Hi kutsala ka Luka 2:1-52
2 Masikwini lawo, Khezari Augustu i no laya lezvaku a vanhu va misava yontlhe va tsalelwa.
2 (A citsalela leci co sangula ci mahekile cikhatini leci Kwiriniwu a nga hi govhernadhori wa Siriya.)
3 A vanhu vontlhe va no ya ti tsalelisa, mun’we ni mun’we dhoropeni gakwe ga mabeleko.
4 Josefa+ yenawu i no suka dhoropeni ga Nazareta le Galileya aya Judhiya, dhoropeni ga Dhavhidha, gi vitaniwako ku i Bhetlehema,+ hakuva i wa hi wa yindlu ni ngango wa Dhavhidha.
5 I no ya ti tsalelisa na Mariya, a sati wakwe,*+ a nga hi kusuhani ni ku pswala.+
6 Na va ha hi seyo, a masiku ya ku a pswala ma no chikela.
7 Makunu i no pswala a n’wana wa mufana — ku nga matewula yakwe+ — a mu phutsela ka dzowo a gumesa a mu lata lomu cigowolweni,+ hakuva ku wa nga hi na wutshamu lomu tindlwini ta vapfhumba.
8 Ka tiko lego ku wa hi ni varisi va nga hanya le handle ka dhoropa na va wonelela a mitlhambi yabye ni wusiku.
9 Hi citshuketi, a ngilozi ya Jehovha* yi no yima mahlweni kabye, ni kungangamela ka Jehovha* ku no va randzela va sangula ku chava nguvhu.
10 Kanilezvi a ngilozi yi te ngalo kabye: “Mu nga chavi, hakuva ndza mu byela a mahungu ya manene ma to neha litsako la hombe ka vanhu vontlhe.
11 Hakuva nyamutlha mu pswalelwe muhanyisi+ dhoropeni ga Dhavhidha,+ loyi a nga Kristu, a Hosi.+
12 A cikombiso ka n’wina hi leci: Mu ta ya kuma cin’wanana na ci phutselwe ka dzowo ci latiwa lomu cigowolweni.”
13 Zvalezvo, ku no woneka a cidlemo ca butho ga le tilweni+ na ci hi ni ngilozi leyi, ci dhumisa Nungungulu, ciku:
14 “A wudzundzo a give ka Nungungulu le hehla matilweni, ni kurula misaveni cikari ka vanhu lava a xalalako hi vona.”
15 Hikwalaho, a cikhati leci a tingilozi ti nga suka kabye ti tlhela tilweni, a varisi va no byelana, vaku: “A hi fambeni Bhetlehema zvalezvi hi ya wona lezvi zvi nga maheka, lezvi Jehovha* a nga hi tivisa.”
16 Va no famba hi kuhatlisa va ya kuma Mariya na Josefa, ni cin’wanana na ci latilwe lomu cigowolweni.
17 A cikhati leci va nga zvi wona, va no hlawutela mahungu lawa va nga byelilwe xungetano hi n’wanana loye.
18 Vontlhe lava va ngazwa a timhaka leti ti wulilweko hi varisi va no hlamala nguvhu,
19 kanilezvi Mariya i no hlayisa timhaka leto tontlhe, a chikelela magumo yo kari mbilwini yakwe.+
20 Makunu a varisi va no tlhela, na va dzundza Nungungulu ni ku mu dhumisa hi zvontlhe lezvi va nga zvizwa ni ku zvi wona, khwatsi hi lezvi va nga byelisilwe zvona.
21 Andzhako ka 8 wa masiku, laha ku nga hi cikhati ca ku mu mahisa wukwera,*+ i no chuliwa ku hi Jesu, ku nga vito legi a nyikilweko hi ngilozi, a mamani wakwe na a nga se xura nyimba yakwe.+
22 Loku ci chikele a cikhati ca ku va basisiwa hi kuya hi Nayo wa Mosi,+ va no famba naye Jerusalema va ya mu hendleleta ka Jehovha,*
23 a ku khwatsi hi lezvi zvi tsalilweko Nayweni wa Jehovha,* zvaku: “A matewula wontlhe ya cinuna* ma fanele ku woniwa kota yo basa ka Jehovha.”*+
24 Va no nyikela muphahlo kota lezvi zvi wuliwako Nayweni wa Jehovha,* zvaku: “Matuva mambiri kutani mavhinyani mambiri ya zvipomba.”+
25 Le Jerusalema ku wa hi ni wanuna a nga vitaniwa ku hi Simeyoni; a wanuna loye i wa lulamile niku i wa chava Nungungulu. I wa rindzela a kuchavelelwa ka Izrayeli,+ niku a moya wo basa wu wa hi hehla kakwe.
