Hi kutsala ka Luka 22:1-71
-
A vapristi va luka mano ya ku daya Jesu (1-6)
-
Va longisela a Phasika go gumesa (7-13)
-
Kuyimiswa ka Cilalelo ca Hosi (14-20)
-
‘Loyi a ndzi tokometako i laha mezeni zvin’we na mina’ (21-23)
-
Ku vhuka kukanetisana ka hombe hi ku hi mani wahombe (24-27)
-
Jesu a maha civhumelwano ca mufumo (28-30)
-
A phrofeta ku Pedro i ta kaneta lezvaku wa mu tiva (31-34)
-
Cilaveko ca ku longa; zvipadha zvimbiri (35-38)
-
Mukhongelo wa Jesu Citsungeni ca maOlivha (39-46)
-
Jesu a khon’wa (47-53)
-
Pedro a kaneta lezvaku wa mu tiva Jesu (54-62)
-
Jesu a poyiliwa (63-65)
-
A xuxisiwa mahlweni ka Tribhunali ya Hombe (66-71)
22 Makunu a Mubuzo wa Tipawa to kala Comelo wu vitaniwako ku i Phasika+ wu wa kari wu tshinela.+
2 A vapristi lava va tihosana ni vatsali va wa lavetela ndlela ya yinene ya ku mu daya,+ hakuva va wa chava vanhu.+
3 Makunu Sathani i no nghena ka Judhasi, a vitaniwako ku hi Iskariyoti, loyi a nga hlayiwa zvin’we ni lava va 12.+
4 Makunu i no ya bhula ni vapristi lava va tihosana ni tihosana ta varindzeli va tempeli hi lezvaku i ta mu nyikelisa* kuyini kabye.+
5 Va no tsaka nguvhu hi zvona va vhumelelana ku mu nyika mali ya prata.+
6 Judhasi i no vhumela, a sangula ku lavetela cikhati ca cinene ca ku mu nyikela* hi cona kabye na ku nga hi na citshungu laha kusuhani.
7 Gi no chikela a siku ga Tipawa to kala Comelo, ku nga siku legi ku nga nyikelwa a muphahlo wa Phasika.+
8 Hikwalaho, Jesu i no ruma Pedro na Johani, aku: “Fambani mu ya hi longisela a Phasika kasi higa.”+
9 Vaku kakwe: “U lava ku hi ya gi longisela kwihi?”
10 Aku kabye: “Loku mu nghena dhoropeni, mu ta tlhangana ni wanuna a rweleko cifukwana ca mati. Mu landzeleni kala ka muti lowu a to nghena.+
11 Byelani a n’winyi wa muti, muku: ‘Mugondzisi i ngalo: “Yi kwihi a yindlu ya vapfhumba lomu ndzi to gela kona Phasika ni vapizani va mina?”’
12 A wanuna loye i ta mu komba sala ya hombe ya le hehla yi longileko ku tirisiwa. Gi longiseleni lomo.”
13 Va no suka va famba vaya zvi kumisa zvalezvi a nga va byelisile zvona, va longisela Phasika.
14 Makunu loku a cikhati ci chikele, i no tshama mezeni ni vapostoli vakwe.+
15 Aku kabye: “Ndzi wa xuva nguvhu a kuga Phasika legi na n’wina na ndzi nga se xaniseka;
16 hakuva ndza mu byela, ndziku: Ndzi nga ta ha giga kambe kala gi tatiseka Mufun’weni wa Nungungulu.”
17 Loku a amukele a kopo, i no bonga, aku: “Tekani mu siyelisana hi yona n’wentlhe,
18 hakuva ndza mu byela, ndziku: Ndzi nga ta hanwa kambe a mihandzu ya vhina* kala a Mufumo wa Nungungulu wuta.”
