Hi kutsala ka Luka 3:1-38
3 Hi lembe ga wu 15 ga kufuma ka Tibheriyusi Khezari, a cikhati leci Pontiyu Pilatu a nga hi govhernadhori wa Judhiya, Herodhi*+ na a hi adhimistradhori wa Galileya, na Filipu a makabye wakwe a hi adhimistradhori wa tiko ga Itureya ni Trakoniti, Lisaniya na a hi adhimistradhori wa Abhileni,
2 masikwini ya Anasi, a hosana ya vapristi, na Kayafasi,+ a mhaka ya Nungungulu yi nota ka Johani,+ a n’wana wa Zakariya, le ciwuleni.+
3 Hikwalaho, i no fambafamba tikweni gontlhe matlhelweni ya Jordhani, a chumayela hi kubhabhatisa kota cikombiso ca kutisola kasi ku tsetselelwa zviwonho,+
4 a ku khwatsi hi lezvi zvi tsalilweko ka bhuku ga timhaka ta muphrofeti Isaya, zvaku: “Ku zwala gezu ga loyi a huwelelako lomu ciwuleni, aku: ‘Longiselani a ndlela ya Jehovha!* Lulametani a maruwa yakwe.+
5 A mindzhelelo yontlhe yi wa setelwe, a zvitsunga zvontlhe ni zvitsungana zvi wa lizarelwe; a tindlela to jikajika ti wa lulametiwe, ni tindlela ta zvikhele ti wa bambatelwe;
6 niku a nyama yontlhe* yi ta wona a kuhanyisa ka Nungungulu.’”*+
7 Hikwalaho, i wa byela a zvitshungu lezvi zvi nga kari zvita kakwe zvi ta bhabhatiswa, aku: “N’wina pswalo wa maphiri, himani a nga mu tlharihisa lezvaku mu tsutsuma a zanga yi tako?+
8 Hikwalaho, pswalani mihandzu yi kombako ku ma ti sola. Mu nga ti byeli ku: ‘Hina hi vana va Abrahama.’ Hakuva ndza mu byela lezvaku Nungungulu wa zvi kota ku mu humesela vana Abrahama hi ka maribye lawa.
9 Hakunene, a chapo gi longile ku tsema tisinya hi le mitswini. Hikwalaho, a tisinya tontlhe ti nga pswaliko mihandzu ya yinene ti ta tsemiwa ti hoxiwa ndzilweni.”+
10 A zvitshungu zvi no mu wutisa, zviku: “Makunu zvini hi faneleko ku maha?”
11 I no va hlamula, aku: “Loyi a nga ni tinguwo timbiri* i wa avele loyi a nga hava, ni loyi a nga ni zvakuga i wa mahewo zvalezvo.”+
12 Hambu a vakhupisi va waya kakwe kasi va ya bhabhatiswa,+ vaku kakwe: “Mugondzisi, zvini hi faneleko ku maha?”
13 Aku kabye: “Mu nga londzi* khupo wo hundza lowu wu yimisilweko hi nayo.”+
14 A masochwa wonawu ma wa mu wutisa, maku: “Zvini hi faneleko ku maha?” Aku kabye: “Mu nga maheli munhu xapi* hambu ku mu lumbeta mawunwa,+ kanilezvi eneliswani hi lezvi mu nyikiwako.”*
15 A vanhu va wa kari va rindzela, niku vontlhe va wa ti wutisa timbilwini tabye xungetano hi Johani, vaku: “A kova yena Kristu yaloyi ke?”+
16 Johani i no va hlamula vontlhe, aku: “Mina ndzi mu bhabhatisa hi mati, kanilezvi wata loyi a nga ni ntamu a ku hundza mina, wa ku ne a ndzi ringani ku tlhatlha tingoti ta masandalia yakwe.+ Yena i ta mu bhabhatisa hi moya wo basa ni ndzilo.+
17 I khomile foxola go hehera hi gona kasi ku swiyela wutshamu gakwe go hulela kona timbewu gi basa khwatsi, a hlengeletela trigo tshaleni gakwe, kanilezvi a mungu* i ta wu hisa hi ndzilo wu nga timekiko.”
18 I no va nyika zvin’wani zvitlharihiso zvo tala ni ku simama ku kanela mahungu ya manene ka vanhu.
19 Kanilezvi Herodhi, a mufumeli wa dhistrito, na a kawukilwe hi Johani hi kota ya Herodhiya, a sati wa makabye wakwe,* ni hi kota ya mitiro yontlhe ya kubiha leyi Herodhi a nga yi mahile,
20 i no engetela a kubiha loko hi ku khoma Johani a mu vhalela paxweni.+
21 Makunu laha a vanhu vontlhe va nga bhabhatisilwe, Jesu yenawu i no bhabhatiswa.+ Na a kari a khongela, a tilo gi no vhululeka,+
22 ku relela a moya wo basa hehla kakwe na wu ku khwatsi cipomba, niku ku no zwala gezu hi le tilweni, giku: “Wena u N’wana wa mina ndzi ku randzako; ndza xalala hi wena.”+
23 A cikhati leci Jesu+ a nga sangula ntiro wakwe, i wa hi ni cipimo ca 30 wa malembe,+ na va alakanya lezvaku i n’wanawa Josefa,+wa Heli,
24 wa Matate,wa Levhi,wa Melki,wa Janayi,wa Josefa,
25 wa Matatiyasi,wa Amosi,wa Nahume,wa Esli,wa Nagayi,
26 wa Maati,wa Matatiyasi,wa Semeyi,wa Joseke,wa Jodha,
27 wa Jowanani,wa Resa,wa Zerubhabheli,+wa Salatiyeli,+wa Neri,
28 wa Melki,wa Adhi,wa Kosamu,wa Elmadhamu,wa Eri,
29 wa Jesu,wa Eliyezeri,wa Jorimu,wa Matate,wa Levhi,
30 wa Simeyoni,wa Judhasi,wa Josefa,wa Jonamu,wa Eliyakimu,
31 wa Meleya,wa Mena,wa Matata,wa Natani,+wa Dhavhidha,+
32 wa Jese,+wa Obhedhi,+wa Bhowazi,+wa Salmoni,+wa Naxoni,+
33 wa Aminadhabha,wa Arni,wa Hezroni,wa Perezi,+wa Judha,+
34 wa Jakobe,+wa Isaka,+wa Abrahama,+wa Tera,+wa Nahori,+
35 wa Seruge,+wa Rewu,+wa Pelegi,+wa Ebheri,+wa Xela,+
36 wa Kayinani,wa Arpaxadhe,+wa Xemi,+wa Nowa,+wa Lameke,+
37 wa Metusela,+wa Enoki,wa Jeredhe,+wa Mahalaleli,+wa Kayinani,+
38 wa Enoxi,+wa Sete,+wa Adhamu,+wa Nungungulu.
Mitlhamuselo ya lahasi
^ Ku nga Herodhi Antipasi. Wona Tlhamuselo wa magezu ya Bhibhiliya.
^ Kutani: “a vanhu vontlhe”.
^ Kutani: “leci Nungungulu a hanyisako hi cona”.
^ Kutani: “a nga ni yin’wani nguwo ahandle ka leyi a nga boha”.
^ Kutani: “teki”.
^ Kutani: “Mu nga wutleli munhu nchumu”.
^ Kutani: “hi muholo wa n’wina”.
^ A mungu hi lezvi zvi humako a cikhati leci va tsutsutako timbewu.
^ Kutani: “a sati wa makabye wa Herodhi”.