26 Ahandle ka lezvo, a moya wo basa wa Nungungulu wu wa mu wonisile lezvaku i wa nga tafa na a nga se wona Kristu wa Jehovha.*
27 Hi ntamu wa moya, i noya tempeleni. Laha a vapswali va n’wanana Jesu va ngata naye kasi va ta maha lezvi zvi wuliwako hi Nayo,+
28 Simeyoni i no teka n’wanana a dhumisa Nungungulu, aku:
29 “Makunu, Hosi ya Hombe, tsika nandza ga wena gi famba hi kurula+ kota lezvi u nga wula,
30 hakuva a matihlo ya mina ma wonile a muhanyisi+
31 loyi u mu longiseleko kuwoneni ka vanhu vontlhe,+
32 a nga kuwonekela+ ku susako munyama* lowu wu fenengetileko matiko,+ loyi a nga wudzundzo ga vanhu va wena va ka Izrayeli.”
33 A papayi ni mamani wa n’wanana va no hlamala hi kota ya lezvi zvi nga kari zvi wuliwa xungetano hi yena.
34 Simeyoni i no va katekisa a gumesa a byela Mariya, a mamani wa n’wanana, aku: “A n’wanana loyi i tava kuwa+ ni kuvhuka ka votala lomu Izrayeli,+ niku i tava cikombiso ci to kanetiwa,+
35 (ina, u ta tlhaviwa* hi cipadha ca hombe)+ kasi a maalakanyo ya timbilu ta votala ma kombiswa kubaseni.”
36 Ku wa hi ni muphrofeti wa cisati a vitaniwako ku hi Ana, a nhanyana wa Fanuweli, wa lixaka la Axeri. A wasati loyi i wa khosahele niku i wa hanyile ni nuna wakwe a 7 wa malembe andzhako ka loku va chadhile,*
37 niku makunu i wa hi noni,* na a hi ni 84 wa malembe. I wa nga vhumaleki tempeleni, na a tirela Nungungulu wusiku ni mumu hi ku pfhunga* ni ku khongela.
38 Ka cikhati caleco, i no tshinela kabye, a sangula ku bonga Nungungulu ni ku wulawula hi n’wanana ka vontlhe lava va nga rindzela a kutlhatlhiswa ka Jerusalema.+
39 A cikhati leci va nga mbheta ku maha zvontlhe zvi leletelwako hi Nayo wa Jehovha,*+ va no tlhela Galileya dhoropeni gabye ga Nazareta.+
40 A n’wanana i no simama ku kula ava ni ntamu, a tala hi wutlhari, ni ku simama ku tsakelwa hi Nungungulu.+
41 A vapswali vakwe va wa tolovela kuya Jerusalema lembe ni lembe ka mubuzo wa Phasika.+
42 A cikhati leci a nga hi ni 12 wa malembe, va noya mubuzweni kota lezvi va nga tolovela ku maha.+
43 Loku a masiku ya mubuzo ma mbhelile, na va kari va tlhela kaya, a mufanyana Jesu i no sala Jerusalema kanilezvi a vapswali vakwe a va zvi wonangi.
44 Na va alakanya lezvaku i kona lomu ntlaweni lowu va nga longoloka nawo, va no famba a pfhuka wa siku, va gumesa va sangula ku mu lavetela cikari ka maxaka ni lava va nga tivana navo.
45 Kanilezvi, kota lezvi va nga mu vhumala, va no tlhela Jerusalema va ya mu lavetela khwatsi.
46 Andzhako ka masiku manharu, va no ya mu kuma lomu tempeleni na a tshamile cikari ka vagondzisi a va ingisela ni ku va wutisa zviwutiso.
47 Vontlhe lava va nga kari va mu ingisela va wa hlamaliswa hi wutlhari gakwe ni mihlamulo yakwe.+
48 Makunu laha a vapswali vakwe va nga mu wona va no hlamala, a mamani wakwe aku kakwe: “N’wananga, hikuyini u hi mahileko lezvi? Mina ni papayi wa wena hi wa karateka nguvhu hi ku lavetela wena.”
49 Kanilezvi yena aku kabye: “Mu wa ndzi lavela yini? Mu wa nga zvi tivi ku ndzi fanele kuva ndlwini ya Papayi wa mina?”+
50 Hambulezvo, a va zvi zwisisangi lezvi a nga va byela.
51 I no relela navo va tlhela Nazareta, a simama ku va ingisa.*+ A mamani wakwe i no hlayisa a timhaka leti tontlhe mbilwini yakwe.+
52 Jesu i no simama ku kula a endzeleka hi wutlhari ni ntamu, a tsakelwa hi Nungungulu ni vanhu.
Mitlhamuselo ya lahasi
^ Kutani: “loyi a nga chadhile naye kota lezvi va nga tsumbisene”.
^ Kutani: “tlulisa ngoma”.
^ Hi kukongoma: “Vontlhe a vavanuna ni vamatsuni va vhululako marumbu”.
^ Hi kukongoma: “vhewu”.
^ Kutani: “a muhefemulo wa wena wu ta tlhaviwa”.
^ Hi kukongoma: “kusukela wunhwaneni gakwe”.
^ Kutani: “i wa felwe hi nuna”.
^ Kutani: “jejuwara”.
^ Kutani: “a simama ku ti koramisa kabye”.
