Hi kutsala ka Luka 5:1-39
5 Ka khati go kari, na a yimile mbhirini ya tiva ga Genezareta,*+ a citshungu ci no manyana laha kakwe kasi kuzwa a mhaka ya Nungungulu.
2 Kwalaho i no wona tingalava timbiri na ti vekilwe mbhirini ya tiva, kanilezvi a vakukuti* va wa humele ka tona va ya hlazva tikoka* tabye.+
3 I no nghena ka yin’we ya tingalava, leyi yi nga hi ya Simoni, a mu kombela lezvaku a yi chovha yi nghenanyana matini. Makunu i no tshama lomu ngalaveni a sangula ku gondzisa zvitshungu.
4 Laha a nga mbheta ku wulawula, i te ngalo ka Simoni: “Chovha ngalava yiya laha ku etileko mu ya peta tikoka* ta n’wina mu kukuta.”
5 Kanilezvi Simoni i no mu hlamula, aku: “Mugondzisi, hi tirile wusiku gontlhe hi nga kumi nchumu,+ kanilezvi kota lezvi u wulako, ndzi ta peta tikoka.”*
6 Kunene, loku va mahile lezvo va no phasa tinjhanjhi to tala nguvhu laha ka kuza a tikoka* tabye ti sangula ku handzuka.+
7 Hikwalaho, va no khweneta vanghana vabye va nga hi ka yin’wani ngalava lezvaku vata va ta va vhuna. Va nota va ta tata a tingalava tontlhe ta timbiri laha ka kuza ti sangula ku mbombomela.
8 Laha Simoni Pedro a nga wona lezvo, i nowa madzolweni ya Jesu, aku: “Hosi, suka ka mina hakuva ndzi muwonhi.”
9 Hakuva yena ni lava a nga hi navo va no hlamala nguvhu hi kota ya kutala ka tinjhanjhi leti va nga ti kumile.
10 Zvive tano ka Jakobe na Johani, a vana va Zebhedhi,+ lava va nga tira zvin’we na Simoni. Kanilezvi Jesu i te ngalo ka Simoni: “U nga chavi. Kusukela lezvi u ta kukuta vanhu.”*+
11 Hikwalaho, va no humesa tingalava matini, va tsika zvontlhe va mu landzela.+
12 Ka gin’wani khati na a hi ka gin’we ga madhoropa, ku nota wanuna a nga tele hi hlokonho. A cikhati leci a nga wona Jesu, i nowa hi nghohe a mu khongotela, aku: “Hosi, loku u zvi lava u nga ndzi basisa.”+
13 I no nawuluta canja gakwe a mu henya, aku: “Ndza zvi lava! Basiswa.” Zvalezvo a hlokonho yakwe yi no hangalaka.+
14 Andzhako ka lezvo, i no mu laya lezvaku a nga byeli munhu, a gumesa aku: “Kanilezvi famba u ya ti kombekisa ka mupristi, u nyikela munyikelo hi kota ya kubasiswa ka wena, a ku khwatsi hi lezvi Mosi a leleteleko,+ kasi zviva wukustumunyu kabye.”+
15 Kanilezvi a mahungu xungetano hi yena ma no simama ku hangalaka, ni zvitshungu zva hombe zvi wa hlengeletana kasi zvi mu ingisela ni ku hanyisiwa ka mababyi ya zvona.+
16 Hambulezvo, i wa tala kuya ka matshamu ya ciwula a ya khongela.
17 Ka gin’we ga masiku lawo, na a kari a gondzisa, ku nota vaFarisi ni vagondzisi va Nayo hi ka zvidhoropana zvontlhe zva Galileya ni Judhiya ni le Jerusalema va ta tshama laho; ni ntamu wa Jehovha* wu wa hi zvin’we naye kasi a hanyisa vanhu.+
18 Ku nota vavanuna na va rwele a wanuna wa ku woma zviro hi lihlaka,* va ta zama ku nghena naye kasi va mu veka mahlweni ka Jesu.+
19 Lezvi va nga tsandzeka ku nghena naye hi kota ya citshungu, va no kandziha le hehla ka yindlu va gwawula mathayela* va mu releta hi lihlaka* hi laha ka lava va nga hi phambeni ka Jesu.
