Hi kutsala ka Luka 17:1-37
17 I no byela vapizani vakwe, aku: “A zvi koteki lezvaku a zvikhunguvanyiso zvi ngati. Hambulezvo, khombo ka loyi zvi tako hi laha ka yena!
2 Zvi wa tava chukwana ku a bohelelwa ribye ga cigayo nhan’wini yakwe a rikhisiwa bimbini, a ku hundza ku khunguvanyisa mun’we wa lava va vatsongwani.+
3 Chelani kota ka n’wina wutsumbu. Loku a makabye wa wena a wonha, mu kawuke;+ loku a ti sola mu tsetselele.+
4 Hambu loku a ku wonhela a 7 wa makhati hi siku, kanilezvi ata ka wena a 7 wa makhati a taku: ‘Ndza ti sola’, mu tsetselele.”+
5 Makunu a vapostoli va no byela Hosi, vaku: “Hi engetele kukholwa.”+
6 A Hosi yiku: “Loku mu wa hi ni kukholwa ko ringana ni mbewu ya cinapi, mu wa ta wula ka mora lowu, muku: ‘Kunuka laha u ya ti byala bimbini!’ wu wa ta mu ingisa.+
7 “Hi wihi cikari ka n’wina a nga ni nandza gi rimako kutani gi risako zvifuyo wa ku loku gi wuya hi masin’wini i gi byela ku: ‘Hatlisa u ta tshama mezeni uga’?
8 A nga ta gi byela ku: ‘Ndzi longiselele zvakuga, u boha avhentali u ndzi tirela kala ndzi mbheta kuga ni kunwa, andzhako ka lezvo hi kona u to tshama uga ni kunwa’ ke?
9 Mu alakanya ku i ta gi bonga hi lezvi gi mahileko lezvi gi rumilweko?
10 Makunu n’winawu, loku mu mahile zvontlhe lezvi mu rumilweko, wulani ku: ‘Hi malandza ma nga vhuniko nchumu. Lezvi hi mahileko hi zvalezvi hi nga fanele ku maha.’”+
11 Na a hi ndleleni ya kuya Jerusalema, i no hundza hi mbhinganweni wa Samariya ni Galileya.
12 Laha a nga kari a nghena cidhoropaneni, i no khingiwa hi 10 wa vavanuna va nga hi ni hlokonho, kanilezvi va no nyima hi le kule,+
13 va tlakusa magezu yabye, vaku: “Jesu, Mugondzisi, hi mahele wuxinji!”
14 A cikhati leci a nga va wona, i te ngalo kabye: “Fambani mu ya ti kombekisa ka vapristi.”+ Laha va nga kari va famba, va no basiswa.+
15 A mun’we wabye, laha a nga wona lezvaku i hanyisilwe, i no wuya, na a dhumisa Nungungulu hi gezu ga hombe.
16 I nota a tawa hi nghohe mikondzweni ya Jesu, a mu bonga. A wanuna loye i wa hi muSamariya.+
17 Jesu i no hlamula, aku: “Kasi a hi 10 va nga basiswa? Makunu va kwihi lava van’wani va 9?
18 A ku na mun’wani a wuyileko ku ta dhumisa Nungungulu, saseka wanuna loyi wa tiko gin’wani?”
19 I no byela wanuna loye, aku: “Suka u ti fambela; a kukholwa ka wena ku ku hanyisile.”+
20 Laha a vaFarisi va nga mu wutisa lezvaku a Mufumo wa Nungungulu wu tata rini,+ i no va hlamula, aku: “A Mufumo wa Nungungulu a wu woneki wu ku dlunya kuteni ka wona;
21 cima va nga ta wula, vaku: ‘Hi lowu!’ kutani ku: ‘Hi lowuya!’ Hakuva a Mufumo wa Nungungulu wu cikari ka n’wina.”+
22 Andzhako ka lezvo, i no byela vapizani, aku: “Cata cikhati leci mu to xuva ku wona a gin’we ga masiku ya N’wana wa munhu, kanilezvi mu nga ta gi wona.
23 A vanhu va ta mu byela ku: ‘Hi gaya!’ kutani ku: ‘Hi loyi!’ Mu nga fambi, ne mu nga va landzeli.+
24 Hakuva a ku khwatsi hi lezvi a lihati li sukelako ka tlhelo gin’we ga tilo li woninga kala ka gin’wani tlhelo ga tilo, a N’wana wa munhu+ i ta mahisa zvezvo sikwini gakwe.+
25 Hambulezvo, a kuranga i ta xaniseka nguvhu, a aliwa hi cizukulwana leci.+
26 A ku tsika lezvo, a ku fana ni lezvi zvi nga maheka masikwini ya Nowa,+ zvi ta mahisa zvezvo masikwini ya N’wana wa munhu:+
27 va waga, vanwa, va chadha, kala siku legi Nowa a nga nghena hi gona lomu tarwini,+ a Ndambi yita yi ta va lovisa vontlhe.+
28 Hi zvalezvo kambe zvi nga maheka masikwini ya Loti:+ va waga, vanwa, va xava, va xavisa, va byala ni ku aka.
29 Kanilezvi, a siku legi Loti a nga huma Sodhoma, ku nona ndzilo ni solufa* hi le tilweni zvi va lovisa vontlhe.+
30 Zvi ta mahisa zvezvo ka siku legi a N’wana wa munhu a to wonekeliswa hi gona.+
31 “Ka siku lego, loyi a nga hehla ka yindlu, kanilezvi a zvilo zvakwe na zvi hi lomu ndzeni, a nga chiki a ta zvi teka. Ni loyi a nga masin’wini a nga tlheleli zvilo lezvi a zvi siyileko.
32 Alakanyani a sati wa Loti.+
33 Ni wihi loyi a ti karatelako ku hlayisa wutomi* gakwe i ta gi luza, kanilezvi loyi a gi luzako i ta gi hlayisa.+
34 Ndza mu byela, ndziku: Ka wusiku lego a vanhu vambiri va tava mubhedhini wun’we; a mun’we i ta tekiwa, kanilezvi loyi mun’wani i ta tsikiwa.+
35 A vavasati vambiri va ta ngha va gaya cigayweni cin’we; a mun’we i ta tekiwa, kanilezvi loyi mun’wani i ta tsikiwa.”
36 *——
37 Hikwalaho, va no mu hlamula, vaku: “Kwihi Hosi?” Aku kabye: “Laha ku nga ni cirumbi, a magama ma ta hlengeletana kwalaho.”+
