Hi kutsala ka Luka 21:1-38
21 Laha a nga tlakusa matihlo, i no wona lava vo ganya na va chela zvinyikiwo zvabye makaxeni ya minyikelo.*+
2 I no wona ni noni* ya cisiwana na yi chela zvingerengere zvimbiri zva ntsengo wa wutsongwani nguvhu,*+
3 aku: “Ndza tiyisa ka n’wina, ndziku: A noni leyi ya cisiwana yi chelile zvotala a ku hundza vontlhe.+
4 Hakuva vontlhe va no chela lezvi zvi nga va salela, kanilezvi a noni leyi, ka wusiwana ga yona, yi chelile zvontlhe yi nga hi nazvo lezvi yi nga wa ta hanya hi zvona.”+
5 Andzhako ka cikhati, laha a vokari va nga kari va wulawula hi tempeli, hi lezvi yi nga sasekisisilwe zvona hi maribye ya manene ni zvilo zvi nga nyikelwe ka Nungungulu,+
6 i te ngalo: “Xungetano hi zvilo lezvi mu zvi wonako, ma tata a masiku lawa ku to kala ku siyiwa a ribye hehla ka gin’wani na gi nga khungumuliwangi.”+
7 Va no mu wutisa, vaku: “Mugondzisi, kasi a zvilo lezvi zvi ta maheka rini? Kona ci tava cihi a cikombiso ca lezvaku a zvilo lezvi zvi lava ku maheka?”+
8 Aku ngalo: “Ti woneleni kasi mu nga hambukisiwi,+ hakuva a votala va tata hi vito ga mina, va taku: ‘Hi mina yena’, va tlhela vaku: ‘A cikhati ca kona ci laha kusuhani.’ Mu nga va landzeli.+
9 Ahandle ka lezvo, laha mu to vazwa na va wulawula hi tiyimpi ni gujeguje,* mu nga chavi. Hakuva a zvilo lezvi zvi fanele ku ranga zvi maheka, kanilezvi a kugumesa ku nga ta tekela ku chikela.”+
10 I no engeta, aku kabye: “A tiko gi ta vhukela tiko,+ ni mufumo wu vhukela mufumo.+
11 Ku tava ni kutsekatseka ka hombe ka misava, niku ka matshamu yo hambanahambana ku tava ni tindlala ni mitungu;+ ku tava ni zviwoniso zvo chavisa ni zvikombiso zva hombe le tilweni.
12 “Kanilezvi, na zvi nga se maheka zvontlhe zvilo lezvi, a vanhu va ta mu khoma ni ku mu xanisa,+ va mu nyikela masinagogeni ni ku mu vhalela mapaxweni. Va ta mu yisa ka tihosi ni ka vafumeli hi kota ya vito ga mina.+
13 Zvi ta mu vhululela ndlela ya ku nyika wukustumunyu.
14 Hikwalaho, bohani timbilwini ta n’wina a ku nga rangi mu alakanyela lezvi mu to wula kasi ku ti yimela,+
15 hakuva ndzi ta mu nyika magezu ni wutlhari legi vontlhe a valala va n’wina va to tsandzeka ku gi kaneta kutani ku gi phikiza.+
16 Ahandle ka lezvo, mu ta nyikelwa* hambu hi vapswali va n’wina, ni vamakabye va n’wina, ni maxaka, ni vanghana; va ta daya vokari cikari ka n’wina.+
17 Mu ta vengiwa hi vanhu vontlhe hi kota ya vito ga mina.+
18 Kanilezvi hambu ni sisi wun’we wa tihloko ta n’wina wu nga ta lova.+
19 Hi kutimisela ka n’wina mu ta ponisa wutomi ga n’wina.*+
20 “Kanilezvi, loku mu wona Jerusalema na a randzelwe hi mabutho ma govileko,+ zvi tiveni lezvaku a kuhahlulwa kakwe ku tshinele.+
21 Makunu lava va nga Judhiya a va tsutsumele zvitsungeni,+ lava va nga cikari ka Jerusalema a va hume, ni lava va nga le handle kakwe va nga ngheni ka yena,
22 hakuva lawo masiku ya kuphota, kasi zvontlhe lezvi zvi tsalilweko zvi fela ku tatiseka.