20 Laha a nga wona a kukholwa kabye i te: “Hesa, a zviwonho zva wena zvi tsetselelwe.”+
21 Makunu a vatsali ni vaFarisi va no sangula ku wulawulisana cikari kabye, vaku: “Himani yaloyi a wulawulako tihlamba? Himani a nga tsetselelako zviwonho ahandle ka Nungungulu ke?”+
22 Kanilezvi Jesu, na a tiva maalakanyo yabye, i no va hlamula, aku: “Zvini mu alakanyelako timbilwini ta n’wina?
23 Hi cihi ci olovako? Ku wula ku: ‘A zviwonho zva wena zvi tsetselelwe’, kutani ku: ‘Suka u yima, u famba’?
24 Kanilezvi kasi mu zvi tiva lezvaku a N’wana wa munhu i na ni ntamu laha misaveni wa ku tsetselela zviwonho . . .”, i no byela a wanuna loyi wa ku woma zviro, aku: “Ndza ku byela, ndziku: Suka u yima, u teka lihlaka* la wena uya kaya.”+
25 I no suka a yima mahlweni kabye, a teka leci a nga latilwe ka cona a khoma ndlela aya kaya na a dhumisa Nungungulu.
26 Vontlhe va no tala hi kuhlamala va dhumisa Nungungulu, na va chava nguvhu, vaku: “Nyamutlha hi wonile zvilo zvo hlamalisa!”
27 Andzhako ka lezvo, i no suka laho; laha a nga kari a famba i no wona mukhupisi a vitaniwako ku hi Levhi na a tshamile laha ku hakhelwako mikhupo, aku kakwe: “Maha mulandzeli wa mina.”+
28 I no tsika zvontlhe, a suka a mu landzela.
29 Makunu Levhi i no mu mahela mubuzo wa hombe mutini wakwe. Ku wa hi ni citshungu ca hombe ca vakhupisi ni van’wani va ngaga* zvin’we navo.+
30 Laha a vaFarisi ni vatsali vabye va nga wona lezvo, va no sangula ku ngurangurela a vapizani vakwe, vaku: “Hikuyini mu gako ni kunwa ni vakhupisi ni vawonhi ke?”+
31 Jesu i no va hlamula, aku: “Lava va kalako va nga babyi a va lavi dhokodhela, kanilezvi lava va babyako va mu lava.+
32 A ndzi telangi ku ta vitana valulamileko lezvaku va ti sola, kanilezvi ndzi tele vawonhi.”+
33 Vaku kakwe: “A vapizani va Johani va tala ku pfhunga* va tlhela va khongela; lava va vaFarisi vonawu va maha zvalezvo, kanilezvi lava va wena voga ni kunwa.”+
34 Jesu aku kabye: “A mu nge mahi a vanghana va noivho va pfhunga* kuveni a noivho ya ha hi zvin’we navo, a hi zvona ke?
35 Kanilezvi mata masiku lawa hakunene a noivho+ yi to susiwa ka vona; makunu ka masiku lawo hi kona va to pfhunga.”*+
36 I no tlhela a va hlawutela mufananiso, aku: “A nga kona a tsemako nguwo ya yiswa a yi rungela kota ciziva ka nguwo ya kale. Hakuva loku a maha lezvo, a ciziva leco ca ciswa ci ta dungurula nguwo leyo ya kale, niku a ciziva ci tsemilweko ka nguwo ya yiswa a ci saseki ka nguwo ya kale.+
37 A nga kona kambe a chelako vhinyo ya yiswa ka tinghotso ta kale. Loku a maha lezvo, a vhinyo leyo ya yiswa yi ta phuxuta tinghotso yi halaka, ni tinghotso ta kona ti wonheka.
38 Kanilezvi a vhinyo ya yiswa yi cheliwa ka tinghotso ta yiswa.
39 A ku na munhu wa ku loku a nwile a vhinyo ya kale wa ha lava leyi ya yiswa, hakuva i ngalo: ‘Leyi ya kale ya nandziha.’”
Mitlhamuselo ya lahasi
^ A tiva ga Genezareta hi gona gin’we ni Bimbi ga Galileya.
^ Kutani: “vatandi”.
^ Kutani: “majuya”.
^ Kutani: “majuya”.
^ Kutani: “majuya”.
^ Kutani: “majuya”.
^ Kutani: “vanhu vo hanya”.
^ Kutani: “maka; citatara”.
^ A mathayela lawa ma wa hi ya wumba.
^ Kutani: “maka; citatara”.
^ Kutani: “maka; citatara”.
^ Kutani: “va nga tshamile mezeni”.
^ Kutani: “jejuwara”.
^ Kutani: “jejuwara”.
^ Kutani: “jejuwara”.