19 I no teka pawa+ kambe a bonga, a khema, a va nyika, aku: “A pawa leyi yi yimela a miri wa mina,+ lowu wu to nyikelwa hi kota ya n’wina.+ Simamani ku maha lezvi kasi mu ndzi alakanya hi zvona.”+
20 I no maha zvalezvo kambe hi kopo, andzhako ka loku va lalele, aku: “A kopo leyi yi yimela a civhumelwano ciswa+ ci tiyiswako hi nkhata wa mina+ lowu wu to halatiwa hi kota ya n’wina.+
21 “Kanilezvi tivani lezvaku a canja ga loyi a ndzi tokometako gi laha mezeni zvin’we na mina.+
22 Kunene, a N’wana wa munhu wa famba kota lezvi zvi sinako zvi phrofetilwe;+ kanilezvi khombo ka loyi a mu tokometako!”+
23 Hikwalaho, va no sangula ku wutisana ku himani cikari kabye loyi hakunene a nga lava ku maha lezvo.+
24 Ku no vhuka kukanetisana ka hombe cikari kabye xungetano hi ku himani a nga wahombe ka vontlhe.+
25 Kanilezvi i te ngalo kabye: “Ma zvi tiva lezvaku a tihosi ta matiko ta bindzisela lava ti va fumelako, niku a vahombe vabye ve hi Vamasasani.+
26 N’wina mu nga mahisi lezvo.+ Kanilezvi loyi a nga wahombe cikari ka n’wina i wa mahe ku khwatsi hi yena ndzisana,+ ni loyi a rangelako i wa mahe ku khwatsi citiri.
27 Kasi himani wahombe, hi loyi a gako* kutani hi loyi a tirelako van’wani? A hi loyi a gako* ke? Kanilezvi mina ndzi cikari ka n’wina kota loyi a mu tirelako.+
28 “Kanilezvi, n’wina hi n’wina mu simamileko na mina+ mindzhingweni ya mina;+
29 ndza maha civhumelwano ca mufumo na n’wina, khwatsi hi lezvi a Papayi wa mina a nga maha civhumelwano na mina,+
30 kasi muga ni kunwa mezeni ya mina Mufun’weni wa mina,+ ni ku tshama zvitshan’wini zva wuhosi+ mu lamula a 12 wa tixaka ta Izrayeli.+
31 “Simoni, Simoni, Sathani i kombele a kuva a mu hehera n’wina n’wentlhe a ku khwatsi i trigo.+
32 Kanilezvi ndzi ku kombelele kasi a kukholwa ka wena ku nga rereki;+ hikwalaho, loku u wuyile, tiyisa vamakabye va wena.”+
33 Simoni aku kakwe: “Hosi, ndzi longile a kuya paxweni, hambu kufa zvin’we na wena.”+
34 Kanilezvi i te ngalo: “Ndza ku byela Pedro, ndziku: A nkuku wu nga taba nyamutlha na u nga se kaneta kunharu lezvaku wa ndzi tiva.”+
35 I no engeta, aku kabye: “A cikhati leci ndzi nga mu ruma na mu nga hi na cipachi ca mali, ne pasta ya zvakuga ne masandalia,+ ci kona mu nga ci vhumala ke?” Vaku: “Ahihi!”
36 I no va byela, aku: “Kanilezvi zvezvi, loyi a nga ni cipachi ca mali i wa teke, loyi a nga ni pasta ya zvakuga yenawu i wa teke, ni loyi a nga hava cipadha i wa xavise a bhaji gakwe a ci xava.
37 Hakuva ndza mu byela lezvaku lezvi zvi tsalilweko zvi fanele ku tatiseka ka mina, zvaku: ‘I hlayilwe zvin’we ni vahambunyeti va nayo.’+ Hakuva lezvi zva tatiseka ka mina.”+
38 Vaku kakwe: “Hosi, wa zvi wona! hi na ni zvipadha zvimbiri laha.” Aku kabye: “Zva enela.”
39 I no suka hi laho aya Citsungeni ca maOlivha kota lezvi a nga tolovela ku maha, niku a vapizani va no mu landzela.+
40 Laha a nga chikela seyo, i te ngalo kabye: “Khongelani mu nga tsiki kasi mu nga weli kuringweni.”+
41 I no tsawukana navo hi pfhukana wa ku hoxela ribye, a ya khizama a sangula ku khongela,
42 aku: “Papayi, loku u zvi lava, susa a kopo leyi ka mina. Hambulezvo, ku nga maheki kurandza ka mina, kanilezvi a ku maheke loku ka wena.”+
43 Ku no woneka kakwe a ngilozi na yita hi le tilweni yi ta mu tiyisa.+
44 Kanilezvi i wa hi kukaratekeni ka hombe laha ka kuza a simama ku khongela hi kutikisa;+ ni nyuko wakwe wu ku khwatsi madona* ya nkhata ma donako lahasi.