23 Khombo ka vavasati lava va to ngha va hi ni tinyimba ni lava va to ngha va an’wisa ka masiku lawo!+ Hakuva ku tava ni kukarateka ka hombe misaveni ni zanga hehla ka vanhu lava.
24 A vanhu va ta dawa hi cipadha va khomiwa va yiswa matikweni wontlhe.+ Jerusalema i ta kandzihelwa hi matiko* kala ku mbhela a cikhati ci yimisilweko ca matiko.*+
25 “A cin’wani kambe, ku tava ni zviwoniso ka gambo ni ka hweti ni ka tinyeleti;+ laha misaveni a matiko ma ta karateka nguvhu ma nga tivi ni co maha hi kota ya kudzindza ni kuvhindluka ka bimbi.
26 A vanhu va ta titivala hi kuchava ni hi kota ya lezvi zvi tako tikweni, hakuva a mintamu ya le tilweni yi ta tsekatsekiswa.
27 Hi kulandzela, va ta wona a N’wana wa munhu+ na ata hi refu na a hi ni ntamu ni kungangamela ka hombe.+
28 Kanilezvi loku a zvilo lezvi zvi sangula ku maheka, ololokani mu tlakusa tihloko ta n’wina hakuva a kutlhatlhiswa ka n’wina ka tshinela.”
29 Hikwalaho, i no va hlawutela mufananiso, aku: “Cuwukani nkuwu ni tisinya tontlhe.+
30 A cikhati leci ti sangulako ku hluka, ma zvi wona mu tlhela mu zvi tiva ha n’wece lezvaku makunu a cimumu ci laha kusuhani.
31 Hi zvalezvo na n’winawu, laha mu to wona a zvilo lezvi na zvi maheka, zvi tiveni ku a Mufumo wa Nungungulu wu laha kusuhani.
32 Ndza tiyisa ka n’wina ndziku: A cizukulwana leci ci nga ta hundza na zvi nga se maheka zvontlhe a zvilo lezvi.+
33 A tilo ni misava zvi ta hundza, kanilezvi a timhaka ta mina ti nga ta hundza.+
34 “Kanilezvi ti woneleni kasi a timbilu ta n’wina ti nga tshuki ti bindziwa hi kuga mu hundzeleta ni kunwa mu hundzeleta+ ni ku karateka hi wutomi,+ a siku lego gi mu chikelela hi citshuketi
35 a ku khwatsi i ntlhamu.+ Hakuva gi tata ka vontlhe lava va hanyako misaveni yontlhe.
36 Hikwalaho, tshamani na mu khindlimukile,+ mu khongela hi kukhongotela contlhe cikhati+ kasi mu pona ka zvontlhe lezvi zvi faneleko ku maheka ni ku yima mahlweni ka N’wana wa munhu.”+
37 Hikwalaho, ni mumu i wa gondzisa tempeleni, kanilezvi loku gi phuma i wa huma a ya etlela citsungeni ci vitaniwako ku Citsunga ca maOlivha.
38 A vanhu vontlhe va wa vindzuka ni mixo vata ka yena tempeleni, kasi va ta muzwa.
Mitlhamuselo ya lahasi
^ A makaxa lawo ya minyikelo ma wa hi ya matshamela yo hambanahambana. A yokari ma wa fana ni mimpundzu.
^ Kutani: “wasati wo felwa hi nuna”.
^ Kutani: “nyenganyenga; vhilinganya”.
^ Kutani: “tokometwa”.
^ Kutani: “kuma mihefemulo ya n’wina”.
^ Kutani: “vamatiko”.
^ Kutani: “vamatiko”.
