ndzisana i no longela a zvilo zvakwe zvontlhe a endza aya ka tiko ga le kule, niku kwaseyo i no hangalasa a tshomba yakwe yontlhe hi ku hanya wutomi go biha.
14 Laha na a mbhetile zvontlhe, ku nova ni ndlala ya hombe tikweni lego gontlhe, a sangula ku xaniseka.
15 I noza a ya khoza ka wanuna wo kari wa tiko lego. A wanuna loye i no mu rumela masin’wini yakwe kasi a ya risa makhumba.+
16 I no navela kuga zvakuga lezvi zvi nga giwa hi makhumba, kanilezvi i hava a nga mu nyika nchumu.
17 “A cikhati leci a nga ti gondza, i te: ‘N’weno papayi i na ni zvitiri zvo tala zvi nga ni zvakuga zvo enela zvi tlhela zvi sala, kuveni mina seno ndzofa hi ndlala!
18 Ndzi ta tlhela ka papayi ndzi yaku kakwe: “Papayi, ndzi wonhele tilo ndzi tlhela ndzi wonhela wena.
19 A ndza ha ringani ku vitaniwa ku ndzi n’wana wa wena. Ndzi mahise ku khwatsi ndzi cin’we ca zvitiri zva wena.”’
20 Hikwalaho, i no suka a tlhela ka papayi wakwe. Na a ha hi kule, a papayi wakwe i no mu wona a mu zwela wusiwana, a tsutsuma a ya mu bharasara* a mu pswopswa.
21 Makunu a n’wana aku ngalo kakwe: ‘Papayi, ndzi wonhele tilo ndzi tlhela ndzi wonhela wena.+ A ndza ha ringani ku vitaniwa ku ndzi n’wana wa wena.’
22 Kanilezvi a papayi wakwe i no byela malandza yakwe, aku: ‘Tsutsumani mu ya teka nguwo yo leha leyi ya yinene nguvhu mu ta mu bohisa, mu mu bohisa ni phera litihweni lakwe ni masandalia mikondzweni yakwe.
23 Tisani kambe ni cihon’wana co nona mu ta ci daya higa hi tsaka,
24 hakuva a n’wana loyi i wa file kanilezvi i tlhelile a hanya,+ i wa lahlekile, makunu i kumilwe.’ Va no sangula ku ti buza va tsaka.
25 “A mufana wakwe loyi wa nhondzo i wa hi masin’wini. Laha a nga kari a wuya, na a hi kusuhani ni ku chikela kaya, i nozwa muzka ni vanhu va nga kari va kina.
26 Hikwalaho, i no vitana a gin’we ga malandza a gi wutisa ku zvini zvi mahekako.
27 Giku kakwe: ‘A ndzisana ya wena yi wuyile, hikwalaho a papayi wa wena i dele cihon’wana co nona hi lezvi a wuyileko na a hanya khwatsi.’*
28 Kanilezvi i no zangara a ala ku nghena. Makunu a papayi wakwe i no huma a sangula ku mu khongotela.
29 I no hlamula papayi wakwe aku: ‘Ndzi kari ndzi ku tirela a malembe lawa yo tala, a ndzi se tshuka ndzi hambunyeta a zvileletelo zva wena, hambulezvo a wu se tshuka u ndzi nyika ne hambu cimbutana kasi ndziga ni vanghana va mina.
30 Kanilezvi zvalezvi a n’wana loyi wa wena a nga chikela, loyi a nga hangalasa* zvilo zva wena ni zvibhayi, u mu dayele cihon’wana co nona.’
31 A papayi wakwe i te ngalo kakwe: ‘N’wananga, a cikhati contlhe u zvin’we na mina, zvontlhe lezvi zvi nga zva mina zva wena.
32 Kanilezvi hi wo mahela ku nengela hi tsaka, hakuva a makabye wa wena i wa file kanilezvi i tlhelile a hanya, i wa lahlekile, makunu i kumilwe.’”
Mitlhamuselo ya lahasi
^ Kutani: “vanghana vakwe va cisati”.
^ Hi kukongoma: “a yawa nhan’wini yakwe”.
^ Kutani: “na a nga babyi”.
^ Hi kukongoma: “a nga khadamula”.