45 A cikhati leci a nga suka hi laha a nga kari a khongela aya ka vapizani, i no ya va kuma na va etlele hi ku karala hi kota ya kubayiseka.+
46 Aku kabye: “Hikuyini mu etlelako? Vhukani mu simama ku khongela kasi mu nga weli kuringweni.”+
47 Zvalezvo, na a ha wulawula, ku nota citshungu, ni wanuna wa ku hi Judhasi, a mun’we wa lava va 12, na a ci rangela. I no tshinela ka Jesu kasi ku mu pswopswa.+
48 Kanilezvi Jesu i te ngalo kakwe: “Judhasi, wo nyikela a N’wana wa munhu hi ku mu pswopswa?”
49 A cikhati leci lava va nga hi naye va nga wona lezvi zvi nga lava ku maheka, va te ngalo: “Hosi, hi va khavinga hi cipadha ke?”
50 A mun’we wabye i zile aba nandza ga mupristi wa hombe, a gi tsema ndleve ya cinene.+
51 Kanilezvi Jesu i no hlamula, aku: “Zvi ringene.” I no henya ndleve a mu hanyisa.
52 Andzhako ka lezvo, Jesu i no byela vapristi lava va tihosana, ni tihosana ta varindzeli va tempeli, ni madhota, lava va nga tile kakwe, aku: “Mu ndzi tela ni zvipadha ni migomba, ndzova khamba ke?+
53 Laha ndzi nga hi na n’wina lomu tempeleni, siku ni siku,+ a mu ndzi khomangi.+ Kanilezvi leci cikhati ca n’wina ni ca kufuma ka munyama.”+
54 Va no mu khoma va famba naye+ mutini wa mupristi wa hombe; kanilezvi Pedro i no va landzela hi le kule.+
55 A cikhati leci va nga dzivela ndzilo laha cikari ka tsendzele* va tshama zvin’we, Pedro i no tshama cikari kabye.+
56 Kanilezvi, a cikhati leci a citiri ca nhanyana ci nga mu wona na a tshamile laha ndzilweni, ci no mu cuwuka khwatsi, ciku: “A wanuna loyi yenawu i wa hi zvin’we naye.”
57 Kanilezvi i no kaneta, aku: “Wasati, a ndzi mu tivi.”
58 Andzhako ka cikhatana, a mun’wani munhu i no mu wona, aku: “Wenawu u mun’we wabye.” Kanilezvi Pedro i te ngalo: “Hesawu, a ndzi mun’we wabye.”+
59 Loku ku hundzile cipimo ca hora, a wanuna mun’wani i no wula hi kutiya, aku: “Hakunene a wanuna loyi yenawu i wa hi zvin’we naye, hakuva wa le Galileya!”
60 Kanilezvi Pedro i te ngalo: “Hesaweno, a ndzi zvi tivi lezvi u zvi wulako!” Zvalezvo, na a ha wulawula, a nkuku wu noba.
61 A Hosi yi no hundzuluka yi cuwuka Pedro; makunu Pedro i no alakanya magezu ya Hosi a cikhati leci yi nga mu byela, yiku: “A nkuku na wu nga seba nyamutlha, u ta ndzi kaneta kunharu.”+
62 I no huma a ya rila nguvhu.
63 Makunu a vavanuna lava va nga khomile Jesu va no sangula ku mu poyila+ ni ku muba.+
64 Va no mu fenengeta nghohe, vaku: “Phrofeta! Himani a nga kuba?”
65 Va no mu rukatela hi timhaka tin’wani to tala.
66 Loku gi cile, a ntlawa wa madhota, ku nga vapristi lava va tihosana ni vatsali, va no tlhangana+ va mu teka va famba naye Tribhunali yabye ya Hombe, vaku:
67 “Loku u hi wena Kristu hi byele.”+ Kanilezvi i te ngalo kabye: “Hambu loku ndzo mu byela mu nga ta kholwa.
68 Ahandle ka lezvo, loku ndzo mu wutisa mu nga ta hlamula.
69 Hambulezvo, kusukela lezvi, a N’wana wa munhu+ i ta tshama reveni ga cinene ga ntamu ga Nungungulu.”+
70 Laha va ngazwa lezvo, vontlhe va te ngalo: “U ngalo hi wena N’wana wa Nungungulu?” Aku kabye: “Ma wula n’wina muku hi mina yena.”
71 Vona vaku: “Ha ha gi lavela yini wukustumunyu? Hakuva hi zvi zwile ha hoce na a wula hi nomu wakwe.”+
Mitlhamuselo ya lahasi
^ Kutani: “tokometisa”.
^ Kutani: “tokometa”.
^ A vhina i sinya leyi yi pswalako mauvha.
^ Kutani: “tshamileko mezeni”.
^ Kutani: “tshamileko mezeni”.
^ Kutani: “mathosa”.
^ Kutani: “pátio”.
